ಶೇ. 2 ರಷ್ಟು ಹೊಸ ಸೆಸ್ ಅನ್ನು ತೆಗೆದುಕೊಳ್ಳುವ ಬಗ್ಗೆ ಚಿತ್ರಮಂದಿರ ಮಾಲೀಕರು ಯೋಚಿಸುತ್ತಿರುವುದರಿಂದ ಕರ್ನಾಟಕದ ಚಲನಚಿತ್ರ ಪ್ರೇಕ್ಷಕರು ಟಿಕೆಟ್ ಬೆಲೆಯಲ್ಲಿ ಏರಿಕೆಯನ್ನು ಎದುರಿಸುವ ಸಾಧ್ಯತೆ ಇದೆ.

ನಾವು ಇನ್ನೂ ಎಲ್ಲಾ ಆಯ್ಕೆಗಳನ್ನು ಪರಿಗಣಿಸುತ್ತಿದ್ದೇವೆ. ಎರಡೂ ಆಯ್ಕೆಗಳು (ವೆಚ್ಚವನ್ನು ಭರಿಸುವುದು ಅಥವಾ ಗ್ರಾಹಕರಿಗೆ ವರ್ಗಾಯಿಸುವುದು) ಚರ್ಚೆಯಲ್ಲಿವೆ. ವಿಭಿನ್ನ ಥಿಯೇಟರ್ಸ್ ಬೇರೆ ಬೇರೆ ರೀತಿ ನಿರ್ಧಾರಗಳನ್ನು ತೆಗೆದುಕೊಳ್ಳುವ ಆಯ್ಕೆಯೂ ಇದೆ ಎಂದು ಮಲ್ಟಿಪ್ಲೆಕ್ಸ್ ಅಸೋಸಿಯೇಷನ್ ​​ಆಫ್ ಇಂಡಿಯಾ (MAI) ಅಧ್ಯಕ್ಷ ಕಮಲ್ ಗಿಯಾನ್‌ಚಂದಾನಿ ಮನಿ ಕಂಟ್ರೋಲ್‌ಗೆ ತಿಳಿಸಿದ್ದಾರೆ.

250 ರೂ. ಬೆಲೆಯ ಟಿಕೆಟ್‌ಗೆ, ಸೆಸ್ ಹೆಚ್ಚುವರಿಯಾಗಿ 5 ರೂ.ಗಳಾಗಿರುತ್ತವೆ. ವೈಯಕ್ತಿಕ ಗ್ರಾಹಕರಿಗೆ ಈ ಮೊತ್ತವು ಚಿಕ್ಕದಾಗಿ ಕಾಣಿಸಬಹುದು, ಆದರೆ ಕಾಲಾನಂತರದಲ್ಲಿ ಗಣನೀಯವಾಗಿರಬಹುದು ಎಂದು ಜಿಯಾನ್‌ ಚಂದಾನಿ ಹೇಳಿದರು.

ಸೆಪ್ಟೆಂಬರ್ 24, 2025 ರಂದು ಹೊರಡಿಸಲಾದ ಅಧಿಸೂಚನೆಯಲ್ಲಿ, ಮಲ್ಟಿಪ್ಲೆಕ್ಸ್ ಥಿಯೇಟರ್‌ಗಳು ಸೇರಿದಂತೆ ಸಿನಿಮಾ ಟಿಕೆಟ್‌ಗಳ ಮೇಲಿನ ಶೇಕಡಾ ಎರಡು ರಷ್ಟು ಸೆಸ್ ಅನ್ನು ಕರ್ನಾಟಕ ಚಲನಚಿತ್ರ ಮತ್ತು ಸಾಂಸ್ಕೃತಿಕ ಕಾರ್ಯಕರ್ತರ (ಕಲ್ಯಾಣ) ಕಾಯ್ದೆಯಡಿಯಲ್ಲಿ ಸಂಗ್ರಹಿಸಲಾಗುವುದು ಎಂದು ಸರ್ಕಾರ ತಿಳಿಸಿದೆ.

