Last Updated:
ಅರುಣ್ ಜೇಟ್ಲಿ ಮೈದಾನದಲ್ಲಿ ನಡೆದ ಪಂದ್ಯದಲ್ಲಿ ಟಾಸ್ ಸೋತು ಬ್ಯಾಟಿಂಗ್ ಮಾಡಿದ ರಾಜಸ್ಥಾನ್ ರಾಯಲ್ಸ್ 20 ಓವರ್ಗಳಲ್ಲಿ 8 ವಿಕೆಟ್ ಕಳೆದುಕೊಂಡು 193 ರನ್ಗಳಿಸಿದೆ.
2026ರ ಐಪಿಎಲ್ನ (IPL 2026) 62ನೇ ಪಂದ್ಯದಲ್ಲಿ ರಾಜಸ್ಥಾನ್ ರಾಯಲ್ಸ್ ಹಾಗೂ ಡೆಲ್ಲಿ ಕ್ಯಾಪಿಟಲ್ಸ್ (RR vs DC) ತಂಡಗಳು ಮುಖಾಮುಖಿಯಾಗಿವೆ. ನವದೆಹಲಿಯ ಅರುಣ್ ಜೇಟ್ಲಿ ಮೈದಾನದಲ್ಲಿ ನಡೆದ ಪಂದ್ಯದಲ್ಲಿ ಟಾಸ್ ಸೋತು ಬ್ಯಾಟಿಂಗ್ ಮಾಡಿದ ರಾಜಸ್ಥಾನ್ ರಾಯಲ್ಸ್ 20 ಓವರ್ಗಳಲ್ಲಿ 8 ವಿಕೆಟ್ ಕಳೆದುಕೊಂಡು 193 ರನ್ಗಳಿಸಿದೆ. ವೈಭವ್ ಸೂರ್ಯವಂಶಿ (Vaibhav Sooryavanshi) 46, ಧ್ರುವ್ ಜುರೆಲ್ 53 ಹಾಗೂ ರಿಯಾನ್ ಪರಾಗ್ 51 ರನ್ಗಳಿಸಿ ಸವಾಲಿನ ಮೊತ್ತಕ್ಕೆ ಕಾರಣರಾದರು.
ಟಾಸ್ ಸೋತು ಬ್ಯಾಟಿಂಗ್ಗೆ ಇಳಿದ ರಾಜಸ್ಥಾನ್ ರಾಯಲ್ಸ್ 2ನೇ ಓವರ್ನಲ್ಲಿಯೇ ಯಶಸ್ವಿ ಜೈಸ್ವಾಲ್ (12) ವಿಕೆಟ್ ಕಳೆದುಕೊಂಡಿತು. ಆರಂಭಿಕ ಬ್ಯಾಟ್ಸ್ಮನ್ 9 ಎಸೆತಗಳಲ್ಲಿ 12 ರನ್ಗಳಿಸಿ ಲುಂಗಿ ಎನ್ಗಿಡಿ ಬೌಲಿಂಗ್ನಲ್ಲಿ ವಿಕೆಟ್ ಒಪ್ಪಿಸಿದರು. ಸ್ಫೋಟಕ ಬ್ಯಾಟ್ಸ್ಮನ್ ವೈಭವ್ ಸೂರ್ಯವಂಶಿ 21 ಎಸೆತಗಳಲ್ಲಿ 46 ರನ್ ಗಳಿಸಿ ಅಬ್ಬರಿಸಿದರು. ಸೂರ್ಯವಂಶಿ 2ನೇ ವಿಕೆಟ್ ಜೊತೆಯಾಟದಲ್ಲಿ ಜುರೆಲ್ ಜೊತೆಗೂಡಿ 70 ರನ್ಗಳ ಜೊತೆಯಾಟ ನೀಡಿದರು. ಮಾಧವ್ ತಿವಾರಿ ಸೂರ್ಯವಂಶಿ ವಿಕೆಟ್ ಪಡೆದು ಡೆಲ್ಲಿಗೆ ಬ್ರೇಕ್ ನೀಡಿದರು.
