ಇಟಲಿ ದೇಶದಲ್ಲಿರುವ ಇನ್ಸ್ಟಿಟ್ಯೂಟ್ ಫಾರ್ ಮಮ್ಮಿ ಸ್ಟಡೀಸ್ ಅಟ್ ಯುರಾಕ್ ರಿಸರ್ಚ್ ಸಂಸ್ಥೆಯ ವಿಜ್ಞಾನಿಗಳು, ಹಿಮದಲ್ಲಿ ಶತಮಾನಗಳ ಕಾಲ ಹೂತು ಹೋಗಿದ್ದ “ಒಟ್ಜಿ ದಿ ಐಸ್ ಮ್ಯಾನ್” ಎಂದು ಕರೆಯಲ್ಪಡುವ ಪ್ರಸಿದ್ಧ ಮಮ್ಮಿಯ ದೇಹದ ಒಳಭಾಗದಲ್ಲಿ ಹಾಗೂ ದೇಹದ ಮೇಲ್ಮೈ ಮೇಲೆ ಸೂಕ್ಷ್ಮವಾಗಿ ಸಂರಕ್ಷಿಸಲ್ಪಟ್ಟಿದ್ದ ಸೂಕ್ಷ್ಮಜೀವಿಗಳಿಂದ ಯೀಸ್ಟ್ ಅನ್ನು ಪ್ರತ್ಯೇಕಿಸಿದ್ದಾರೆ. ಹೀಗೆ ಸಂಗ್ರಹಿಸಿದ ಅತ್ಯಂತ ಹಳೆಯ ಯೀಸ್ಟ್ ತಳಿಯನ್ನು ಮರುಸೃಷ್ಟಿಸಿ, ಅದಕ್ಕೆ ಬೇಕಾದ ಸೂಕ್ತ ವಾತಾವರಣದಲ್ಲಿ ಅಡುಗೆಗೆ ಬಳಸುವ ಹಿಟ್ಟಿನೊಂದಿಗೆ ಮಿಶ್ರಣ ಮಾಡಿ ಅಪರೂಪದ ಸೋರ್ಡೋ ಬ್ರೆಡ್ ಅನ್ನು ಮಾಡಿದ್ದಾರೆ ಎಂದು ವರದಿಯಾಗಿದೆ.

ಎನ್​ಡಿಟಿವಿ ವರದಿ ಮಾಡಿರುವಂತೆ, ಐಸ್ ಮ್ಯಾನ್ ಮಮ್ಮಿಯ ದೇಹದ ಬ್ಯಾಕ್ಟೀರಿಯಾದಿಂದ ಬ್ರೆಡ್ ತಯಾರಿಸುವ ಮೊದಲ ಹಂತದ ಪ್ರಯೋಗವು ಸಂಪೂರ್ಣ ಯಶಸ್ವಿಯಾದ ನಂತರ, ವಿಜ್ಞಾನಿಗಳು ಈಗ ಮತ್ತೊಂದು ವಿಭಿನ್ನ ಪ್ರಯೋಗಕ್ಕೆ ಕೈಹಾಕಿದ್ದಾರೆ. ಅದುವೇ, ಇದೇ ರೀತಿಯ ಪ್ರಾಚೀನ ಯೀಸ್ಟ್ ತಳಿಗಳನ್ನು ಬಳಸಿಕೊಂಡು ಸಾಂಪ್ರದಾಯಿಕ ಶೈಲಿಯ ಮದ್ಯವನ್ನು ತಯಾರಿಸಲು ಸಾಧ್ಯವೇ ಎಂಬ ಬಗ್ಗೆ ಚಿಂತನೆ ನಡೆಸುತ್ತಿದ್ದಾರೆ. ಇದರೊಂದಿಗೆ, ಐದು ಸಾವಿರ ವರ್ಷಗಳ ಹಿಂದೆ ಮಾನವರು ಯಾವ ರೀತಿಯ ಆಹಾರ ಮತ್ತು ಪಾನೀಯಗಳನ್ನು ಸೇವಿಸುತ್ತಿರಬಹುದು ಮತ್ತು ಆಗಿನ ಸೂಕ್ಷ್ಮಜೀವಿಗಳ ಕಾರ್ಯಕ್ಷಮತೆ ಹೇಗಿತ್ತು ಎಂಬುದನ್ನು ಹತ್ತಿರದಿಂದ ತಿಳಿಯಲು ಈ ಮುಂದಿನ ಪ್ರಯೋಗವು ಸಹಾಯ ಮಾಡಲಿದೆ ಎನ್ನಲಾಗಿದೆ.

