ಭಾರತಿರಾಜ ಅವರ ದೈಹಿಕ ಆರೋಗ್ಯ ಹದಗೆಡಲು ಕೇವಲ ವಯಸ್ಸು ಮಾತ್ರ ಕಾರಣವಲ್ಲ, ಅದಕ್ಕಿಂತ ದೊಡ್ಡದೊಂದು ಮಾನಸಿಕ ಆಘಾತ ಅವರನ್ನು ಕಾಡಿತ್ತು. 2025ರಲ್ಲಿ ಅವರ ಮಗ, ನಟ ಮತ್ತು ನಿರ್ದೇಶಕ ಮನೋಜ್‌ ಭಾರತಿರಾಜ ಅವರು ಕೇವಲ 48ನೇ ವಯಸ್ಸಿನಲ್ಲಿ ಹಾರ್ಟ್‌ ಅಟ್ಯಾಕ್‌ (Cardiac Arrest) ನಿಂದ ಸಾವನ್ನಪ್ಪಿದ್ದರು.

ಭಾರತಿರಾಜ ಅವರನ್ನು ತಮಿಳು ಚಿತ್ರರಂಗದಲ್ಲಿ ‘ಇಯಕ್ಕುನರ್ ಇಮಯಂ’ ಅಂದರೆ ‘ನಿರ್ದೇಶಕರ ಶಿಖರ’ ಎಂದೇ ಕರೆಯಲಾಗುತ್ತಿತ್ತು. 1941ರಲ್ಲಿ ಜನಿಸಿದ ಇವರು, 1977ರಲ್ಲಿ ’16 ವಯದಿನಿಲೆ’ (16 Vayathinile) ಎಂಬ ಸಿನಿಮಾದ ಮೂಲಕ ನಿರ್ದೇಶಕರಾಗಿ ಎಂಟ್ರಿ ಕೊಟ್ಟರು. ರಜನಿಕಾಂತ್, ಕಮಲ್ ಹಾಸನ್ ಮತ್ತು ಶ್ರೀದೇವಿ ನಟಿಸಿದ್ದ ಈ ಸಿನಿಮಾ ಇಂಡಿಯನ್ ಸಿನಿಮಾ ಹಿಸ್ಟರಿಯಲ್ಲೇ ಒಂದು ಮೈಲಿಗಲ್ಲು.

ಭಾರತಿರಾಜ ಕೇವಲ ಸಿನಿಮಾಗಳನ್ನು ಮಾಡಲಿಲ್ಲ, ಚಿತ್ರರಂಗಕ್ಕೆ ದೊಡ್ಡ ದೊಡ್ಡ ಸ್ಟಾರ್‌ಗಳನ್ನು ಪರಿಚಯಿಸಿದರು. ನಟಿ ರಾಧಿಕಾ, ರೇವತಿ, ರಾಧಾ, ವಿಜಯಶಾಂತಿ ಹಾಗೂ ನಟ ಕಾರ್ತಿಕ್ ಮುಂತಾದ ಘಟಾನುಘಟಿ ಕಲಾವಿದರನ್ನು ಚಿತ್ರರಂಗಕ್ಕೆ ತಂದ ಕ್ರೆಡಿಟ್ ಇವರಿಗೆ ಸಲ್ಲುತ್ತದೆ. ಕನ್ನಡದ ಖ್ಯಾತ ನಿರ್ದೇಶಕ ಪುಟ್ಟಣ್ಣ ಕಣಗಾಲ್ ಅವರ ಬಳಿ ಸಹಾಯಕ ನಿರ್ದೇಶಕರಾಗಿ ಕೆಲಸ ಮಾಡಿದ್ದ ಭಾರತಿರಾಜ ಅವರಿಗೆ ಕರ್ನಾಟಕದೊಂದಿಗೂ ಉತ್ತಮ ಒಡನಾಟವಿತ್ತು.

‘ಸಿಗಪ್ಪು ರೋಜಾಕ್ಕಳ್’, ‘ಮುದಲ್ ಮರಿಯಾದೈ’, ‘ವೇದಂ ಪುದಿದು’ ನಂತಹ ಕ್ಲಾಸಿಕ್ ಸಿನಿಮಾಗಳನ್ನು ನೀಡಿದ ಇವರಿಗೆ ಭಾರತ ಸರ್ಕಾರ ‘ಪದ್ಮಶ್ರೀ’ ಪ್ರಶಸ್ತಿ ನೀಡಿ ಗೌರವಿಸಿದೆ. ಜೊತೆಗೆ ಆರು ರಾಷ್ಟ್ರ ಪ್ರಶಸ್ತಿಗಳು (National Awards) ಇವರ ಮುಡಿಗೇರಿವೆ. ಇತ್ತೀಚಿನ ದಿನಗಳಲ್ಲಿ ಧನುಷ್ ನಟನೆಯ ‘ತಿರುಚಿತ್ರಾಂಬಲಂ’ ಹಾಗೂ ವಿಜಯಸೇತುಪತಿಯ ‘ಮಹಾರಾಜ’ ಸಿನಿಮಾಗಳಲ್ಲಿ ನಟನಾಗಿಯೂ ಅಭಿಮಾನಿಗಳ ಮನಗೆದ್ದಿದ್ದರು. ಸಿನಿಮಾ ರಂಗದ ಒಂದು ಸುವರ್ಣ ಅಧ್ಯಾಯ ಈಗ ಕೊನೆಯಾಗಿದೆ.