Last Updated:
ಒಟ್ಟಿನಲ್ಲಿ, 11,249 ಸರ್ಕಾರಿ ಹುದ್ದೆಗಳಿಗೆ 16.51 ಲಕ್ಷ ಅರ್ಜಿಗಳು ಬಂದಿರುವುದು ಕರ್ನಾಟಕದಲ್ಲಿ ಸರ್ಕಾರಿ ಉದ್ಯೋಗಕ್ಕಾಗಿ ನಡೆಯುತ್ತಿರುವ ಭಾರೀ ಸ್ಪರ್ಧೆಯ ಪ್ರಮಾಣವನ್ನು ತೋರಿಸುತ್ತಿದೆ. ಮುಂದಿನ ಹಂತದಲ್ಲಿ ಮತ್ತಷ್ಟು ಇಲಾಖೆಗಳ ಸಾವಿರಾರು ಹುದ್ದೆಗಳ ಅಧಿಸೂಚನೆ ಹೊರಬರುವ ಸಾಧ್ಯತೆ ಇರುವುದರಿಂದ ಉದ್ಯೋಗಾಕಾಂಕ್ಷಿಗಳ ಗಮನ ಈಗ ಕೆಇಎಯ ಮುಂದಿನ ನೇಮಕಾತಿಗಳತ್ತ ನೆಟ್ಟಿದೆ.
ಬೆಂಗಳೂರು: ಕರ್ನಾಟಕದಲ್ಲಿ ಸರ್ಕಾರಿ ಉದ್ಯೋಗಕ್ಕೆ (Government Job) ಇರುವ ಬೇಡಿಕೆ ಮತ್ತೊಮ್ಮೆ ಎಷ್ಟು ದೊಡ್ಡದಿದೆ ಅನ್ನೋದಕ್ಕೆ ಈ ಅಂಕಿಅಂಶಗಳೇ ಸಾಕ್ಷಿ. ಕರ್ನಾಟಕ ಪರೀಕ್ಷಾ ಪ್ರಾಧಿಕಾರ (KEA) ವಿವಿಧ ಇಲಾಖೆಗಳ 11,249 ಹುದ್ದೆಗಳ ನೇಮಕಾತಿಗೆ ಅರ್ಜಿ ಆಹ್ವಾನಿಸಿದ್ದು, ಬರೋಬ್ಬರಿ 16,51,210 ಅಭ್ಯರ್ಥಿಗಳು ಅರ್ಜಿ ಸಲ್ಲಿಸಿದ್ದಾರೆ. ಅಂದರೆ ಸರಾಸರಿ ಒಂದು ಹುದ್ದೆಗೆ ಸುಮಾರು 147 ಮಂದಿ ಸ್ಪರ್ಧಿಸುತ್ತಿದ್ದಾರೆ. 2026ರ ಜೂನ್ 5ರಿಂದ ಸೆಪ್ಟೆಂಬರ್ 9ರವರೆಗೆ ಕೆಇಎ 15 ಇಲಾಖೆಗಳ ಖಾಲಿ ಹುದ್ದೆಗಳಿಗೆ ನೇಮಕಾತಿ ಅಧಿಸೂಚನೆ ಹೊರಡಿಸಿತ್ತು. ಪೊಲೀಸ್, ಕಂದಾಯ, ತೋಟಗಾರಿಕೆ, ಕಾನೂನು ಹಾಗೂ ನಗರಾಭಿವೃದ್ಧಿ ಸೇರಿದಂತೆ ಹಲವು ಇಲಾಖೆಗಳ ಹುದ್ದೆಗಳು ಇದರಲ್ಲಿ ಸೇರಿವೆ.
