ಹರ್ದೋಯ್ ಜಿಲ್ಲೆಯ ಕೊಟ್ವಾಲಿ ದೇಹತ್ ಪ್ರದೇಶದ ಖೇತುಯಿ ಗ್ರಾಮದ ರಸ್ತೆ ಬಸ್ ನಿಲ್ದಾಣದಲ್ಲಿ ಈ ದುರಂತ ಸಂಭವಿಸಿದೆ. ಎರಡು ರಸ್ತೆಮಾರ್ಗದ ಬಸ್‌ಗಳ ನಡುವೆ ಸಿಲುಕಿಕೊಂಡು ಮಹಿಳೆ ಬಲಿಯಾಗಿದ್ದಾರೆ.

32 ವರ್ಷದ ನೇಹಾ ಸಿಂಗ್ ಎಂಬ ಮಹಿಳೆ ಖಾಸಗಿ ಔಷಧ ಕಂಪನಿಯಲ್ಲಿ ಕೆಲಸ ಮಾಡುತ್ತಿದ್ದರು. ಉನ್ನಾವ್‌ನ ಬಂಗಾರ್‌ಮೌದಲ್ಲಿ ನಡೆಯುವ ಅಧಿಕೃತ ಸಭೆಗೆ ಹೋಗುವುದಕ್ಕಾಗಿ ಬಸ್‌ಗೆ ಕಾಯುತ್ತಿದ್ದರು. ಆ ಸಮಯದಲ್ಲಿ ಕನ್ನೌಜ್ ಮತ್ತು ಹರ್ದೋಯ್ ಡಿಪೋಗಳ ಎರಡು ಬಸ್‌ಗಳು ಮುಂದಕ್ಕೆ ಚಲಿಸುತ್ತಿರುವಾಗ ನೇಹಾ, ಎರಡು ಬಸ್‌ಗಳ ಮಧ್ಯೆ ಸಿಲುಕಿಕೊಂಡಿದ್ದಾರೆ. ಬಸ್‌ಗಳ ಮುಂಭಾಗದಲ್ಲಿ ಸಿಕ್ಕಿ ತುಂಬಾ ಗಂಭೀರ ಗಾಯಗಳಾಗಿದ್ದ ಅವರನ್ನು ತಕ್ಷಣವೇ ಹತ್ತಿರದ ವೈದ್ಯಕೀಯ ಕಾಲೇಜಿಗೆ ಕರೆದೊಯ್ದರು. ಆದರೆ ವೈದ್ಯರು ಈಗಾಗಲೇ ಮೃತಪಟ್ಟಿದ್ದಾರೆ ಎಂದು ಘೋಷಿಸಿದ್ದಾರೆ.

ನೇಹಾ ಸಿಂಗ್ ಅವರ ಸಾವು ಕುಟುಂಬಕ್ಕೆ ಎರಡನೇ ದೊಡ್ಡ ಆಘಾತವಾಗಿದೆ. ಸುಮಾರು 10 ವರ್ಷಗಳ ಹಿಂದೆ ಅವರ ಪತಿ ಸರ್ವೇಶ್ ಸಿಂಗ್ ಟ್ರಕ್ ಚಾಲಕರಾಗಿದ್ದರು. ಅವರು ಒಂದು ಡಿಸಿಎಂ ಮತ್ತು ಟ್ರಕ್ ನಡುವೆ ಸಿಲುಕಿಕೊಂಡು ರಸ್ತೆ ಅಪಘಾತದಲ್ಲಿ ಸಾವನ್ನಪ್ಪಿದ್ದರು. ಪತಿಯ ಸಾವಿನ ನಂತರ ನೇಹಾ ಕುಟುಂಬವನ್ನು ಪೋಷಿಸುವ ಜವಾಬ್ದಾರಿ ತೆಗೆದುಕೊಂಡಿದ್ದರು. ಖಾಸಗಿ ಕಂಪನಿಯಲ್ಲಿ ಕೆಲಸಕ್ಕೆ ಸೇರಿ ಮಕ್ಕಳನ್ನು ಸಾಕುತ್ತಿದ್ದರು. ಆದರೆ ಇದೀಗ ಅವರು ಕೂಡ ಅಪಘಾತದಲ್ಲಿ ಮೃತಪಟ್ಟಿದ್ದಾರೆ.

ಮೃತರ ಕುಟುಂಬಸ್ಥರು ಎರಡೂ ಬಸ್ ಚಾಲಕರ ನಿರ್ಲಕ್ಷ್ಯವೇ ಈ ಅಪಘಾತಕ್ಕೆ ಕಾರಣ ಎಂದು ಆರೋಪಿಸಿದ್ದಾರೆ. ನಿಲ್ದಾಣದಲ್ಲಿ ಪ್ರಯಾಣಿಕರು ನಿಂತಿರುವುದನ್ನು ಗಮನಿಸದೆ ಬಸ್‌ಗಳನ್ನು ವೇಗವಾಗಿ ಮುಂದಕ್ಕೆ ಓಡಿಸಿದ್ದರಿಂದ ಈ ದುರಂತ ಸಂಭವಿಸಿದೆ ಎಂದು ಆರೋಪ ಮಾಡಿದ್ದಾರೆ. ನೇಹಾ ಸೋದರ ಮಾವ ವಿರೇಶ್ ಸಿಂಗ್ ಅವರು, ‘ಪತಿ ಸಾವಿನ ನಂತರ ಕುಟುಂಬವನ್ನು ಸಂಭಾಳಿಸುತ್ತಿದ್ದ ನೇಹಾ ಈಗ ಇಲ್ಲವಾಗಿದ್ದಾಳೆ. ಮಕ್ಕಳ ಭವಿಷ್ಯ ಏನು?’ ಎಂದು ದುಃಖ ವ್ಯಕ್ತಪಡಿಸಿದ್ದಾರೆ.