ಶೃಂಗಸಭೆಯಲ್ಲಿ ಮಾತನಾಡಿದ ರಕುಲ್ ಪ್ರೀತ್ ಸಿಂಗ್, ಸುಮಾರು ಎರಡೂವರೆ ವರ್ಷದ ದಾಂಪತ್ಯ ಜೀವನದ ಅನುಭವವನ್ನು ಹಂಚಿಕೊಂಡರು. ಮದುವೆಯಾದ ಬಳಿಕ ಜೀವನದಲ್ಲಿ ಯಾವುದೇ ದೊಡ್ಡ ಬದಲಾವಣೆ ಆಗಿಲ್ಲ ಎಂದು ಅವರು ಹೇಳಿದರು.
ಹೊಸ ಜೀವನದ ಹಂತವನ್ನು ಇಬ್ಬರೂ ಸಹಜವಾಗಿ ಸ್ವೀಕರಿಸಿದ್ದೇವೆ. ನಮ್ಮಿಬ್ಬರಿಗೂ ಯಾವುದೇ ವ್ಯತ್ಯಾಸ ಅನ್ನಿಸಿಲ್ಲ. ಎಲ್ಲವೂ ತುಂಬಾ ಸರಾಗವಾಗಿ ಸಾಗುತ್ತಿದೆ. ಇದು ನಮ್ಮ ಸಂಬಂಧದ ಅತ್ಯುತ್ತಮ ಅಂಶ ಎಂದು ರಕುಲ್ ಹೇಳಿದರು.
ಡೇಟಿಂಗ್ ಆರಂಭಿಸಿದಾಗ ಅವರು ಚಿತ್ರರಂಗದವರೇ ಎಂಬ ಕಾರಣಕ್ಕೆ ಹತ್ತಿರವಾಗಿಲ್ಲ. ಒಂದೇ ರೀತಿಯ ಜೀವನ ಮೌಲ್ಯಗಳು, ಜೀವನಶೈಲಿ ಮತ್ತು ಪರಸ್ಪರ ಅರ್ಥೈಸಿಕೊಳ್ಳುವ ಗುಣವೇ ನಮ್ಮ ಸಂಬಂಧವನ್ನು ಗಟ್ಟಿಗೊಳಿಸಿತು ಎಂದು ತಿಳಿಸಿದರು.
ಇಬ್ಬರೂ ಚಿತ್ರರಂಗದಲ್ಲಿದ್ದರೂ, ವೃತ್ತಿಜೀವನದ ನಿರ್ಧಾರಗಳಲ್ಲಿ ಪರಸ್ಪರ ಹಸ್ತಕ್ಷೇಪ ಮಾಡುವುದಿಲ್ಲ ಎಂದು ರಕುಲ್ ಹೇಳಿದರು.
ಸಿನಿಮಾದ ಹೊರತಾಗಿ ಆರೋಗ್ಯ ಮತ್ತು ವೆಲ್ನೆಸ್ ಕ್ಷೇತ್ರದಲ್ಲಿ ಇಬ್ಬರೂ ಯಶಸ್ವಿಯಾಗಿ ಉದ್ಯಮ ನಡೆಸುತ್ತಿದ್ದಾರೆ ಎಂದು ರಕುಲ್ ಹೇಳಿದರು.
ಇಬ್ಬರ ಜೀವನ ಮೌಲ್ಯಗಳು ಒಂದೇ ಆಗಿರುವ ಕಾರಣ ಹಲವು ಬ್ರ್ಯಾಂಡ್ಗಳನ್ನು ಸಹ-ಸ್ಥಾಪಿಸಿದ್ದೇವೆ. ಆರೋಗ್ಯಕರ ಜೀವನಶೈಲಿಯನ್ನು ಉತ್ತೇಜಿಸುವುದು ನಮ್ಮ ಪ್ರಮುಖ ಗುರಿಯಾಗಿದೆ ಎಂದು ಅವರು ವಿವರಿಸಿದರು.
ರಕುಲ್ ಮತ್ತು ಜಾಕಿ ಸೇರಿ ಆರಂಭಿಸಿರುವ ‘ನಿರ್ವಾಣ’ ವೆಲ್ನೆಸ್ ಕ್ಲಿನಿಕ್ ಈಗ ದಕ್ಷಿಣ ಮುಂಬೈನಲ್ಲಿ ಕಾರ್ಯನಿರ್ವಹಿಸುತ್ತಿದೆ. ವಿಶ್ವದ ವಿವಿಧ ವೆಲ್ನೆಸ್ ಕೇಂದ್ರಗಳಿಗೆ ಭೇಟಿ ನೀಡಿದಾಗ, ಆರೋಗ್ಯ ಸಮಸ್ಯೆಗಳ ಮೂಲ ಕಾರಣವನ್ನು ಪತ್ತೆಹಚ್ಚಿ ಚಿಕಿತ್ಸೆ ನೀಡುವ ವ್ಯವಸ್ಥೆ ತಮ್ಮ ಗಮನ ಸೆಳೆದಿತ್ತು. ಅದೇ ಮಾದರಿಯನ್ನು ಭಾರತದಲ್ಲಿಯೂ ಪರಿಚಯಿಸುವ ಉದ್ದೇಶದಿಂದ ಈ ಕ್ಲಿನಿಕ್ ಆರಂಭಿಸಲಾಯಿತು ಎಂದು ರಕುಲ್ ಹೇಳಿದರು.
ಈ ಕೇಂದ್ರದಲ್ಲಿ ಅಕ್ಯುಪಂಕ್ಚರ್, ಹೈಡ್ರೋಜನ್ ಆಧಾರಿತ ಚಿಕಿತ್ಸೆಗಳು ಹಾಗೂ ರೆಡ್ ಲೈಟ್ ಥೆರಪಿ ಸೇರಿದಂತೆ ಹಲವು ಆರೋಗ್ಯ ಸೇವೆಗಳು ಲಭ್ಯವಿವೆ.
ದೇಹ ಮತ್ತು ಮನಸ್ಸಿನ ಆರೋಗ್ಯದ ಬಗ್ಗೆ ಪ್ರತಿಯೊಬ್ಬರೂ ಹೆಚ್ಚಿನ ಕಾಳಜಿ ವಹಿಸಬೇಕು. ಆರೋಗ್ಯ ಸಮಸ್ಯೆ ಬಂದ ನಂತರ ಚಿಕಿತ್ಸೆ ಪಡೆಯುವುದಕ್ಕಿಂತ, ಮುಂಚಿತವಾಗಿಯೇ ತಡೆಗಟ್ಟುವ ಕ್ರಮಗಳನ್ನು ಅನುಸರಿಸುವುದು ಉತ್ತಮ ಎಂದು ಸಲಹೆ ನೀಡಿದರು.
ವಿದೇಶಗಳಿಗೆ ತೆರಳಿ ದುಬಾರಿ ಚಿಕಿತ್ಸೆ ಪಡೆಯಲು ಎಲ್ಲರಿಗೂ ಸಾಧ್ಯವಿಲ್ಲ. ಅದೇ ಮಟ್ಟದ ಆರೋಗ್ಯ ಸೇವೆಯನ್ನು ಭಾರತದಲ್ಲಿಯೇ ಕೈಗೆಟುಕುವ ದರದಲ್ಲಿ ನೀಡಬೇಕು ಎಂಬುದು ನಮ್ಮ ಉದ್ದೇಶ ಎಂದು ತಿಳಿಸಿದರು.