11,249 ಹುದ್ದೆಗಳ ಪೈಕಿ ಕಲ್ಯಾಣ ಕರ್ನಾಟಕ ವೃಂದಕ್ಕೆ 2,544 ಹುದ್ದೆಗಳು ಮೀಸಲಾಗಿದ್ದರೆ, ಈ ಹುದ್ದೆಗಳಿಗೆ 3,46,511 ಅರ್ಜಿಗಳು ಬಂದಿವೆ. ಉಳಿದ ಕರ್ನಾಟಕ ವೃಂದದ 8,705 ಹುದ್ದೆಗಳಿಗೆ 13,04,699 ಅರ್ಜಿಗಳು ಸಲ್ಲಿಕೆಯಾಗಿವೆ. ಲೆಕ್ಕ ಹಾಕಿದರೆ ಕಲ್ಯಾಣ ಕರ್ನಾಟಕದ ಹುದ್ದೆಗಳಿಗೆ ಸರಾಸರಿ ಪ್ರತಿ ಹುದ್ದೆಗೆ 136 ಅರ್ಜಿಗಳಿದ್ದರೆ, ಉಳಿದ ಕರ್ನಾಟಕದ ಹುದ್ದೆಗಳಿಗೆ ಈ ಪ್ರಮಾಣ ಸುಮಾರು 150 ಅರ್ಜಿಗಳಷ್ಟಿದೆ.
ಅತಿ ಹೆಚ್ಚು ಅರ್ಜಿ ಬಂದಿರುವುದು ಕಂದಾಯ ಇಲಾಖೆಯ ಗ್ರಾಮ ಆಡಳಿತ ಅಧಿಕಾರಿ (VAO) ಹುದ್ದೆಗಳಿಗೆ. ಕೇವಲ 572 VAO ಹುದ್ದೆಗಳಿಗೆ 4,92,534 ಅರ್ಜಿಗಳು ಬಂದಿವೆ. ಅಂದರೆ ಸರಾಸರಿ ಒಂದು ಹುದ್ದೆಗೆ ಸುಮಾರು 861 ಅಭ್ಯರ್ಥಿಗಳ ಸ್ಪರ್ಧೆ ಇದೆ. ಪೊಲೀಸ್ ಇಲಾಖೆಯ 3,991 ಸಿವಿಲ್ ಪೊಲೀಸ್ ಕಾನ್ಸ್ಟೆಬಲ್ ಹುದ್ದೆಗಳಿಗೆ 4,54,532 ಅರ್ಜಿಗಳು ಬಂದಿವೆ. ಇಲ್ಲಿ ಪ್ರತಿ ಹುದ್ದೆಗೆ ಸುಮಾರು 114 ಅಭ್ಯರ್ಥಿಗಳು ಸ್ಪರ್ಧಿಸುತ್ತಿದ್ದಾರೆ. ಇದೇ ವೇಳೆ ಕರ್ನಾಟಕ ವಸತಿ ಶಿಕ್ಷಣ ಸಂಸ್ಥೆಗಳ ಸಂಘದ (KREIS) ಕೆಲವು ಹುದ್ದೆಗಳಿಗೆ ತುಸು ಕಡಿಮೆ ಅರ್ಜಿಗಳು ಬಂದಿವೆ. 17 Graduate Drawing Teacher ಹುದ್ದೆಗಳಿಗೆ 428 ಅರ್ಜಿಗಳು ಹಾಗೂ 17 Diploma Drawing Teacher ಹುದ್ದೆಗಳಿಗೆ 581 ಅರ್ಜಿಗಳು ಸಲ್ಲಿಕೆಯಾಗಿವೆ.
ಕೆಇಎ ನಡೆಸುವ ಕರ್ನಾಟಕ ರಾಜ್ಯ ಅರ್ಹತಾ ಪರೀಕ್ಷೆ (KSET)ಗೂ ಭಾರೀ ಸ್ಪಂದನೆ ಸಿಕ್ಕಿದೆ. ಕೆಇಎಗೆ 1,27,975 KSET ಅರ್ಜಿಗಳು ಬಂದಿವೆ ಎಂದು ವರದಿ ತಿಳಿಸಿದೆ. ಗಮನಿಸಬೇಕಾದ ಸಂಗತಿ ಎಂದರೆ ಈ ಸಂಖ್ಯೆ 11,249 ಸರ್ಕಾರಿ ಹುದ್ದೆಗಳ ನೇಮಕಾತಿ ಅರ್ಜಿಗಳ ಹೊರತಾದದ್ದು.
