ಈ ಕುರಿತು ಸಾಮಾಜಿಕ ಜಾಲತಾಣದಲ್ಲಿ ಮಾಹಿತಿ ಹಂಚಿಕೊಂಡಿರುವ ಕರಣ್ ಜೋಹರ್, ಆರ್.ಎನ್. ಕಾವ್ ಅವರು ತೆರೆಮರೆಯಲ್ಲಿ ಕಾರ್ಯನಿರ್ವಹಿಸುತ್ತಾ ದೇಶದ ಭದ್ರತಾ ವ್ಯವಸ್ಥೆಯಲ್ಲಿ ಮಹತ್ವದ ಬದಲಾವಣೆ ತಂದ ವ್ಯಕ್ತಿ ಎಂದು ಬಣ್ಣಿಸಿದ್ದಾರೆ. ರಾ ಸಂಸ್ಥೆಯ ಆರಂಭಿಕ ದಿನಗಳು ಹಾಗೂ ಅದರ ಮೊದಲ ಕಾರ್ಯಾಚರಣೆಯ ಕಥೆಯನ್ನು ಸಿನಿಮಾದ ಮೂಲಕ ಪ್ರೇಕ್ಷಕರಿಗೆ ತಲುಪಿಸುವುದಾಗಿ ತಿಳಿಸಿದ್ದಾರೆ.

ಈ ಹಿಂದೆ ಬ್ಯಾಡ್ ನ್ಯೂಸ್ ಮತ್ತು ಕೇಸರಿ: ಚಾಪ್ಟರ್ 2 ಸಿನಿಮಾಗಳಲ್ಲಿ ಒಟ್ಟಾಗಿ ಕೆಲಸ ಮಾಡಿದ್ದ ಈ ನಿರ್ಮಾಣ ಸಂಸ್ಥೆಗಳು ಇದೀಗ ಮತ್ತೊಮ್ಮೆ ಕೈಜೋಡಿಸುತ್ತಿವೆ. ರಾ ಸಂಸ್ಥೆಯ ಇತಿಹಾಸ ಮತ್ತು ಅದರ ಆರಂಭಿಕ ಕಾರ್ಯಾಚರಣೆಗಳನ್ನು ಆಧರಿಸಿದ ಕಥೆಯಾಗಿರುವುದರಿಂದ ಸಿನಿಮಾ ಘೋಷಣೆಯೇ ಬಾಲಿವುಡ್‌ನಲ್ಲಿ ಕುತೂಹಲ ಮೂಡಿಸಿದೆ.

ಚಿತ್ರತಂಡ ಈಗಾಗಲೇ ಈ ಯೋಜನೆಯ ಸಂಶೋಧನೆ ಮತ್ತು ಚಿತ್ರಕಥೆ ರಚನೆಯಲ್ಲಿ ಸಾಕಷ್ಟು ಸಮಯ ವ್ಯಯಿಸಿದೆ ಎನ್ನಲಾಗಿದೆ. ಲಿಯೋ ಮೀಡಿಯಾ ತಂಡ ಕಳೆದ ಎರಡು ವರ್ಷಗಳಿಂದ ಈ ಕಥೆಯ ಕುರಿತು ಸಂಶೋಧನೆ ನಡೆಸುತ್ತಿದ್ದು, ನೈಜ ಘಟನೆಗಳಿಗೆ ಆಧಾರಿತವಾದ ದ್ರಿಲ್ಲರ್ ರೂಪದಲ್ಲಿ ಕಥೆಯನ್ನು ತೆರೆಗೆ ತರಲು ಸಿದ್ಧತೆ ನಡೆಸಿದೆ.

ದೇಶದ ಗುಪ್ತಚರ ಸಂಸ್ಥೆಯ ಇತಿಹಾಸವನ್ನು ಕೇವಲ ಮನರಂಜನೆಯ ದೃಷ್ಟಿಯಿಂದಲ್ಲದೆ, ಆ ಸಂಸ್ಥೆಯ ಸೇವೆಗೆ ಗೌರವ ಸಲ್ಲಿಸುವ ರೀತಿಯಲ್ಲಿ ಸಿನಿಮಾವನ್ನು ರೂಪಿಸಲು ಉದ್ದೇಶಿಸಲಾಗಿದೆ ಎಂದು ಕರಣ್ ಜೋಹರ್ ತಿಳಿಸಿದ್ದಾರೆ.

ಆರ್.ಎನ್. ಕಾವ್ ಬಯೋಪಿಕ್‌ನ ಕಥಾಹಂದರವು 1955ರಿಂದ 1971ರವರೆಗಿನ ಅವಧಿಯನ್ನು ಒಳಗೊಂಡಿರಲಿದೆ. ಭಾರತಕ್ಕೆ ಪ್ರತ್ಯೇಕ ಗುಪ್ತಚರ ಸಂಸ್ಥೆಯ ಅಗತ್ಯ ಏಕೆ ಎದುರಾಯಿತು ಎಂಬುದರಿಂದ ಕಥೆ ಆರಂಭವಾಗಲಿದೆ.

ನಂತರ ರಾ ಸಂಸ್ಥೆಯ ಸ್ಥಾಪನೆ, ಅದರ ಆರಂಭಿಕ ಬೆಳವಣಿಗೆ ಮತ್ತು 1971ರ ಭಾರತ-ಪಾಕಿಸ್ತಾನ ಯುದ್ಧದ ಸಂದರ್ಭದಲ್ಲಿ ಸಂಸ್ಥೆ ಕೈಗೊಂಡ ಮೊದಲ ಪ್ರಮುಖ ಕಾರ್ಯಾಚರಣೆಯವರೆಗೆ ಕಥೆ ಸಾಗಲಿದೆ ಎಂದು ಚಿತ್ರತಂಡ ತಿಳಿಸಿದೆ.

ಹೀಗಾಗಿ ಸಿನಿಮಾದಲ್ಲಿ ಕೇವಲ ಆರ್.ಎನ್. ಕಾವ್ ಅವರ ವೈಯಕ್ತಿಕ ಜೀವನವಷ್ಟೇ ಅಲ್ಲದೆ, ಭಾರತದ ಗುಪ್ತಚರ ವ್ಯವಸ್ಥೆಯ ಒಂದು ಮಹತ್ವದ ಕಾಲಘಟ್ಟವನ್ನೂ ಪ್ರೇಕ್ಷಕರು ನೋಡಬಹುದಾಗಿದೆ.

ಪ್ರಮುಖ ತಾರಾಗಣದ ಆಯ್ಕೆ ಕುರಿತ ಮಾಹಿತಿಯನ್ನೂ ಸದ್ಯಕ್ಕೆ ಗುಟ್ಟಾಗಿಯೇ ಇಡಲಾಗಿದೆ. ಮುಂದಿನ ದಿನಗಳಲ್ಲಿ ನಿರ್ದೇಶಕ, ನಾಯಕ ನಟ ಹಾಗೂ ಇತರ ಕಲಾವಿದರ ವಿವರಗಳನ್ನು ಘೋಷಿಸುವ ಸಾಧ್ಯತೆಯಿದೆ.