Last Updated:
ಬೆಳ್ಳಗೆ ಕಾಣಬೇಕು, ಮುಖದ ಚರ್ಮ ಬಿಳಿ ಆಗಬೇಕು ಅಂತ ಮಹಿಳೆಯರು ಭಿನ್ನ ವಿಭಿನ್ನವಾದ ಕ್ರೀಮ್ಗಳನ್ನು ಬಳಕೆ ಮಾಡುತ್ತಾರೆ. ಆದರೆ ಅದೇ ಅವರ ಆರೋಗ್ಯಕ್ಕೆ ಹಾನಿಯಾಗುತ್ತದೆ ಎಂದು ತಿಳಿದಿರಲ್ಲ. ಇಲ್ಲಿ 18 ಮಹಿಳೆಯರು ಪಾಕಿಸ್ತಾನದ ಕ್ರೀಮ್ ಹಚ್ಚಿ ಅನಾರೋಗ್ಯಕ್ಕೆ ತುತ್ತಾಗಿದ್ದಾರೆ.
ನಾಗ್ಪುರ: ಕೆಲವರಿಗೆ ತಾವು ಬೆಳ್ಳಗೆ ಕಾಣಬೇಕು (White Face) ಎಂಬ ಆಸೆ ಇರುತ್ತೆ, ಕ್ರೀಮ್ಗಳನ್ನು (Cream) ಹಚ್ಚಿದ್ರೆ ಚರ್ಮ ಬೆಳಗ್ಗೆ ಆಗುತ್ತೆ ಎಂಬ ಹುಚ್ಚು ಇರುತ್ತೆ. ಆದರೆ ಇದೀಗ ಚರ್ಮವನ್ನು ಬಿಳಿಯಾಗಿಸುವ ಕ್ರೀಮ್ಗಳ ಬಳಕೆಯಿಂದ ಆರೋಗ್ಯದ ತೊಂದರೆಗಳು ಹೆಚ್ಚಾಗಿದೆ. ಮಹಾರಾಷ್ಟ್ರದ ನಾಗ್ಪುರದಲ್ಲಿ 18 ಮಹಿಳೆಯರು ಮೂತ್ರಪಿಂಡ ಸಂಬಂಧಿತ (Kidney Problem) ಸಮಸ್ಯೆಗಳಿಂದ ಬಳಲುತ್ತಿದ್ದಾರೆ. ಇವರೆಲ್ಲರೂ ಒಂದೇ ರೀತಿಯ ಚರ್ಮ ಬಿಳಿಮಾಡುವ ಕ್ರೀಮ್ ಬಳಸುತ್ತಿದ್ದರು ಎಂದು ವರದಿಯಾಗಿದೆ.
ಹೌದು, ಚರ್ಮವನ್ನು ಬೆಳ್ಳಗ್ಗೆ ಮಾಡುವ ಕ್ರೀಮ್ ಹಚ್ಚಿ ನಾಗ್ಪುರದಲ್ಲಿ 18 ಮಹಿಳೆಯರು ಮೂತ್ರಪಿಂಡ ಸಮಸ್ಯೆಯಿಂದ ಬಳಲುತ್ತಿದ್ದಾರೆ. ಸದ್ಯ ಇದೀಗ ಈ ಕ್ರೀಮ್ ಒಂದು ವಿವಾದದ ಕೇಂದ್ರಬಿಂದುವಾಗಿದೆ ಎಂದು ಮನಿ ಕಂಟ್ರೋಲ್ ವರದಿ ಮಾಡಿದೆ.
ಮಹಿಳೆಯರು ಹಚ್ಚಿರುವ ಈ ಕ್ರೀಮ್ ಪಾಕಿಸ್ತಾನದಲ್ಲಿ ತಯಾರಿಸಲಾಗಿದ್ದು ಎಂದು ತಿಳಿದುಬಂದಿದೆ. ಪಾಕಿಸ್ತಾನದಲ್ಲಿ ತಯಾರಾಗುವ ‘ಗೋರಿ ಬ್ಯೂಟಿ ಕ್ರೀಮ್’ ಈಗ ದೊಡ್ಡ ವಿವಾದಕ್ಕೆ ಕಾರಣವಾಗಿದೆ. ಮೀಶೋ ಮತ್ತು ಇನ್ಸ್ಟಾಗ್ರಾಮ್ ಪುಟಗಳ ಮೂಲಕ ಈ ಕ್ರೀಮ್ ಭಾರತದಲ್ಲಿ ಮಾರಾಟವಾಗುತ್ತಿದೆ. ಎಫ್ಡಿಎ (ಆಹಾರ ಮತ್ತು ಔಷಧ ಆಡಳಿತ) ಈ ಕ್ರೀಮ್ ಮತ್ತು ಇತರ ಎರಡು ಉತ್ಪನ್ನಗಳ ಮಾರಾಟ, ವಿತರಣೆ ಮತ್ತು ಬಳಕೆಯನ್ನು ತಕ್ಷಣ ನಿಲ್ಲಿಸುವಂತೆ ಆದೇಶಿಸಿದೆ.
