ಐಪಿಎಲ್, ಭಾರತ ಎ ತಂಡಗಳ ಪರ ಆಡಿ ದಾಖಲೆಗಳ ಮೇಲೆ ದಾಖಲೆ ಸೃಷ್ಟಿಸಿದ್ದ ವೈಭವ್ ಮೇಲೆ ಇಡೀ ಕ್ರಿಕೆಟ್ ಜಗತ್ತು ಭಾರೀ ನಿರೀಕ್ಷೆ ಹೊಂದಿತ್ತು. ಎಲ್ಲರ ನಿರೀಕ್ಷೆಯಂತೆ ಮೈದಾನಕ್ಕೆ ಇಳಿದ ವೈಭವ್ 3ನೇ ಎಸೆತದಲ್ಲಿ ಮೊದಲ ರನ್​ಗಳಿಸಿಕೊಂಡರು. 4ನೇ ಎಸೆತದಲ್ಲಿ ಮಾರಕ ವೇಗಿ ಜೋಫ್ರಾ ಆರ್ಚರ್​​ಗೆ ಸಿಕ್ಸರ್​ ಸಿಡಿಸಿ ಸ್ಫೋಟಕ ಇನ್ನಿಂಗ್ಸ್​​ ನಿರೀಕ್ಷೆ ಮೂಡಿಸಿದ್ದರು. 4ನೇ ಓವರ್​​ನಲ್ಲಿ ಜೋಶ್​ ಟಂಗ್ ಬೌಲಿಂಗ್​ನಲ್ಲಿ ಮತ್ತೊಂದು ಸಿಕ್ಸರ್ ಸಿಡಿಸಿದರು. ಆದರೆ 5ನೇ ಓವರ್​​ನಲ್ಲಿ ವಿಲ್​ ಜಾಕ್ಸ್​ ಸ್ಪಿನ್ ಮ್ಯಾಜಿಕ್ ಅರಿಯಲು ವಿಫಲರಾದರು. ದೊಡ್ಡ ಹೊಡೆತದ ಪ್ರಯತ್ನಕ್ಕೆ ಮುಂದಾಗಿ ಸ್ಟಂಪ್ ಔಟ್ ಆದರು.

ತಮ್ಮ ಮೊದಲ ಅಂತಾರಾಷ್ಟ್ರೀಯ ಪಂದ್ಯವನ್ನಾಡಿದ ವೈಭವ್ ಸೂರ್ಯವಂಶಿ ಎಂದಿನಂತೆ ತಾಳ್ಮೆ ಕಳೆದುಕೊಂಡು ಬ್ಯಾಟಿಂಗ್ ಮಾಡಲು ಹೋಗಿ ಕೈಸುಟ್ಟುಕೊಂಡರು. ಆ ಓವರ್​​ನಲ್ಲಿ ಈಗಾಗಲೇ 15 ರನ್​ ಬಂದಿದ್ದರೂ, ಮತ್ತೊಂದು ಸಿಕ್ಸರ್ ಹೊಡೆಯುವ ಯತ್ನದಲ್ಲಿ ಮುನ್ನುಗ್ಗಿದರು. ಆದರೆ ಜಾಕ್ಸ್ ವೈಡ್​ ಯಾರ್ಕರ್ ಮಾಡಿ ಸೂರ್ಯವಂಶಿಯನ್ನ ಸ್ಟಂಪ್ ಬಲೆಗೆ ಬೀಳಿಸಿದರು.​ ಪದಾರ್ಪಣೆ ಪಂದ್ಯದಲ್ಲಿ ಕ್ರೀಸ್‌ನಲ್ಲಿ ಸ್ವಲ್ಪ ಸಮಯ ಕಳೆದು ದೊಡ್ಡ ಇನಿಂಗ್ಸ್ ಆಡುವ ಬದಲು, ಪ್ರತಿ ಎಸೆತವನ್ನೂ ಬೌಂಡರಿಗಟ್ಟುವ ಆತುರದಲ್ಲಿ ವಿಕೆಟ್ ಕಳೆದುಕೊಂಡಿದ್ದಕ್ಕೆ ಅಭಿಮಾನಿಗಳಲ್ಲಿ ತೀವ್ರ ನಿರಾಶೆ ಉಂಟುಮಾಡಿದೆ.

ವೈಭವ್ ಸೂರ್ಯವಂಶಿ ಕೇವಲ 14 ರನ್​ಗಳಿಸಿದರೂ ಮೊದಲ ಪಂದ್ಯದಲ್ಲಿ ಅರ್ಧಶತಕದ ಜೊತೆಯಾಟಕ್ಕೆ ಕಾರಣರಾದರು. ಕಳೆದ ಮೂರು ಪಂದ್ಯಗಳ ಬಳಿಕ ಭಾರತಕ್ಕೆ ಸಿಕ್ಕಂತಹ ಮೊದಲ ಅರ್ಧಶತಕ ಇದಾಗಿದೆ. ವೈಭವ್ ಅಬ್ಬರಿಸುವವರೆಗೂ ಅಭಿಷೇಕ್ ರನ್​ಗಳಿಸಲು ಪರದಾಡಿದ್ದರು. ಆದರೆ ವೈಭವ್ 2 ಸಿಕ್ಸರ್ ಸಿಡಿಸಿದ ಬೆನ್ನಲ್ಲೇ ಆತ್ಮ ವಿಶ್ವಾಸ ಹೆಚ್ಚಿಸಿಕೊಂಡ ಅಭಿಷೇಕ್ ತಮ್ಮ ಲಯಕ್ಕೆ ಮರಳಿದರು. ಆದರೆ ಅವರೂ ಕೂಡ 24 ಎಸೆತಗಳಲ್ಲಿ 8 ಬೌಂಡರಿ, 1 ಸಿಕ್ಸರ್ ಸಹಿತ 43 ರನ್​ಗಳಿಸಿ ವಿಕೆಟ್ ಒಪ್ಪಿಸಿದರು.