ಆದಾಗ್ಯೂ ಈ ಸಂಶೋಧನೆಯ ಬಗ್ಗೆ ವಿಜ್ಞಾನಿಗಳು ಒಂದು ಪ್ರಮುಖವಾದ ಸ್ಪಷ್ಟನೆಯನ್ನು ನೀಡಿದ್ದಾರೆ. ಅದರಂತೆ, “ಈ ಮೈಕ್ರೋಆರ್ಗಾನಿಸಂ ಅಥವಾ ಯೀಸ್ಟ್ ಬ್ಯಾಕ್ಟೀರಿಯಾಗಳು ಮೂಲತಃ ಒಟ್ಜಿ ಬದುಕಿದ್ದಾಗ ಅವನ ದೇಹದ ಭಾಗವಾಗಿರಲಿಲ್ಲ ಎಂದು ಅವರು ಬಲವಾಗಿ ನಂಬಿದ್ದಾರೆ. ಒಟ್ಜಿ ಸಾವನ್ನಪ್ಪಿದ ದೀರ್ಘಕಾಲದ ನಂತರ ಕೇವಲ ಅತಿಯಾದ ಶೀತ ವಾತಾವರಣದಲ್ಲಿ ಮಾತ್ರ ಬದುಕಬಲ್ಲ ಇಂತಹ ವಿಶಿಷ್ಟ ಸೂಕ್ಷ್ಮಜೀವಿಗಳು ಪರಿಸರದಿಂದ ಅವನ ದೇಹದೊಳಗೆ ಪ್ರವೇಶಿಸಿರಬಹುದು” ಎಂದು ಅಂದಾಜಿಸಿದ್ದಾರೆ. ಅದರಂತೆ, ಆಲ್ಪ್ಸ್ ಪರ್ವತದ ವಿಪರೀತ ಹಿಮದ ವಾತಾವರಣವು ಈ ಬ್ಯಾಕ್ಟೀರಿಯಾಗಳು ಸಾವಿರಾರು ವರ್ಷಗಳ ಕಾಲ ಸಜೀವವಾಗಿ ಉಳಿಯಲು ರಕ್ಷಣಾ ಕವಚದಂತೆ ಕೆಲಸ ಮಾಡಿದೆ.

ಐಸ್ ಮ್ಯಾನ್ ಒಟ್ಜಿ ಎಂಬುದು ಜಗತ್ತಿನ ಅತ್ಯಂತ ಪ್ರಸಿದ್ಧ ಮತ್ತು ಹಳೆಯ ಸಂರಕ್ಷಿತ ಮಮ್ಮಿಗಳಲ್ಲಿ ಒಂದಾಗಿದೆ. ಇಂದಿಗೆ ಸರಿಸುಮಾರು ಐದು ಸಾವಿರದ ಮುನ್ನೂರು ವರ್ಷಗಳಿಗಿಂತಲೂ ಹೆಚ್ಚು ಕಾಲ ಹಿಮದ ಗಡ್ಡೆಗಳ ಅಡಿಯಲ್ಲಿ ಯಾವುದೇ ಹಾನಿಯಾಗದಂತೆ ನೈಸರ್ಗಿಕವಾಗಿ ಸಂರಕ್ಷಿಸಲ್ಪಟ್ಟಿದ್ದ ಈ ಮಾನವ ದೇಹವನ್ನು 1991 ರಲ್ಲಿ ವಿಜ್ಞಾನಿಗಳು ಪತ್ತೆ ಹಚ್ಚಿದ್ದರು.