ಜಿಲ್ಲಾ ಪಂಚಾಯತ್ ಅಧ್ಯಕ್ಷೆ ಸೇರಿದಂತೆ ಐದು ಜನರು ಕಾರಿನಲ್ಲಿದ್ದರು. ಅಪಘಾತದ ನಂತರ ಎಲ್ಲರೂ ಕಾರಿನೊಳಗೆ ಸಿಲುಕಿಕೊಂಡಿದ್ದರು. ಈ ಸಮಯದಲ್ಲಿ ಹಾದುಹೋಗುತ್ತಿದ್ದ ಕಾನ್‌ಸ್ಟೆಬಲ್ ಅಮಿತ್ ತೆವಾಟಿಯಾ ಮತ್ತು ಅವರ ಪತ್ನಿ ಅರ್ಚನಾ ಸಿಂಗ್ ತಕ್ಷಣ ವಾಹನ ನಿಲ್ಲಿಸಿ ರಕ್ಷಣಾ ಕಾರ್ಯಾಚರಣೆಯನ್ನು ನಡೆಸಿದ್ದಾರೆ.

ಈ ಕಾನ್‌ಸ್ಟೆಬಲ್ ಅಮಿತ್ ತೆವಾಟಿಯಾ ಮತ್ತು ಅವರ ಪತ್ನಿ ಅರ್ಚನಾ ಸಿಂಗ್ ಅವರ ತ್ವರಿತ ಕ್ರಮದಿಂದ ಐದು ಜನರನ್ನು ಕಾರಿನಿಂದ ಹೊರತೆಗೆಯಲು ಸಾಧ್ಯವಾಯಿತು. ಘಟನೆಯ ವಿಡಿಯೋ ಕೂಡ ಈಗ ವೈರಲ್​ ಆಗಿದೆ. ವರದಿಗಳ ಪ್ರಕಾರ ಉಷಾ ಸಿಂಗ್ ಫಾರ್ಚೂನರ್‌ನಲ್ಲಿ ಲಕ್ನೋದಿಂದ ನೋಯ್ಡಾಗೆ ಪ್ರಯಾಣಿಸುತ್ತಿದ್ದರು. ಸುಲ್ತಾನ್‌ಪುರದ ಧನಪತ್‌ಗಂಜ್ ನಿವಾಸಿ ವಿಕಾಸ್ ಯಾದವ್ ಕಾರನ್ನು ಚಲಾಯಿಸುತ್ತಿದ್ದರು. ಜಿಲ್ಲಾ ಪಂಚಾಯತ್ ಅಧ್ಯಕ್ಷೆ ಉಷಾ ಸಿಂಗ್, ಲಖಿಂಪುರ ನಿವಾಸಿ ಆಯುಷ್ ವರ್ಮಾ, ಗನ್ನರ್ ಹೆಡ್ ಕಾನ್ಸ್‌ಟೇಬಲ್ ಅರವಿಂದ್ ಕುಮಾರ್ ಮತ್ತು ನೋಯ್ಡಾ ನಿವಾಸಿ ಗೀತಾಂಜಲಿ ಸಿಂಗ್ ಕೂಡ ಕಾರಿನಲ್ಲಿದ್ದರು.