ಸರ್ಕಾರಿ ಹುದ್ದೆಗಳಿಗೆ ಇಷ್ಟೊಂದು ಅರ್ಜಿಗಳು ಬರಲು ಹಲವು ವರ್ಷಗಳಿಂದ ದೊಡ್ಡ ಮಟ್ಟದ ನೇಮಕಾತಿ ನಡೆಯದಿರುವುದು ಪ್ರಮುಖ ಕಾರಣಗಳಲ್ಲಿ ಒಂದೆಂದು ಉಲ್ಲೇಖಿಸಲಾಗಿದೆ. 2018ರ ಬಳಿಕ ಸುಮಾರು 15,000 ಪದವೀಧರ ಪ್ರಾಥಮಿಕ ಶಿಕ್ಷಕರು ಹಾಗೂ ಸುಮಾರು 2,500 ಸರ್ಕಾರಿ ಪ್ರಥಮ ದರ್ಜೆ ಕಾಲೇಜು ಸಹಾಯಕ ಪ್ರಾಧ್ಯಾಪಕರ ನೇಮಕಾತಿಯನ್ನು ಹೊರತುಪಡಿಸಿದರೆ, ವಿವಿಧ ಸರ್ಕಾರಿ ಇಲಾಖೆಗಳ ದೊಡ್ಡ ಮಟ್ಟದ ನೇಮಕಾತಿ ಕಡಿಮೆಯಾಗಿತ್ತು. 2020ರಲ್ಲಿ ಕೋವಿಡ್-19 ಸಾಂಕ್ರಾಮಿಕದ ಬಳಿಕ ನೇಮಕಾತಿ ಪ್ರಕ್ರಿಯೆಗಳು ಸ್ಥಗಿತಗೊಂಡಿದ್ದವು. ಆಂತರಿಕ ಮೀಸಲಾತಿ ಸೇರಿದಂತೆ ಕೆಲವು ವಿಷಯಗಳ ಕುರಿತ ನ್ಯಾಯಾಲಯದ ಪ್ರಕರಣಗಳಿಂದಲೂ ಕಳೆದ ಎರಡು-ಮೂರು ವರ್ಷಗಳಲ್ಲಿ ನೇಮಕಾತಿ ವಿಳಂಬವಾಗಿದೆ. ಈ ಹಿನ್ನೆಲೆಯಲ್ಲಿ ಉದ್ಯೋಗಕ್ಕಾಗಿ ಕಾಯುತ್ತಿದ್ದ ಯುವಕರಲ್ಲಿ, ವಿಶೇಷವಾಗಿ ಉತ್ತರ ಕರ್ನಾಟಕದಲ್ಲಿ, ಸರ್ಕಾರಿ ಉದ್ಯೋಗಕ್ಕೆ ಒತ್ತಾಯಿಸಿ ಪ್ರತಿಭಟನೆಗಳೂ ನಡೆದಿದ್ದವು. ನೇಮಕಾತಿ ಪ್ರಕ್ರಿಯೆ ಮತ್ತೆ ಚುರುಕಾದ ಬಳಿಕ ಹೆಚ್ಚಿನ ಸಂಖ್ಯೆಯಲ್ಲಿ ಅರ್ಜಿಗಳು ಸಲ್ಲಿಕೆಯಾಗಿರುವುದಕ್ಕೆ ಇದು ಒಂದು ಪ್ರಮುಖ ಕಾರಣ.
ಉದ್ಯೋಗಕ್ಕಾಗಿ ವರ್ಷಗಳಿಂದ ತಯಾರಿ
