ಬುಧವಾರ ಬಾಂಗ್ಲಾದೇಶ ವಿರುದ್ಧದ ನಿರ್ಣಾಯಕ ಪಂದ್ಯದಲ್ಲಿ, ಶ್ರೀ ಚರಣಿ ಎರಡು ವಿಕೆಟ್‌ಗಳನ್ನು ಕಬಳಿಸಿದರು. ಕೊನೆಯ ಓವರ್‌ನಲ್ಲಿ ಶೋರ್ನಾ ಅಖ್ತರ್ ಮತ್ತು ನಹಿದಾ ಅಖ್ತರ್ ವಿಕೆಟ್ ಪಡೆಯುವ ಮೂಲಕ ಅವರ ಬೌಲಿಂಗ್ ವಿರುದ್ಧ ಆಕ್ರಮಣಕಾರಿಯಾಗಿ ಆಡುವ ಪ್ರಯತ್ನದಲ್ಲಿ ತಮ್ಮ ವಿಕೆಟ್‌ಗಳನ್ನು ಕಳೆದುಕೊಂಡರು. ಇದಕ್ಕೂ ಮೊದಲು, ಅವರು ದಕ್ಷಿಣ ಆಫ್ರಿಕಾ ಮತ್ತು ಪಾಕಿಸ್ತಾನ ವಿರುದ್ಧದ ಪಂದ್ಯಗಳಲ್ಲಿ ತಲಾ ಮೂರು ವಿಕೆಟ್‌ಗಳನ್ನು ಮತ್ತು ನೆದರ್‌ಲ್ಯಾಂಡ್ಸ್ ವಿರುದ್ಧದ ಪಂದ್ಯದಲ್ಲಿ ನಾಲ್ಕು ವಿಕೆಟ್‌ಗಳನ್ನು ಕಬಳಿಸಿದ್ದರು.

ಟೂರ್ನಮೆಂಟ್‌ನಾದ್ಯಂತ ಭರ್ಜರಿ ಫಾರ್ಮ್‌ನಲ್ಲಿದ್ದ ಶ್ರೀ ಚರಣಿ, ಟಿ20 ವಿಶ್ವಕಪ್‌ನ ಒಂದೇ ಆವೃತ್ತಿಯಲ್ಲಿ ಅತಿ ಹೆಚ್ಚು ವಿಕೆಟ್ ಪಡೆದ ಮೊದಲ ಏಷ್ಯನ್ ಆಟಗಾರ್ತಿ ಎಂಬ ಹೆಗ್ಗಳಿಕೆಗೆ ಪಾತ್ರರಾದರು, ಒಟ್ಟು 12 ವಿಕೆಟ್‌ಗಳನ್ನು ಪಡೆದಿದ್ದಾರೆ. ಮಹಿಳಾ ಟಿ20 ವಿಶ್ವಕಪ್‌ನ 17 ವರ್ಷಗಳ ಇತಿಹಾಸದಲ್ಲಿ ಬೇರೆ ಯಾವುದೇ ಆಟಗಾರ್ತಿ ಈ ಸಾಧನೆ ಮಾಡಿಲ್ಲ. ಶ್ರೀಚರಣಿ ಭಾರತದ ಖ್ಯಾತ ಬೌಲರ್ ಪೂನಂ ಯಾದವ್ ಅವರ ದಾಖಲೆಯನ್ನು ಮೀರಿಸಿ ಅಗ್ರಸ್ಥಾನ ಪಡೆದಿದ್ದಾರೆ. ಪೂನಂ ಯಾದವ್ 2020ರ ಮಹಿಳಾ ಟಿ20 ವಿಶ್ವಕಪ್‌ನಲ್ಲಿ 10 ವಿಕೆಟ್‌ಗಳನ್ನು ಪಡೆದಿದ್ದರು. ಈ ಪಟ್ಟಿಯಲ್ಲಿರುವ ಇತರರಲ್ಲಿ ಡಯಾನಾ ಡೇವಿಡ್ (2010ರಲ್ಲಿ 9), ಪೂನಂ ಯಾದವ್ (2014ರಲ್ಲಿ 8 ಮತ್ತು 2018ರಲ್ಲಿ 8), ರಾಧಾ ಯಾದವ್ (2018ರಲ್ಲಿ 8), ಮತ್ತು ಫಾತಿಮಾ ಸನಾ (2026ರಲ್ಲಿ 8) ಸೇರಿದ್ದಾರೆ.

