ಬಿಸಿಸಿಐ ನಡೆಸುವ ಐಪಿಎಲ್ ಪ್ರತಿ ವರ್ಷವೂ ತನ್ನ ಆದಾಯವನ್ನು ತುಂಬಾ ಹೆಚ್ಚಿಸಿಕೊಳ್ಳುತ್ತಿದೆ. ಇಂದು ಇದು ಕ್ರಿಕೆಟ್‌ನಲ್ಲಷ್ಟೇ ಅಲ್ಲ, ಪ್ರಪಂಚದ ಎಲ್ಲಾ ಕ್ರೀಡೆಗಳಲ್ಲಿ ಎರಡನೇ ಅತಿ ಮೌಲ್ಯಯುತ ಲೀಗ್ ಆಗಿದೆ. ಆದಾಯ ಮತ್ತು ಬ್ರಾಂಡ್ ಮೌಲ್ಯದಲ್ಲಿ ಅಮೆರಿಕದ ಎನ್‌ಎಫ್‌ಎಲ್ ಮಾತ್ರ ಐಪಿಎಲ್‌ಗಿಂತ ಮುಂದಿದೆ. ಐಪಿಎಲ್‌ನ ಯಶಸ್ಸನ್ನು ನೋಡಿ ಪಾಕಿಸ್ತಾನ, ಬಾಂಗ್ಲಾದೇಶ, ಆಸ್ಟ್ರೇಲಿಯಾ, ಇಂಗ್ಲೆಂಡ್, ದಕ್ಷಿಣ ಆಫ್ರಿಕಾ ಮತ್ತು ನೇಪಾಳದಂತಹ ಅನೇಕ ದೇಶಗಳು ತಮ್ಮದೇ ಟಿ20 ಲೀಗ್‌ಗಳನ್ನು ಪ್ರಾರಂಭಿಸಿವೆ.

ಐಪಿಎಲ್ ನಂತರ ಬಿಬಿಎಲ್, ಸಿಪಿಎಲ್ ಮತ್ತು ಎಸ್‌ಎ 20 ಮುಂತಾದ ಲೀಗ್‌ಗಳು ಜಗತ್ತಿನಲ್ಲಿ ಬಹಳ ಜನಪ್ರಿಯವಾಗಿವೆ. ಆದರೆ ಆದಾಯದಲ್ಲಿ ಎರಡನೇ ಸ್ಥಾನ ಯಾವುದಕ್ಕೆ ಸೇರಿದೆ ಎಂದು ತಿಳಿದರೆ ಆಶ್ಚರ್ಯವಾಗುತ್ತದೆ. ಹೆಚ್ಚಿನವರು ಪಿಎಸ್‌ಎಲ್ ಅಥವಾ ಬಿಬಿಎಲ್ ಎಂದು ಭಾವಿಸುತ್ತಾರೆ. ನಿಜವಾದ ಸತ್ಯವೇನೆಂದರೆ, ಇಂಗ್ಲೆಂಡ್‌ನ ‘ದಿ ಹಂಡ್ರೆಡ್’ ಲೀಗ್ ವಿಶ್ವದ ಎರಡನೇ ಅತಿ ಶ್ರೀಮಂತ ಕ್ರಿಕೆಟ್ ಲೀಗ್ ಆಗಿದೆ.

ಇಂಗ್ಲೆಂಡ್‌ನ ದಿ ಹಂಡ್ರೆಡ್ ಕ್ರಿಕೆಟ್ ಲೀಗ್‌ನ ಬ್ರಾಂಡ್ ಮೌಲ್ಯ 2024ರಲ್ಲಿ ಸುಮಾರು 610 ಮಿಲಿಯನ್ ಡಾಲರ್ ಇತ್ತು. ಆದರೆ ಇಂಗ್ಲೆಂಡ್ ಮತ್ತು ವೇಲ್ಸ್ ಕ್ರಿಕೆಟ್ ಮಂಡಳಿ (ECB) ತಂಡಗಳ ಷೇರುಗಳನ್ನು ಮಾರಾಟಕ್ಕೆ ಇಟ್ಟ ನಂತರ ಪರಿಸ್ಥಿತಿ ಬದಲಾಯಿತು.  ಮುಂಬೈ ಇಂಡಿಯನ್ಸ್, ಡೆಲ್ಲಿ ಕ್ಯಾಪಿಟಲ್ಸ್ ಮತ್ತು ಸನ್‌ರೈಸರ್ಸ್ ಹೈದರಾಬಾದ್‌ನಂತಹ ಐಪಿಎಲ್ ತಂಡಗಳ ಮಾಲೀಕರು ಇದರಲ್ಲಿ ಹೆಚ್ಚು ಹೂಡಿಕೆ ಮಾಡಿದ್ದಾರೆ.

ಪಾಕಿಸ್ತಾನ ಸೂಪರ್ ಲೀಗ್ (PSL) ಆದಾಯ ಮತ್ತು ಬ್ರ್ಯಾಂಡ್ ಮೌಲ್ಯದಲ್ಲಿ ಬಹಳ ಹಿಂದಿದೆ. ಪಿಎಸ್​ಎಲ್​ ವ್ಯವಹಾರ ಮೌಲ್ಯ ಕೇವಲ 250 ಮಿಲಿಯನ್ ಡಾಲರ್ (ಸುಮಾರು 2,100 ಕೋಟಿ ರೂಪಾಯಿ). ಇದು ಐಪಿಎಲ್ ಮತ್ತು ದಿ ಹಂಡ್ರೆಡ್​​ಗೆ ಹೋಲಿಸಿದರೆ ತುಂಬಾ ಕಡಿಮೆ. ಇನ್ನೊಂದೆಡೆ, ದಕ್ಷಿಣ ಆಫ್ರಿಕಾದ ಎಸ್​​ಎ 20 ಲೀಗ್ ಉತ್ತಮ ಆರ್ಥಿಕ ಬೆಳವಣಿಗೆ ತೋರಿಸಿದೆ. ಎಸ್​​ಎ20 ಲೀಗ್ 45 ಮಿಲಿಯನ್ ಡಾಲರ್‌ಗಿಂತ ಹೆಚ್ಚು ಲಾಭ ಮಾಡಿ ಅಂತಾರಾಷ್ಟ್ರೀಯ ಲೀಗ್‌ಗಳಲ್ಲಿ ತನ್ನ ಸ್ಥಾನವನ್ನು ಗಟ್ಟಿಗೊಳಿಸಿದೆ ಎಂದು ವರದಿಯಾಗಿದೆ.