Last Updated:
ಮಲ್ಲಮ್ಮ ಸಾಮಾಜಿಕ ಜಾಲತಾಣಗಳಲ್ಲಿ ಮಾಡುವ ವಿಡಿಯೋಗಳು ಮತ್ತು ರೀಲ್ಸ್ ಮೂಲಕ ಗಮನ ಸೆಳೆದಿದ್ದರು. ಅಲ್ಲಿಂದ ಬಿಗ್ ಬಾಸ್ ಕನ್ನಡ ಸೀಸನ್ 12ರ ವೇದಿಕೆಗೆ ಬರುವ ಅವಕಾಶ ಸಿಕ್ಕಿತ್ತು. ಈ ಪಯಣದಲ್ಲಿ ಪಲ್ಲವಿ ಅವರ ಬೆಂಬಲವೂ ಪ್ರಮುಖವಾಗಿತ್ತು.
ಕೆಲವು ಸಂಬಂಧಗಳಿಗೆ ಯಾವುದೇ ರಕ್ತ ಸಂಬಂಧದ ಅಗತ್ಯವಿರುವುದಿಲ್ಲ. ಕಷ್ಟದ ಸಮಯದಲ್ಲಿ ಕೈ ಹಿಡಿದು, ಬದುಕಿಗೆ ಹೊಸ ದಾರಿ ತೋರಿಸಿದ ವ್ಯಕ್ತಿ ಯಾವತ್ತೂ ಮನಸ್ಸಿನಲ್ಲಿ ವಿಶೇಷ ಸ್ಥಾನ ಪಡೆದುಕೊಳ್ಳುತ್ತಾರೆ. ಬಿಗ್ ಬಾಸ್ ಕನ್ನಡ ಸೀಸನ್ 12ರ (Bigg Boss Kannada Season 12) ಮೂಲಕ ರಾಜ್ಯದ ಮನೆಮಾತಾಗಿದ್ದ ಮಲ್ಲಮ್ಮ (Mallamma) ಜೀವನದಲ್ಲೂ ಅಂತಹದ್ದೇ ಒಂದು ಸಂಬಂಧವಿತ್ತು. ಉತ್ತರ ಕರ್ನಾಟಕದಿಂದ ಬೆಂಗಳೂರಿಗೆ ಬಂದಿದ್ದ ಮಲ್ಲಮ್ಮ ಅವರಿಗೆ ಆಶ್ರಯ ನೀಡಿ, ಕೆಲಸದ ಅವಕಾಶ ಕಲ್ಪಿಸಿ, ಬಿಗ್ ಬಾಸ್ ವೇದಿಕೆ ತಲುಪುವವರೆಗೂ ಬೆಂಬಲವಾಗಿ ನಿಂತಿದ್ದ ಉದ್ಯಮಿ ಹಾಗೂ ಫ್ಯಾಷನ್ ಡಿಸೈನರ್ ಪಲ್ಲವಿ ಲಕ್ಷ್ಮೀಕಾಂತ್ ಇದೀಗ ಅಗಲಿದ್ದಾರೆ. ಪಲ್ಲವಿ ಅವರ ನಿಧನದ ಸುದ್ದಿ ತಿಳಿದು ಮಲ್ಲಮ್ಮ ಭಾವುಕರಾಗಿದ್ದಾರೆ.
ಮಲ್ಲಮ್ಮ ಬಿಗ್ ಬಾಸ್ ಕನ್ನಡ ಸೀಸನ್ 12ರಲ್ಲಿ ಮೂರನೇ ಸ್ಪರ್ಧಿಯಾಗಿ ದೊಡ್ಮನೆ ಪ್ರವೇಶಿಸಿದ್ದರು. ತಮ್ಮ ಮುಗ್ಧ ಮಾತು, ಸರಳ ನಡವಳಿಕೆ ಮೂಲಕ ಅವರು ಪ್ರೇಕ್ಷಕರ ಗಮನ ಸೆಳೆದಿದ್ದರು. ಆದರೆ ಬಿಗ್ ಬಾಸ್ ವೇದಿಕೆ ತಲುಪುವ ಮೊದಲು ಮಲ್ಲಮ್ಮ ಅವರ ಬದುಕಿನಲ್ಲಿ ಸಾಕಷ್ಟು ಏಳುಬೀಳುಗಳಿದ್ದವು.
