ಅಂದು ಅವರಿಬ್ಬರೂ ಒಟ್ಟಿಗೆ ಸಾಮಾಜಿಕ ಮಾಧ್ಯಮದಲ್ಲಿ ಹೇಳಿಕೆ ನೀಡಿದ್ದರು. “18 ವರ್ಷಗಳ ಕಾಲ ನಾವು ಸ್ನೇಹಿತರಾಗಿ, ದಂಪತಿಗಳಾಗಿ, ಪೋಷಕರಾಗಿ ಜೀವನವನ್ನು ಕಳೆದಿದ್ದೇವೆ. ಈ ಪಯಣವು ಬೆಳವಣಿಗೆ, ಅರ್ಥಮಾಡಿಕೊಳ್ಳುವಿಕೆ, ಹೊಂದಿಕೊಳ್ಳುವಿಕೆ ಮತ್ತು ಬದಲಾವಣೆಗಳಿಂದ ಕೂಡಿತ್ತು. ಈಗ ನಮ್ಮ ದಾರಿಗಳು ಬೇರೆ ಬೇರೆಯಾಗಿವೆ. ನಾವು ದಂಪತಿಗಳಾಗಿ ಬೇರ್ಪಡುವ ನಿರ್ಧಾರಕ್ಕೆ ಬಂದಿದ್ದೇವೆ. ನಮ್ಮನ್ನು ವ್ಯಕ್ತಿಗಳಾಗಿ ಅರ್ಥಮಾಡಿಕೊಳ್ಳುವ ಸಮಯ ಬೇಕು. ದಯವಿಟ್ಟು ನಮ್ಮ ನಿರ್ಧಾರವನ್ನು ಗೌರವಿಸಿ ಮತ್ತು ಖಾಸಗಿತನಕ್ಕೆ ಬೆಲೆ ಕೊಡಿ” ಎಂದು ಮನವಿ ಮಾಡಿಕೊಂಡಿದ್ದರು.

2024ರಲ್ಲಿ ಅವರು ಚೆನ್ನೈ ಕುಟುಂಬ ನ್ಯಾಯಾಲಯದಲ್ಲಿ ಪರಸ್ಪರ ಸಮ್ಮತಿಯಿಂದ ವಿಚ್ಛೇದನಕ್ಕೆ ಅರ್ಜಿ ಸಲ್ಲಿಸಿದ್ದರು. ನವೆಂಬರ್ 27, 2024ರಂದು ನ್ಯಾಯಾಲಯವು ಅವರ ವಿಚ್ಛೇದನವನ್ನು ಅನುಮೋದಿಸಿತು. ಈಗ ಅವರು ಕಾನೂನುಬದ್ಧವಾಗಿ ಬೇರೆಯಾಗಿದ್ದಾರೆ. ಆದರೆ ಮಕ್ಕಳ ವಿಷಯದಲ್ಲಿ ಇಬ್ಬರೂ ಒಟ್ಟಿಗೆ ಪ್ಲಾನ್ ಮಾಡಿದ್ದಾರೆ. ಮಕ್ಕಳಿಗೆ ಉತ್ತಮ ಜೀವನ ಕೊಡುವುದು ಅವರ ಆದ್ಯತೆ ಎಂದು ಹೇಳಲಾಗುತ್ತದೆ. ವಿಚ್ಛೇದನದ ನಂತರವೂ ಅವರ ನಡುವೆ ಯಾವುದೇ ಕಹಿ ಇಲ್ಲ. ಮುಖ್ಯ ಕಾರ್ಯಕ್ರಮಗಳಲ್ಲಿ ಒಟ್ಟಿಗೆ ಕಾಣಿಸಿಕೊಳ್ಳುತ್ತಾರೆ. ಒಬ್ಬರ ಕೆಲಸವನ್ನು ಇನ್ನೊಬ್ಬರು ಪ್ರಶಂಸಿಸುತ್ತಾರೆ.

ಇನ್ನು ಡಿವೋರ್ಸ್‌ ಆಗುತ್ತಿದ್ದಂತೆ ಹಲವು ನಟಿಯರ ಜೊತೆ ಧನುಷ್ ಹೆಸರು ಥಳುಕು ಹಾಕಿಕೊಂಡಿತ್ತು. ತಮಿಳಿನ ಖ್ಯಾತ ನಟಿಯರ ಜೊತೆ ಧನುಷ್ ಹೆಸರು ಕೇಳಿ ಬಂದಿದ್ದು, ಇದೇ ಕಾರಣಕ್ಕೆ ಐಶ್ವರ್ಯಾ ರಜನಿಕಾಂತ್ ಡಿವೋರ್ಸ್‌ ನೀಡಿದ್ರು ಎನ್ನುವಂತ ಅಂತೆ ಕಂತೆಗಳು ಕೇಳಿ ಬಂದಿದ್ದವು.

ಆದರೆ ಕೆಲವು ವರದಿಗಳ ಪ್ರಕಾರ, ದನುಷ್ ಅವರು ಬಹಳ ವರ್ಕಹಾಲಿಕ್ ಎನ್ನಲಾಗಿದೆ. ಅವರು ನಿರಂತರವಾಗಿ ಚಿತ್ರಗಳಲ್ಲಿ ನಟಿಸುತ್ತಾ, ಹೊರಗಡೆ ಶೂಟಿಂಗ್‌ಗಳಿಗೆ ಹೋಗುತ್ತಾ, ಪ್ರಯಾಣ ಮಾಡುತ್ತಾ ಇದ್ದರು. ಇದರಿಂದ ಕುಟುಂಬ ಜೀವನಕ್ಕೆ ಸಮಯ ಕೊಡುವುದು ಕಡಿಮೆಯಾಯಿತು ಎಂದು ಹೇಳಲಾಗುತ್ತದೆ. ಕೆಲವು ಸಂದರ್ಭಗಳಲ್ಲಿ ಜಗಳ ಬಂದಾಗ ದನುಷ್ ಮತ್ತೊಂದು ಸಿನಿಮಾದಲ್ಲಿ ತೊಡಗಿಕೊಳ್ಳುತ್ತಿದ್ದರು ಎನ್ನುವ ವರದಿಗಳಿವೆ. ಹೀಗೆ ನಿಧಾನವಾಗಿ ಅವರ ನಡುವಿನ ಸಂಬಂಧವು ದೂರವಾಯಿತು ಎಂದು ತಿಳಿದುಬಂದಿದೆ. ಇದೊಂದೇ ಕಾರಣ ಹೊರತು, ಬೇರೆ ನಟಿಯರು ಅಥವಾ ಮೂರನೇ ಸಂಬಂಧ ಕಾರಣವಲ್ಲ ಅಂತಿದ್ದಾರೆ ಅವರ ಆಪ್ತರು.