ಇದಲ್ಲದೆ, ಟಿ20 ವಿಶ್ವಕಪ್‌ನ ಒಂದೇ ಆವೃತ್ತಿಯಲ್ಲಿ ಸತತ ನಾಲ್ಕು ಪಂದ್ಯಗಳಲ್ಲಿ ಎರಡು ಅಥವಾ ಹೆಚ್ಚಿನ ವಿಕೆಟ್‌ಗಳನ್ನು ಪಡೆದ ಮೊದಲ ಏಷ್ಯನ್ ಬೌಲರ್​​ ಎಂಬ ಹೆಗ್ಗಳಿಕೆಗೆ ಶ್ರೀಚರಣಿ ಪಾತ್ರರಾಗಿದ್ದಾರೆ. ಪೂನಮ್ ಯಾದವ್ (2014, 2018), ರಾಧಾ ಯಾದವ್ (2018), ಮತ್ತು ರೇಣುಕಾ ಠಾಕೂರ್ (2024) ಈ ಸಾಧನೆ ಮಾಡಿದ್ದರು. ಪಾಕಿಸ್ತಾನದ ಆಟಗಾರ್ತಿಯರಾದ ಅಲಿಯಾ ರಿಯಾಜ್ (2018), ಫಾತಿಮಾ ಸನಾ (2026), ಮತ್ತು ಸಾದಿಯಾ ಇಕ್ಬಾಲ್ (2026) ಶ್ರೇಯಾಂಕದಲ್ಲಿ ನಂತರದ ಸ್ಥಾನದಲ್ಲಿದ್ದಾರೆ. ಕಳೆದ ವರ್ಷದ ಮಹಿಳಾ ಏಕದಿನ ವಿಶ್ವಕಪ್‌ನಲ್ಲಿ ಒಂಬತ್ತು ಪಂದ್ಯಗಳಲ್ಲಿ 14 ವಿಕೆಟ್‌ಗಳನ್ನು ಕಬಳಿಸುವ ಮೂಲಕ ಚರಣಿ ಭಾರತದ ಯಶಸ್ಸಿನಲ್ಲಿ ಪ್ರಮುಖ ಪಾತ್ರ ವಹಿಸಿದ್ದರು.

ರಾಧಾ ಯಾದವ್ (28ಕ್ಕೆ3), ಶ್ರೀಚರಣಿ (2/21) ಅವರ ಅದ್ಭುತ ಪ್ರದರ್ಶನ ಮತ್ತು ಶಫಾಲಿ ವರ್ಮಾ (34 ಎಸೆತಗಳಲ್ಲಿ 8 ಬೌಂಡರಿ ಮತ್ತು ಒಂದು ಸಿಕ್ಸ್ ಸೇರಿದಂತೆ 53) ಅವರ ಸ್ಫೋಟಕ ಅರ್ಧಶತಕದ ಮೂಲಕ ಭಾರತ ಬಾಂಗ್ಲಾದೇಶದ ವಿರುದ್ಧ 5 ವಿಕೆಟ್‌ಗಳ ಜಯ ಸಾಧಿಸಿತು. ಮೊದಲು ಬ್ಯಾಟಿಂಗ್ ಮಾಡಿದ ಬಾಂಗ್ಲಾದೇಶ ನಿಗದಿತ 20 ಓವರ್‌ಗಳಲ್ಲಿ 8 ವಿಕೆಟ್‌ಗಳಿಗೆ 136 ರನ್ ಗಳಿಸಿತು. ಜೋತಿ ರಿತು ಮೋನಿ (31 ಎಸೆತಗಳಲ್ಲಿ 5 ಬೌಂಡರಿಗಳೊಂದಿಗೆ 33), ನಿಗರ್ ಸುಲ್ತಾನ (27 ಎಸೆತಗಳಲ್ಲಿ 4 ಬೌಂಡರಿಗಳೊಂದಿಗೆ 32), ಮತ್ತು ಶೋಭನಾ ಮೋಸ್ಟಾರಿ (26 ಎಸೆತಗಳಲ್ಲಿ 2 ಬೌಂಡರಿಗಳೊಂದಿಗೆ 22) ಗರಿಷ್ಠ ಸ್ಕೋರರ್‌ಗಳಾದರು.

ಭಾರತವು 16.5 ಓವರ್‌ಗಳಲ್ಲಿ 5 ವಿಕೆಟ್‌ಗೆ 139 ರನ್ ಗಳಿಸಿ ಸುಲಭವಾಗಿ ಗುರಿಯನ್ನು ತಲುಪಿತು. ಶಫಾಲಿ ವರ್ಮಾ ಅವರೊಂದಿಗೆ, ಯಾಸ್ತಿಕಾ ಭಾಟಿಯಾ (18 ಎಸೆತಗಳಲ್ಲಿ 3 ಬೌಂಡರಿಗಳೊಂದಿಗೆ 23) ಮತ್ತು ಜೆಮಿಮಾ ರೋಡ್ರಿಗಸ್ (15 ಎಸೆತಗಳಲ್ಲಿ 3 ಬೌಂಡರಿ ಮತ್ತು ಒಂದು ಸಿಕ್ಸ್‌ನೊಂದಿಗೆ 26) ಅಮೂಲ್ಯ ರನ್‌ಗಳ ಕೊಡುಗೆ ನೀಡಿದರು. ಬಾಂಗ್ಲಾದೇಶದ ಬೌಲರ್‌ಗಳಲ್ಲಿ ರಿತು ಮೋನಿ ಎರಡು ವಿಕೆಟ್ ಪಡೆದರೆ, ಮರುಫಾ ಅಖ್ತರ್, ರಬೇಯಾ ಖಾನ್ ಮತ್ತು ನಹಿದಾ ಅಖ್ತರ್ ತಲಾ ಒಂದು ವಿಕೆಟ್ ಪಡೆದರು. ಟೀಮ್ ಇಂಡಿಯಾ ನಾಲ್ಕು ಪಂದ್ಯಗಳಲ್ಲಿ ಮೂರು ಗೆಲುವುಗಳೊಂದಿಗೆ ಗುಂಪು 1ರಲ್ಲಿ ಎರಡನೇ ಸ್ಥಾನದಲ್ಲಿ ಮುಂದುವರೆದಿದೆ.