ಇದು ಚಲನಚಿತ್ರ ಟಿಕೆಟ್‌ಗಳು ಮತ್ತು ಸಬ್​ಸ್ಕ್ರಿಪ್ಶನ್ ಶುಲ್ಕಗಳ ಮೇಲೆ ಶೇಕಡಾ 1-2 ರಷ್ಟು ಸೆಸ್ ಬರುವಂತೆ ಮಾಡುತ್ತದೆ. ಈ ಕ್ರಮವು ಥಿಯೇಟರ್ ಮಾಲೀಕರು ಮತ್ತು ಮಲ್ಟಿಪ್ಲೆಕ್ಸ್ ನಿರ್ವಾಹಕರಲ್ಲಿ ಕಳವಳವನ್ನು ಹುಟ್ಟುಹಾಕಿದೆ.

ಕೊರೋನಾದಿಂದ ಥಿಯೇಟರ್ ಉದ್ಯಮವು ಚೇತರಿಸಿಕೊಳ್ಳಲು ಪ್ರಾರಂಭಿಸುತ್ತಿರುವಾಗ ಹೆಚ್ಚುವರಿ ತೆರಿಗೆಯು ಚಲನಚಿತ್ರ ಪ್ರದರ್ಶನವನ್ನು ಹೆಚ್ಚು ದುಬಾರಿಯಾಗಿಸಬಹುದು. ಇದು ಪ್ರೇಕ್ಷಕರ ಸಂಖ್ಯೆ ಇನ್ನಷ್ಟು ಕಡಿಮೆಗೊಳಿಸಬಹುದು ಎನ್ನಲಾಗುತ್ತಿದೆ.

ಪಿವಿಆರ್ ಐನಾಕ್ಸ್ ಮತ್ತು ಸಿನೆಪೊಲಿಸ್ ಸೇರಿದಂತೆ ಪ್ರಮುಖ ಥಿಯೇಟರ್ ಚೈನ್ಸ್ ಪ್ರತಿನಿಧಿಸುವ ಎಂಎಐ, ಕರ್ನಾಟಕ ಸರ್ಕಾರವನ್ನು ಈ ಸೂಚನೆ ಮರುಪರಿಶೀಲಿಸುವಂತೆ ಒತ್ತಾಯಿಸಿದೆ.

ಸೆಸ್ ವಿಧಿಸುವುದು ಈಗಾಗಲೇ ಶೇಕಡಾ 18 ರಷ್ಟು ಜಿಎಸ್ಟಿ ಪಾವತಿಸುತ್ತಿರುವ ಉದ್ಯಮದ ಮೇಲೆ ತೆರಿಗೆ ಹೊರೆಯನ್ನು ಹೆಚ್ಚಿಸುತ್ತದೆ ಎಂದು ವಾದಿಸಿದೆ. “ಈಗಿನ ಪರಿಸ್ಥಿತಿಯಲ್ಲಿ, ಶೇಕಡಾ 2 ರಷ್ಟು ಸೆಸ್ ಸೆಪ್ಟೆಂಬರ್ 30 ರಿಂದ ಜಾರಿಗೆ ಬರಲಿದೆ” ಎಂದು ಜಿಯಾನ್‌ಚಂದಾನಿ ಹೇಳಿದರು.

“ಸರ್ಕಾರಗಳು ವ್ಯವಹಾರವನ್ನು ಸುಲಭಗೊಳಿಸುವತ್ತ ಗಮನಹರಿಸುತ್ತಿರುವ ಸಮಯದಲ್ಲಿ, ಹೆಚ್ಚುವರಿ ತೆರಿಗೆಯು ಮಾಲೀಕರಿಗೂ ಹೆಚ್ಚು ಕಷ್ಟಕರವಾಗಿಸುತ್ತದೆ ಎಂದಿದೆ. ಸರ್ಕಾರವು ಸೆಪ್ಟೆಂಬರ್ 30 ರಿಂದ ಕಾಯ್ದೆಯನ್ನು ಜಾರಿಗೆ ತರುವ ಗೆಜೆಟ್ ಅಧಿಸೂಚನೆಯನ್ನು ಹೊರಡಿಸಿತು.