ಪ್ರಯೋಗಾಲಯ ಪರೀಕ್ಷೆಗಳಲ್ಲಿ ಗೋರಿ ಬ್ಯೂಟಿ ಕ್ರೀಮ್ನಲ್ಲಿರುವ ಉತ್ಪನ್ನಗಳ ಪ್ರಮಾಣ ಕಾನೂನುಬದ್ಧ ಮಿತಿಗಿಂತ ಬಹಳ ಹೆಚ್ಚಾಗಿದೆ ಎಂದು ಕಂಡುಬಂದಿದೆ. ಇದು ಚರ್ಮವನ್ನು ಬಿಳಿಯಾಗಿಸುವುದರ ಜೊತೆಗೆ ದೇಹದಲ್ಲಿ ಸಂಗ್ರಹವಾಗಿ ಮೂತ್ರಪಿಂಡಗಳಿಗೆ ಹಾನಿ ಮಾಡುತ್ತದೆ ಎಂದು ಹೇಳಲಾಗಿದೆ.
ಎಫ್ಡಿಎ ಈ ಮೂರು ಉತ್ಪನ್ನಗಳನ್ನು ‘ಪ್ರಮಾಣಿತ ಗುಣಮಟ್ಟವಲ್ಲ’ (NSQ) ಎಂದು ಘೋಷಿಸಿದೆ. ಗೋರಿ ಬ್ಯೂಟಿ ಕ್ರೀಮ್ ಹೊರತುಪಡಿಸಿ ಫೇಸ್ ಫ್ರೆಶ್ ಗೋಲ್ಡ್ (ಬ್ಯೂಟಿ ಕ್ರೀಮ್ ಮತ್ತು ಬ್ಯೂಟಿ ಸೀರಮ್) ಮತ್ತು ಗೋಲ್ಡನ್ ಸ್ಟಾರ್ ಬ್ಯೂಟಿ ಕ್ರೀಮ್ಗಳ ಮೇಲೆಯೂ ನಿಷೇಧ ಹೇರಲಾಗಿದೆ. ಚೆಂಬೂರಿನ ಒಂದು ಅಂಗಡಿಯ ವಿರುದ್ಧ ಪೊಲೀಸರು ಕ್ರಿಮಿನಲ್ ಪ್ರಕರಣ ದಾಖಲಿಸಿದ್ದಾರೆ.
ಆರೋಗ್ಯ ಸಂಶೋಧಕ ಚಿರಾಗ್ ಬರ್ಜತ್ಯಾ ಅವರು ಇನ್ಸ್ಟಾಗ್ರಾಮ್ನಲ್ಲಿ ಈ ವಿಷಯವನ್ನು ಬಹಿರಂಗಪಡಿಸಿದ್ದಾರೆ. ನಾಗ್ಪುರದಲ್ಲಿ ಎರಡು ವರ್ಷಗಳಲ್ಲಿ 18 ಮಹಿಳೆಯರು ಮೂತ್ರಪಿಂಡ ಸಮಸ್ಯೆಯೊಂದಿಗೆ ಆಸ್ಪತ್ರೆಗೆ ಬಂದಿದ್ದಾರೆ. ಎಲ್ಲರೂ ಈ ಕ್ರೀಮ್ ಬಳಸುತ್ತಿದ್ದರು ಎಂದು ಕಂಡುಬಂದಿದೆ. ಪಾದರಸವು ಚರ್ಮದ ಬಣ್ಣವನ್ನು ಬದಲಿಸುವ ಜೊತೆಗೆ ಇದು ದೇಹದಲ್ಲಿ ಸಂಗ್ರಹವಾಗಿ ಮೂತ್ರಪಿಂಡಗಳಿಗೆ ಹಾನಿ ಮಾಡುತ್ತದೆ ಎಂದು ಎಚ್ಚರಿಸಿದ್ದಾರೆ.
