Last Updated:
India First Private Orbital Rocket: ಭಾರತದ ಖಾಸಗಿ ಕಂಪನಿಯೊಂದು ಪೂರ್ಣವಾಗಿ ಅಭಿವೃದ್ಧಿಪಡಿಸಿದ ವಿಕ್ರಮ್-1 ಭಾರತದ ಮೊದಲ ಖಾಸಗಿ ಆರ್ಬಿಟಲ್ ಲಾಂಚ್ ವೆಹಿಕಲ್ ಆಗಿದೆ. ಇದು ಭಾರತದ ವಾಣಿಜ್ಯ ಬಾಹ್ಯಾಕಾಶ ಸಾಮರ್ಥ್ಯವನ್ನು ಬಲಪಡಿಸುವ ಬೃಹತ್ ಹೆಜ್ಜೆಯಾಗಿದೆ.
ನವದೆಹಲಿ: ಹೈದರಾಬಾದ್ನ ಸ್ಪೇಸ್ ಸ್ಟಾರ್ಟಪ್ ಕಂಪನಿ ಸ್ಕೈರೂಟ್ ಏರೋಸ್ಪೇಸ್ (Skyroot Aerospace) ಇಂದು (ಶನಿವಾರ) ತನ್ನ ಮೊದಲ ಆರ್ಬಿಟಲ್ ಲಾಂಚ್ ವೆಹಿಕಲ್ ವಿಕ್ರಮ್-1 ಅನ್ನು (Vikram-1) ಉಡಾವಣೆ ಮಾಡುವ ಮೂಲಕ ಇತಿಹಾಸ ಸೃಷ್ಟಿಸಲಿದೆ. ಇದು ಭಾರತದ ಖಾಸಗಿ ಬಾಹ್ಯಾಕಾಶ ಕ್ಷೇತ್ರದ ತ್ವರಿತ ಬೆಳವಣಿಗೆಗೆ (Mission Aagaman) ಮಹತ್ವದ ಮೈಲಿಗಲ್ಲಾಗಲಿದೆ.
‘ಮಿಷನ್ ಆಗಮನ್’ ಎಂಬ ಹೆಸರಿನ ಈ ಕಾರ್ಯಾಚರಣೆಯು ಆಂಧ್ರಪ್ರದೇಶದ ಶ್ರೀಹರಿಕೋಟೆಯಲ್ಲಿರುವ ಸತೀಶ್ ಧವನ್ ಸ್ಪೇಸ್ ಸೆಂಟರ್ (SDSC-SHAR) ನ ಮೊದಲ ಲಾಂಚ್ ಪ್ಯಾಡ್ನಿಂದ ಬೆಳಗ್ಗೆ 11:30 ಗಂಟೆಗೆ ಉಡಾವಣೆಯಾಗಲಿದೆ. ವಿಕ್ರಮ್-1 ನ ಈ ಪರೀಕ್ಷಾ ಉಡಾವಣೆಯು ಭಾರತವನ್ನು ವಿಶ್ವದ ಖಾಸಗಿ ಆರ್ಬಿಟಲ್ ಲಾಂಚ್ ಮಾರುಕಟ್ಟೆಗೆ ಪ್ರವೇಶಿಸುವಂತೆ ಮಾಡುವ ಪ್ರಮುಖ ಹೆಜ್ಜೆಯಾಗಲಿದೆ.
ಅಧಿಕಾರಿಗಳು ರಾಕೆಟ್ ಹಾರುವ ಮಾರ್ಗ ಮತ್ತು ಪತನ ಪ್ರದೇಶದುದ್ದಕ್ಕೂ ನಿರ್ಬಂಧಿತ ಆಕಾಶ ಮತ್ತು ಸಮುದ್ರ ವಲಯಗಳನ್ನು ಘೋಷಿಸಿದ್ದಾರೆ. ಮಿಷನ್ ಆಗಮನ್ ಎಂಬುದು 2022 ನವೆಂಬರ್ 18ರಂದು ವಿಕ್ರಮ್-ಎಸ್ ಸಬ್ಆರ್ಬಿಟಲ್ ರಾಕೆಟ್ ಯಶಸ್ವಿಯಾಗಿ ಉಡಾವಣೆಯಾದ ನಂತರ ಸ್ಕೈರೂಟ್ ಕಂಪನಿಯ ಎರಡನೇ ಬಾಹ್ಯಾಕಾಶ ಮಿಷನ್ ಆಗಿದೆ.
‘ವಂದೇ ಮಾತರಂ’ ಎಂಬ ಪದಗಳನ್ನು ಹೊಂದಿರುವ ಪ್ರಧಾನಿ ನರೇಂದ್ರ ಮೋದಿಯವರ ಕೈಬರಹದ ಪೋಸ್ಟ್ಕಾರ್ಡ್ ವಿಕ್ರಮ್ -1 ನಲ್ಲಿ ಬಾಹ್ಯಾಕಾಶಕ್ಕೆ ಪ್ರಯಾಣಿಸಲಿದ್ದು, ಈ ಮೈಲಿಗಲ್ಲು ಕಾರ್ಯಾಚರಣೆಗೆ ಸಾಂಕೇತಿಕ ಸ್ಪರ್ಶ ನೀಡಲಿದೆ. ಪರೀಕ್ಷಾರ್ಥ ಹಾರಾಟದಲ್ಲಿ ಸಾಗಿಸಲಾಗುವ ಹಲವಾರು ವಿಶೇಷ ಪೇಲೋಡ್ಗಳಲ್ಲಿ ಪ್ರಧಾನಿಯವರ ಕೈಬರಹದ ಸಂದೇಶವೂ ಸೇರಿದೆ ಎಂದು ಸ್ಕೈರೂಟ್ ಏರೋಸ್ಪೇಸ್ ಘೋಷಿಸಿದೆ.