ಸೂರ್ಯವಂಶಿ ವಿಕೆಟ್ ಬಳಿಕ ಬಂದ ನಾಯಕ ರಿಯಾನ್ ಪರಾಗ್ ಕೂಡ ಅಬ್ಬರಿಸಿದರು. ಕೇವಲ 26 ಎಸೆತಗಳಲ್ಲಿ 3 ಬೌಂಡರಿ, 5 ಸಿಕ್ಸರ್ಗಳ ಸಹಿತ 51 ರನ್ಗಳಿಸಿ ತಂಡದ ಮೊತ್ತವನ್ನ ಹೆಚ್ಚಿಸಿದರು. ಆದರೆ ಮಿಚೆಲ್ ಸ್ಟಾರ್ಕ್ 15ನೇ ಓವರ್ನಲ್ಲಿ ಮೂರು ವಿಕೆಟ್ ಪಡೆದು ರಾಜಸ್ಥಾನದ ಬೃಹತ್ ಮೊತ್ತದ ಕನಸಿಗೆ ಭಂಗ ತಂದರು. 15ನೇ ಓವರ್ನ 2ನೇ ಎಸೆತದಲ್ಲಿ ಪರಾಗ್ರನ್ನ ಪೆವಿಲಿಯನ್ಗಟ್ಟಿದ ಸ್ಟಾರ್ಕ್ ನಂತರ 3ನೇ ಎಸೆತದಲ್ಲಿ ಡೊನೊವೆನ್ ಪರೇರಾ(0) ಹಾಗೂ 5ನೇ ಎಸೆತದಲ್ಲಿ ರವಿ ಸಿಂಗ್ (4) ವಿಕೆಟ್ ಪಡೆದರು.
ಅನಂತರ ರಾಜಸ್ಥಾನ್ ರಾಯಲ್ಸ್ ನಿರಂತರವಾಗಿ ವಿಕೆಟ್ ಕಳೆದುಕೊಂಡಿತು. ಶುಭಂ ದುಬೆ 5, ದಾಸುನ್ ಶನಕಾ 8 ಎಸೆತಗಳಲ್ಲಿ 10, ಧ್ರುವ್ ಜುರೆಲ್ 40 ಎಸೆತಗಳಲ್ಲಿ 5 ಬೌಂಡರಿ, 2 ಸಿಕ್ಸರ್ ಸಹಿತ 53 ರನ್ಗಳಿಸಿ 20ನೇ ಓವರ್ನಲ್ಲಿ ಔಟ್ ಆದರು. ಜೋಫ್ರಾ ಆರ್ಚರ್ ಅಜೇಯ 2, ಆ್ಯಡಂ ಮಿಲ್ನೆ ಅಜೇಯ 2 ರನ್ಗಳಿಸಿದರು.
ಡೆಲ್ಲಿ ಕ್ಯಾಪಿಟಲ್ಸ್ ಪರ ಮಿಚೆಲ್ ಸ್ಟಾರ್ಕ್ 40ಕ್ಕೆ4, ಲುಂಗಿ ಎನ್ಗಿಡಿ 24ಕ್ಕೆ2 ಹಾಗೂ 27ಕ್ಕೆ2 ವಿಕೆಟ್ ಪಡೆದರು. ವೈಭವ್ ಮೊದಲು, ನಂತರ ಪರಾಗ ಆಡುವಾಗ ರಾಜಸ್ಥಾನ್ 220-230 ರನ್ಗಳಿಸುವ ಸಾಧ್ಯತೆ ಇತ್ತು. ಆದರೆ 15 ಓವರ್ ಬಳಿಕ ಎಲ್ಲಾ ಲೆಕ್ಕಾಚಾರ ಉಲ್ಟಾ ಆಯಿತು. 15 ಓವರ್ ಇದ್ದಾಗ 166 ರನ್ಗಳಿಸಿದ್ದ ರಾಯಲ್ಸ್ ಮುಂದಿನ ಡೆಲ್ಲಿ ಬೌಲಿಂಗ್ ದಾಳಿಗೆ ಉತ್ತರಿಸಲಾಗದೆ 5 ಓವರ್ಗಳಲ್ಲಿ ಕೇವಲ 27 ರನ್ ಮಾತ್ರ ಸಿಡಿಸಿತು.