ಈ ಸುದ್ದಿ ಹರಡುತ್ತಿದ್ದಂತೆ ಸಾಮಾಜಿಕ ಮಾಧ್ಯಮಗಳಲ್ಲಿ ತೀವ್ರ ಚರ್ಚೆ ನಡೆಯುತ್ತಿದೆ. ‘ಪಾಕಿಸ್ತಾನಿ ಕ್ರೀಮ್ ಭಾರತದಲ್ಲಿ ಹೇಗೆ ಮಾರಾಟವಾಗುತ್ತಿದೆ?’ ಎಂದು ಹಲವರು ಪ್ರಶ್ನಿಸಿದ್ದಾರೆ. ‘ಸನ್ಸ್ಕ್ರೀನ್ ಹೊರತುಪಡಿಸಿ ಎಲ್ಲಾ ಚರ್ಮದ ಆರೈಕೆ ಉತ್ಪನ್ನಗಳನ್ನು ಪ್ರಯತ್ನಿಸುತ್ತಾರೆ’ ಎಂದು ಒಬ್ಬರು ಕಾಮೆಂಟ್ ಮಾಡಿದ್ದಾರೆ. ಮೀಶೋ ಕಂಪನಿ ಈ ವಿಷಯವನ್ನು ತನಿಖೆ ಮಾಡುತ್ತಿದ್ದೇವೆ ಎಂದು ಹೇಳಿದೆ. ಉತ್ಪನ್ನಗಳನ್ನು ತೆಗೆದುಹಾಕುವ ಪ್ರಕ್ರಿಯೆಯಲ್ಲಿದ್ದೇವೆ ಎಂದು ತಿಳಿಸಿದೆ.
ವೈದ್ಯರು ಚರ್ಮ ಬಿಳಿಮಾಡುವ ಕ್ರೀಮ್ಗಳ ಬಳಕೆಯಿಂದ ದೂರವಿರುವಂತೆ ಸಲಹೆ ನೀಡುತ್ತಿದ್ದಾರೆ. ಅದರಲ್ಲಿರುವ ಕೆಲವು ಲೋಹಗಳು ದೇಹದಲ್ಲಿ ಸಂಗ್ರಹವಾಗಿ ಗಂಭೀರ ಆರೋಗ್ಯ ಸಮಸ್ಯೆಗಳಿಗೆ ಕಾರಣವಾಗುತ್ತವೆ. ಆನ್ಲೈನ್ನಲ್ಲಿ ಚರ್ಮದ ಆರೈಕೆ ಉತ್ಪನ್ನಗಳನ್ನು ಖರೀದಿಸುವ ಮೊದಲು ಪದಾರ್ಥಗಳನ್ನು ಪರಿಶೀಲಿಸುವುದು ಮುಖ್ಯ ಎಂದು ಎಚ್ಚರಿಸಿದ್ದಾರೆ.
ಎಫ್ಡಿಎ ಈ ಉತ್ಪನ್ನಗಳ ಮೇಲೆ ತಕ್ಷಣ ನಿಷೇಧ ಹೇರಿದೆ. ಜನರು ತಮ್ಮ ಕುಟುಂಬ ಸದಸ್ಯರು ಮತ್ತು ಸುತ್ತಲಿನವರು ಈ ಕ್ರೀಮ್ ಬಳಸುತ್ತಿದ್ದಾರೆಯೇ ಎಂದು ಪರಿಶೀಲಿಸುವಂತೆ ಸಲಹೆ ನೀಡಲಾಗಿದೆ. ಈ ಕ್ರೀಮ್ ಬಳಸುತ್ತಿದ್ದವರು ತಕ್ಷಣವೇ ಬಳಕೆ ನಿಲ್ಲಿಸಿ ವೈದ್ಯರನ್ನು ಸಂಪರ್ಕಿಸುವಂತೆ ತಿಳಿಸಲಾಗಿದೆ. ಬಿಳಿ ಬಣ್ಣದ ಗೀಳು ಆರೋಗ್ಯಕ್ಕೆ ದೊಡ್ಡ ಬೆಲೆಯಾಗುತ್ತಿದೆ ಎಂಬುದು ಈ ಘಟನೆಯಿಂದ ಸ್ಪಷ್ಟವಾಗಿದೆ. ಜನರು ಸುರಕ್ಷಿತ ಉತ್ಪನ್ನಗಳನ್ನು ಬಳಸುವುದು ಮುಖ್ಯ. ಆರೋಗ್ಯಕ್ಕೆ ಹಾನಿಯಾಗುವ ಯಾವುದೇ ಉತ್ಪನ್ನಗಳನ್ನು ತಪ್ಪಿಸುವುದು ಅಗತ್ಯವಾಗಿದೆ.
Nagpur,Maharashtra
Jul 06, 2026 12:50 PM IST
Face Cream Tragedy: ಬೆಳ್ಳಗಾಗೋಕೆ ಪಾಕಿಸ್ತಾನದ ಕ್ರೀಂ ಹಚ್ಚಿದ ಭಾರತೀಯ ಮಹಿಳೆಯರು, ಈಗ ಅದ್ರಿಂದ ಕಿಡ್ನಿ ಸಮಸ್ಯೆ ಶುರು! ಆ ಕ್ರೀಂ ಇಲ್ಲಿಗೆ ಬಂದಿದ್ದು ಹೇಗೆ?