ಫಾರ್ಚೂನರ್ ಪಲ್ಟಿಯಾಗಿ ಅದರಲ್ಲಿದ್ದವರು ಸಿಲುಕಿಕೊಂಡಿದ್ದು, ಕಾರಿನ ಬಾಗಿಲುಗಳು ತೆರೆಯಲು ಸಾಧ್ಯವಾಗುತ್ತಿರಲಿಲ್ಲ. ಈ ಸಮಯದಲ್ಲಿ ಸೌರಿಖ್‌ನಿಂದ ಕನ್ನೌಜ್‌ಗೆ ಪ್ರಯಾಣಿಸುತ್ತಿದ್ದ ಕಾನ್‌ಸ್ಟೆಬಲ್ ಅಮಿತ್ ತೆವಾಟಿಯಾ ಮತ್ತು ಅವರ ಪತ್ನಿ ಅರ್ಚನಾ ಸಿಂಗ್ ಪಲ್ಟಿಯಾಗಿದ್ದ ಕಾರನ್ನು ಗಮನಿಸಿದರು. ಅವರು ತಮ್ಮ ವಾಹನವನ್ನು ನಿಲ್ಲಿಸಿ ತಡಮಾಡದೆ ಸ್ಥಳಕ್ಕೆ ಧಾವಿಸಿದರು. ಕಾರಿನೊಳಗೆ ಜನರು ಸಿಲುಕಿಕೊಂಡಿರುವುದನ್ನು ನೋಡಿ ಅವರು ರಕ್ಷಣಾ ಕಾರ್ಯಾಚರಣೆಯನ್ನು ಪ್ರಾರಂಭಿಸಿದರು. ಗಾಜು ಒಡೆದು, ನಂತರ ಸಿಕ್ಕಿಬಿದ್ದ ಜನರನ್ನು ಹೊರತೆಗೆದಿದ್ದಾರೆ. ಅರ್ಚನಾ ಸಿಂಗ್ ಕೂಡ ರಕ್ಷಣಾ ಕಾರ್ಯದಲ್ಲಿ ಸಹಾಯ ಮಾಡಿದರು ಮತ್ತು ಅಪಘಾತದ ಬಗ್ಗೆ ಪೊಲೀಸ್ ನಿಯಂತ್ರಣ ಕೊಠಡಿಗೆ ಮಾಹಿತಿ ನೀಡಿದರು. ಶೀಘ್ರದಲ್ಲೇ ಆಂಬ್ಯುಲೆನ್ಸ್, ಪೊಲೀಸ್ ಠಾಣೆ ಮತ್ತು ಯುಪಿಡಿಎ ತಂಡ ಸ್ಥಳಕ್ಕೆ ಬಂದಿತು.

ರಕ್ಷಣಾ ಕಾರ್ಯಾಚರಣೆಯ ನಂತರ ಗಾಯಾಳುಗಳನ್ನು ಚಿಕಿತ್ಸೆಗಾಗಿ ಆಸ್ಪತ್ರೆಗೆ ಕಳುಹಿಸಲಾಗಿದೆ. ಉಷಾ ಸಿಂಗ್ ಸೇರಿದಂತೆ ಮೂವರು ಗಾಯಾಳುಗಳನ್ನು ತಿರ್ವಾ ವೈದ್ಯಕೀಯ ಕಾಲೇಜಿಗೆ ಕಳುಹಿಸಲಾಗಿದೆ. ಇತರ ಗಾಯಾಳುಗಳಿಗೂ ಚಿಕಿತ್ಸೆ ನೀಡಲಾಗಿದೆ. ಅಪಘಾತದ ನಂತರ ಎಕ್ಸ್‌ಪ್ರೆಸ್‌ವೇಯಲ್ಲಿ ಸ್ವಲ್ಪ ಸಮಯದವರೆಗೆ ಅವ್ಯವಸ್ಥೆ ನೆಲೆಸಿತ್ತು. ಇಡೀ ಘಟನೆಯ ವಿಡಿಯೋ ಸಾಮಾಜಿಕ ಮಾಧ್ಯಮದಲ್ಲಿ ಕಾಣಿಸಿಕೊಂಡ ನಂತರ ಕಾನ್‌ಸ್ಟೆಬಲ್ ಅಮಿತ್ ತೆವಾಟಿಯಾ ಮತ್ತು ಅವರ ಪತ್ನಿ ಅರ್ಚನಾ ಸಿಂಗ್ ಅವರ ತ್ವರಿತಗತಿಯ ಬಗ್ಗೆ ವ್ಯಾಪಕ ಚರ್ಚೆ ನಡೆಯುತ್ತಿದೆ.