ಉತ್ತರ ಕರ್ನಾಟಕದಿಂದ ಬೆಂಗಳೂರಿಗೆ ಬಂದಿದ್ದ ಮಲ್ಲಮ್ಮ ಅವರಿಗೆ ಪಲ್ಲವಿ ಲಕ್ಷ್ಮೀಕಾಂತ್ ಆಶ್ರಯ ನೀಡಿದ್ದರು. ತಮ್ಮ ರಿಷಿ ಡಿಸೈನ್ ಸಂಸ್ಥೆಯಲ್ಲಿ ಕೆಲಸವನ್ನೂ ಕಲ್ಪಿಸಿದ್ದರು. ಪಲ್ಲವಿ ಅವರು ಮಲ್ಲಮ್ಮ ಅವರನ್ನು ಕೇವಲ ಉದ್ಯೋಗಿಯಂತೆ ನೋಡದೆ, ಕುಟುಂಬದ ಸದಸ್ಯೆಯಂತೆ ಪ್ರೀತಿಯಿಂದ ನೋಡಿಕೊಂಡಿದ್ದರು ಎಂದು ವರದಿಯಾಗಿದೆ.
ಇದೀಗ ಪಲ್ಲವಿ ಲಕ್ಷ್ಮೀಕಾಂತ್ ಅವರ ನಿಧನದ ಸುದ್ದಿ ಮಲ್ಲಮ್ಮ ಅವರಿಗೆ ದೊಡ್ಡ ಆಘಾತ ತಂದಿದೆ. ತಮ್ಮ ಜೀವನದ ಪ್ರಮುಖ ಹಂತಗಳಲ್ಲಿ ಜೊತೆಯಾಗಿ ನಿಂತಿದ್ದ ವ್ಯಕ್ತಿಯನ್ನು ಕಳೆದುಕೊಂಡಿರುವ ನೋವು ಮಲ್ಲಮ್ಮ ಅವರನ್ನು ಕಾಡಿದೆ ಎನ್ನಲಾಗಿದೆ. ಪಲ್ಲವಿ ಅವರನ್ನು ನೆನೆದು ಮಲ್ಲಮ್ಮ ಭಾವುಕರಾಗಿದ್ದಾರೆ.
ಪಲ್ಲವಿ ಲಕ್ಷ್ಮೀಕಾಂತ್ ಅವರು ರಿಷಿ ಡಿಸೈನ್ ಸಂಸ್ಥೆಯ ಮೂಲಕ ವಸ್ತ್ರ ಫ್ಯಾಷನ್ ಡಿಸೈನರ್ ಆಗಿ ಗುರುತಿಸಿಕೊಂಡಿದ್ದರು. ಕನ್ನಡ ಚಿತ್ರರಂಗ ಮತ್ತು ಕಿರುತೆರೆಯ ಹಲವು ನಟ-ನಟಿಯರಿಗೆ ಅವರು ವಸ್ತ್ರ ವಿನ್ಯಾಸ ಮಾಡಿದ್ದರು. ನಟಿ ಕೃಷಿ ತಾಪಂಡ, ಮಧು, ಪ್ರೇಮಾ, ಸಂಗೀತಾ ಭಟ್, ಅನುಪಮಾ ಸೇರಿದಂತೆ ಹಲವು ಕಲಾವಿದರೊಂದಿಗೆ ಅವರು ಕೆಲಸ ಮಾಡಿದ್ದರು ಎಂದು ವರದಿಯಾಗಿದೆ. ಬಿಗ್ ಬಾಸ್ ಕನ್ನಡ ಸೀಸನ್ 13ರ ಸ್ಪರ್ಧಿ ಆಸಿಯಾ ಅವರಿಗೂ ಪಲ್ಲವಿ ವಸ್ತ್ರ ವಿನ್ಯಾಸ ಮಾಡಿಕೊಟ್ಟಿದ್ದರು.
ಪಲ್ಲವಿ ಲಕ್ಷ್ಮೀಕಾಂತ್ ಅವರ ನಿಧನದ ಸುದ್ದಿ ಸೆಪ್ಟೆಂಬರ್ 20ರಂದು ಹೊರಬಂದಿದ್ದು, ಅವರ ನಿಧನಕ್ಕೆ ಚಿತ್ರರಂಗ, ಕಿರುತೆರೆ ಹಾಗೂ ಫ್ಯಾಷನ್ ಕ್ಷೇತ್ರದ ಹಲವರು ಸಂತಾಪ ಸೂಚಿಸಿದ್ದಾರೆ. ಅವರ ಸಾವಿನ ನಿಖರ ಕಾರಣದ ಕುರಿತು ವಿಭಿನ್ನ ವರದಿಗಳು ಹೊರಬಂದಿದ್ದು, ಅಧಿಕೃತವಾಗಿ ಹೆಚ್ಚಿನ ಮಾಹಿತಿ ಇನ್ನಷ್ಟೇ ಸ್ಪಷ್ಟವಾಗಬೇಕಿದೆ.