ಸ್ಕೈರೂಟ್ ಏರೋಸ್ಪೇಸ್ ಕಂಪನಿ ಹೇಳಿದಂತೆ ಈ ರಾಕೆಟ್ ಸ್ಕೈರೂಟ್ ತಂಡದ ಸದಸ್ಯರು, ಹೂಡಿಕೆದಾರರು, ನೀತಿ ರೂಪುಕಾರರು ಮತ್ತು ವಿಶ್ವದಾದ್ಯಂತದ ಹಿತೈಷಿಗಳ ಕೈಬರಹದ ಟಿಪ್ಪಣಿಗಳನ್ನು ಕೂಡ ಒಯ್ಯಲಿದೆ. ‘ಅನೇಕ ಕೈಗಳಿಂದ ರಚಿತವಾದ ಮತ್ತು ಲಕ್ಷಾಂತರ ಜನರೊಂದಿಗೆ ಹಂಚಿಕೊಳ್ಳಲಾದ ಸಂಭ್ರಮ’ ಎಂದು ವಿವರಿಸುತ್ತಾ, ಈ ಸ್ಮಾರಕಗಳು ಭಾರತದ ಉದಯೋನ್ಮುಖ ಖಾಸಗಿ ಬಾಹ್ಯಾಕಾಶ ಪರಿಸರ ವ್ಯವಸ್ಥೆಯ ಹಿಂದಿನ ಸಾಮೂಹಿಕ ಬೆಂಬಲ ಮತ್ತು ಆಕಾಂಕ್ಷೆಗಳನ್ನು ಪ್ರತಿನಿಧಿಸುತ್ತವೆ ಎಂದು ಹೇಳಿದೆ.
ಈ ಬಗ್ಗೆ ಎಕ್ಸ್ನಲ್ಲಿ ಟ್ವೀಟ್ ಮಾಡಿರುವ ಪ್ರಧಾನಿ ಮೋದಿ, ಈ ಮಿಷನ್ ಭಾರತದ ಯುವಕರ ಪ್ರತಿಭೆ, ಸಂಕಲ್ಪ ಮತ್ತು ಉದ್ಯಮಶೀಲತೆಯನ್ನು ಪ್ರಕಟಿಸುತ್ತದೆ ಮತ್ತು ಭಾರತದ ಬಾಹ್ಯಾಕಾಶ ಕ್ಷೇತ್ರದ ಸುಧಾರಣೆಗಳು ಹೇಗೆ ಹೊಸ ನವೀನತೆ ಮತ್ತು ಉದ್ಯಮಕ್ಕೆ ಅವಕಾಶಗಳನ್ನು ತೆರೆಯುತ್ತಿವೆ ಎಂಬುದನ್ನು ತೋರಿಸುತ್ತದೆ. ‘ಭಾರತದ ಬಾಹ್ಯಾಕಾಶ ಪಯಣಕ್ಕೆ ಐತಿಹಾಸಿಕ ಹೊಸ ಗಡಿ! ಇಂದು ಬೆಳಗ್ಗೆ 11.30 ಗಂಟೆಗೆ ಸ್ಕೈರೂಟ್ ಏರೋಸ್ಪೇಸ್ ಕಂಪನಿ ಭಾರತದ ಮೊದಲ ಖಾಸಗಿ ರಾಕೆಟ್ ವಿಕ್ರಮ್-1 ನ ಮೊದಲ ಆರ್ಬಿಟಲ್ ಉಡಾವಣೆಯನ್ನು ಕೈಗೊಳ್ಳಲಿದೆ’ ಎಂದು ಮೋದಿ ಎಕ್ಸ್ನಲ್ಲಿ ಬರೆದಿದ್ದಾರೆ.
‘ಯಶಸ್ವಿ ಉಡಾವಣೆಗಾಗಿ ಇಡೀ ಸ್ಕೈರೂಟ್ ಏರೋಸ್ಪೇಸ್ ತಂಡಕ್ಕೆ ನನ್ನ ಶುಭಾಶಯಗಳು. ವಿಕ್ರಮ್-1 ಎತ್ತರಕ್ಕೆ ಹಾರಲಿ, ಇತಿಹಾಸ ಸೃಷ್ಟಿಸಲಿ ಮತ್ತು ಹೊಸತನದ ಪೀಳಿಗೆಗೆ ಸ್ಫೂರ್ತಿ ನೀಡಲಿ’ ಎಂದು ಮೋದಿ ಶುಭಾಶಯ ಕೋರಿದ್ದಾರೆ.
New Delhi,Delhi
Jul 18, 2026 11:03 AM IST
