Last Updated:
ಭಾರತದ ಮಹಿಳೆಯರ 4×400 ಮೀಟರ್ ರಿಲೇಯಲ್ಲಿ ಪೂವಮ್ಮ ಚಿನ್ನಕ್ಕೆ ಮುತ್ತಿಟ್ಟಿದ್ದಾರೆ. ಆದ್ರೆ, ರಾಜ್ಯ ಸರ್ಕಾರ ಮಾತ್ರ ಚಿನ್ನದ ಹುಡುಗಿಯನ್ನ ಮರೆತಿದೆ.
ಏಷ್ಯನ್ ಗೇಮ್ಸ್ನಲ್ಲಿ ಕನ್ನಡದ ಕುವರಿ ಪೂವಮ್ಮ (Poovamma) ಚಿನ್ನದ (Gold) ಜೊತೆಗೆ ಬೆಳ್ಳಿ ಪದಕದಲ್ಲಿ ಮುತ್ತಿಕ್ಕಿದ್ದಾರೆ. ಈ ಮೂಲಕ ದೇಶದ ಜೊತೆಗೆ ಕರ್ನಾಟಕದ ಪತಾಕೆಯನ್ನೂ ಹಾರಿಸಿದ್ದಾರೆ. ಆದರೆ, ಸರ್ಕಾರ ಮಾತ್ರ ಸಾಧಕಿಯನ್ನು ಮರೆತಿದೆ.
ಚಿನ್ನದ ಹುಡುಗಿಯನ್ನೇ ಮರೆತ ರಾಜ್ಯ ಸರ್ಕಾರ!
ಪೂವಮ್ಮ, ಅಪ್ಪಟ ಕನ್ನಡತಿ. ಒಮ್ಮೆ ಟ್ರ್ಯಾಕ್ಗೆ ಇಳಿದರೆ ಮಿಂಚಿನಂತೆ ಓಡೋ ಮಾಯಾವಿ. ಇವರ ಓಟದ ವೇಗಕ್ಕೆ ಸರಿಸಾಟಿಯೇ ಇಲ್ಲ. ಹೀಗಾಗಿಯೇ ಈ ಬಾರಿಯ ಏಷ್ಯನ್ ಗೇಮ್ಸ್ನಲ್ಲಿ ಕಮಾಲ್ ಮಾಡಿದ್ದಾರೆ. 36 ವರ್ಷದ ಪೂವಮ್ಮ ಭಾರತದ ಮಹಿಳೆಯರ 4×400 ಮೀಟರ್ ರಿಲೇಯಲ್ಲಿ ಚಿನ್ನಕ್ಕೆ ಮುತ್ತಿಟ್ಟಿದ್ದಾರೆ.
ಈ ಮೂಲಕ ಭಾರತದ ಚಿನ್ನದ ಬೇಟೆಗೆ ದೊಡ್ಡ ಉಡುಗೊರೆ ನೀಡಿದ್ದಾರೆ. ಹೀಗಾಗಿ ಇಡೀ ದೇಶವೇ ಸಾಧನೆಯನ್ನು ಕೊಂಡಾಡುತ್ತಿದೆ. ಆದರೆ, ರಾಜ್ಯ ಸರ್ಕಾರ ಮಾತ್ರ ಚಿನ್ನದ ಹುಡುಗಿಯನ್ನು ಮರೆತಿದೆ. ಸರ್ಕಾರದ ಕಡೆಯಿಂದ ಕನಿಷ್ಠ ಅಭಿನಂದನೆ ಸಿಗಲಿಲ್ಲ ಅನ್ನೋದು ಪೂವಮ್ಮ ಕುಟುಂಬಸ್ಥರಿಗೆ ನೋವುಂಟು ಮಾಡಿದೆ.
ಪೂವಮ್ಮನ ಪದಕ ಬೇಟೆ ಭರ್ಜರಿಯಾಗಿ ಸಾಗಿದೆ. ಮಿಕ್ಸ್ಡ್ ರಿಲೇಯಲ್ಲೂ ಪೂವಮ್ಮ ಬೆಳ್ಳಿ ಪದಕ ಗೆದ್ದಿದ್ದಾರೆ. ಈ ಮೂಲಕ ಚಿನ್ನದ ಜೊತೆಗೆ ಬೆಳ್ಳಿಯನ್ನೂ ಬಾಚಿಕೊಂಡಿದ್ದಾರೆ. ಸತತವಾಗಿ ಏಷ್ಯನ್ ಗೇಮ್ಸ್ನಲ್ಲಿ ಪದಕ ಜಯಿಸುವುದರ ಜೊತೆಗೆ 3 ಒಲಿಂಪಿಕ್ಸ್ಗಳಲ್ಲಿ ದೇಶವನ್ನು ಪ್ರತಿನಿಧಿಸಿದ ಹೆಗ್ಗಳಿಕೆ ಇವರದ್ದು. ಇಷ್ಟೆಲ್ಲಾ ಸಾಧನೆ ಮಾಡಿದರೂ ಯಾರೊಬ್ಬರೂ ಸ್ಮರಿಸೋ ಕೆಲಸ ಮಾಡಿಲ್ಲ. ಒಟ್ಟಿನಲ್ಲಿ ಕನ್ನಡದ ಸಾಧಕಿಯ ಸಾಧನೆಯನ್ನು ಕೊಂಡಾಡೋ ಕೆಲಸ ಆಗಬೇಕು. ಈಗಲಾದರೂ ಹೆಮ್ಮೆಯ ಪೂವಮ್ಮಗೆ ಒಂದೊಳ್ಳೆ ಸ್ವಾಗತ ಕೋರೋ ಕೆಲಸ ಮಾಡಬೇಕಿದೆ.
(ವರದಿ: ಕಿಶನ್ ಶೆಟ್ಟಿ, ನ್ಯೂಸ್18 ಕನ್ನಡ, ಮಂಗಳೂರು)
