ಕಳ್ಳತನ ನಡೆದ ಸ್ಥಳದಿಂದ ತೂತುಕುಡಿ ಜಿಲ್ಲೆಯ ಶ್ರೀವೈಕುಂಡಂವರೆಗೆ ಇರುವ ಸುಮಾರು 160 ಸಿಸಿಟಿವಿ ಕ್ಯಾಮೆರಾಗಳ ದೃಶ್ಯಗಳನ್ನು ಪರಿಶೀಲಿಸಿ ಶಂಕಿತರನ್ನು ಪತ್ತೆಹಚ್ಚಲಾಗಿದೆ. ಈ ವೇಳೆ ಆರೋಪಿಗಳು ಕೆಲವು ಅಚ್ಚರಿ ವಿಚಾರಗಳನ್ನು ಬಾಯಿಬಿಟ್ಟಿದ್ದಾರೆ.

ಈ ಕಳ್ಳತನ ಪ್ರಕರಣ ಸಂಬಂಧ ನಾಲ್ವರನ್ನು ಪೊಲೀಸರು ಬಂಧಿಸಿದ್ದಾರೆ. ಬಂಧಿತರು ಶ್ರೀವೈಕುಂಡಂನ ಸಿ. ಎಸಕಿಪಾಂಡಿ (30), ಮುಕ್ಕುಡಲ್‌ನ ಇ. ಮುರುಗನ್ (28), ಆಲಂಗುಲಂನ ಎಂ. ಮುರುಗೇಶನ್ (30) ಮತ್ತು ತಿಮ್ಮರಾಜಪುರಂನ ಪಿ. ತಂಗಪಾಂಡಿ (39) ಎಂದು ಗುರುತಿಸಲಾಗಿದೆ. ಪೊಲೀಸರ ಪ್ರಕಾರ ಪ್ರಮುಖ ಆರೋಪಿ ಎಸಕಿಪಾಂಡಿ ಒಬ್ಬನೇ ಮನೆಯೊಳಗೆ ನುಗ್ಗಿದ್ದಾನೆ. ಉಳಿದ ಮೂವರು ಬೆಲೆಬಾಳುವ ವಸ್ತುಗಳನ್ನು ವರ್ಗಾಯಿಸಲು ಮತ್ತು ಮಾರಾಟ ಮಾಡಲು ಸಹಾಯ ಮಾಡಿದ್ದರು ಎಂದು ತಿಳಿದುಬಂದಿದೆ.

ಎಸ್‌ಪಿ ಅಂಶುಲ್ ನಗರ್ ಅವರು ಹೇಳುವಂತೆ, ಇವರು ಮೊದಲ ಬಾರಿಗೆ ಕಳ್ಳತನ ಮಾಡಿದವರು ಎನ್ನಲಾಗಿದೆ. ಆರು ತಿಂಗಳ ಕಾಲ ಯೂಟ್ಯೂಬರ್ ಮಧುಮಿತಾ ಅವರ ರೀಲ್‌ಗಳನ್ನು ವೀಕ್ಷಿಸುತ್ತಿದ್ದರು. ಈ ರೀಲ್‌ಗಳಲ್ಲಿ ಕಾಣಿಸಿದ ಮಗುವಿನ ಶಾಲಾ ಬ್ಯಾಗ್‌ನಲ್ಲಿ ಮುದ್ರಿತವಾಗಿದ್ದ ಪ್ರದೇಶದ ಹೆಸರು ಮತ್ತು ಅದರಲ್ಲಿ ಕಂಡು ಬಂದ ಮಗುವಿನ ಐಡಿ ಕಾರ್ಡ್​​ ನೋಡಿ, ಮನೆಯನ್ನು ಗುರುತಿಸಿದ್ದಾರೆ ಎಂದು ತಿಳಿದುಬಂದಿದೆ. ನಂತರ ಸೆಪ್ಟೆಂಬರ್ ಆರಂಭದಿಂದಲೂ ಎಸಕಿಪಾಂಡಿ ದ್ವಿಚಕ್ರ ವಾಹನದಲ್ಲಿ ಮನೆಯನ್ನು ವೀಕ್ಷಿಸುತ್ತಿದ್ದರು. ದಂಪತಿಗಳು ಕಾರಿನಲ್ಲಿ ಹೊರಗೆ ಹೋಗಿದ್ದಾರಾ ಎಂದು ಗಮನಿಸುತ್ತಿದ್ದರು ಎಂದು ಆರೋಪಿಗಳು ಬಾಯಿಬಿಟ್ಟಿದ್ದಾರೆ.

ಮಧುಮಿತಾ ಮತ್ತು ಅವರ ಪತಿ ವಿನೋದ್ ಕುಮಾರ್ ಇತ್ತೀಚೆಗೆ ತಮ್ಮತುಕೋಣಂನಲ್ಲಿ ಐಷಾರಾಮಿ ಮನೆಯನ್ನು ಖರೀದಿಸಿದ್ದರು. ಗುರುವಾರ ಸಂಜೆ ದಂಪತಿ ತಿರುನಲ್ವೇಲಿಗೆ ಹೋಗಿದ್ದರು. ಆ ಸಮಯದಲ್ಲಿ ಎಸಕಿಪಾಂಡಿ ಕಟ್ಟರ್ ಬಳಸಿ ಮನೆಯ ಹಿಂದಿನ ಬಾಗಿಲನ್ನು ಮುರಿದು ಒಳಗೆ ನುಗ್ಗಿ ಮೊದಲ ಮಹಡಿಯಿಂದ ಚಿನ್ನಾಭರಣಗಳನ್ನು ಕದ್ದಿದ್ದಾನೆ. ಪೊಲೀಸರು ಕನ್ಯಾಕುಮಾರಿ ಡಿವೈಎಸ್‌ಪಿ ಆರ್. ಪ್ರಕಾಶ್ ಮತ್ತು ರಾಜಕ್ಕಮಂಗಲಂ ಇನ್‌ಸ್ಪೆಕ್ಟರ್ ಜಯಲಕ್ಷ್ಮಿ ನೇತೃತ್ವದಲ್ಲಿ ಏಳು ವಿಶೇಷ ತಂಡಗಳನ್ನು ರಚಿಸಿದ್ದರು. ಸಿಸಿಟಿವಿ ದೃಶ್ಯಗಳಲ್ಲಿ ಪ್ರಮುಖ ಶಂಕಿತನ ದ್ವಿಚಕ್ರ ವಾಹನವನ್ನು ಗುರುತಿಸಲಾಯಿತು. ಸೋಮವಾರ ರಾತ್ರಿ ಎರುಂಪುಕಾಡುನಲ್ಲಿ ಎಸಕಿಪಾಂಡಿ ಮತ್ತು ಮುರುಗನ್ ಅವರನ್ನು ಬಂಧಿಸಲಾಯಿತು. ಉಳಿದ ಇಬ್ಬರಿಂದ ಚಿನ್ನದ ಆಭರಣಗಳನ್ನು ವಶಪಡಿಸಿಕೊಳ್ಳಲಾಗಿದೆ.