ಗಡಿ ಪ್ರದೇಶದಲ್ಲಿ ಕೆ-9 ವಜ್ರಗಳಿಂದ ಸೇನೆ ಮತ್ತಷ್ಟು ಬಲಿಷ್ಠವಾಗಲಿದೆ. ಈಗಾಗಲೇ ಕೆ-9 ವಜ್ರಗಳ ಪ್ರಾಯೋಗಿಕ ಪರೀಕ್ಷೆ ಯಶಸ್ವಿಯಾಗಿದೆ. ಮುಂದೆ ಸೇನೆಯ ಎಲ್ಲ ರೆಜಿಮೆಂಟ್ ಗಳನ್ನು ಕೆ-9 ವಜ್ರ ಸೇರ್ಪಡೆಯಾಗಲಿವೆ. ಸೇನೆಯ ಚೀಫ್ ಜನರಲ್ ಮನೋಜ್ ಮುಕುಂದ್ (Army Chief General Manoj Mukund Naravane) ಚೀನಾ ಮತ್ತು ಪಾಕಿಸ್ತಾನಕ್ಕೆ ಸಂದೇಶ ರವಾನಿಸಿದ್ದಾರೆ. ನಾವು ಚೀನಾವನ್ನ ಎದುರಿಸಲು ಲಡಾಕ್ ಗಡಿ ಭಾಗದಲ್ಲಿ ಮೂಲಸೌಕರ್ಯ ಮತ್ತು ಅಭಿವೃದ್ಧಿ ಕಾರ್ಯಗಳನ್ನು ವೇಗಗೊಳಿಸುತ್ತಿದ್ದೇವೆ ಎಂದು ಹೇಳಿದ್ದಾರೆ.

ಚೀನಾ ತನ್ನ ಕಳ್ಳಾಟ ಹೆಚ್ಚು ಮಾಡುತ್ತಿರುವ ಹಿನ್ನೆಲೆ ಭಾರತೀಯ ಸೇನೆ ಹೆಚ್ಚು ಸೈನಿಕರನ್ನು ನಿಯೋಜನೆ ಮಾಡುತ್ತಿದೆ. ಪ್ರತಿ ವಾರ ಪಾಕಿಸ್ತಾನ ಸೇನೆಯ ಜೊತೆ ಡೈರೆಕ್ಟರ್ ಜನರಲ್ ಆಫ್ ಮಿಲಿಟ್ರಿ ಆಪರೇಷನ್ (ಡಿಜಿಎಂಓ) ಲೆವಲ್ ನಲ್ಲಿ ಮಾತುಕತೆ ನಡೆಯುತ್ತಿರುತ್ತದೆ. ಈ ಮಾತುಕತೆಯಲ್ಲಿ ಪಾಕಿಸ್ತಾನ ಭಯೋತ್ಪಾದಕ ಚಟುವಟಿಕೆಗಳನ್ನು ಪ್ರೋತ್ಸಾಹಿಸಬಾರದು ಎಂದು ಮನೋಜ್ ಮುಕುಂದ್ ಎಚ್ಚರಿಕೆ ನೀಡಿದ್ದಾರೆ.

ಇತ್ತ ಚೀನಾ ಸಹ ಪೂರ್ವ ಮತ್ತು ಉತ್ತರ ಲಡಾಖ್ ಭಾಗದಲ್ಲಿ ತನ್ನ ಸೇನೆಯನ್ನು ನಿಯೋಜಿಸುತ್ತಿದೆ. ಭಾರತ ಮತ್ತು ಚೀನಾ ನಡುವೆ ಅಕ್ಟೋಬರ್ ಎರಡನೇ ವಾರದಲ್ಲಿ 13ನೇ ಸುತ್ತಿನ ಮಾತುಕತೆ ನಡೆಯುವ ಸಾಧ್ಯತೆಗಳಿವೆ. ಈ ವೇಳೆ ಗಡಿ ಭಾಗದಲ್ಲಿ ಉಂಟಾಗುತ್ತಿರುವ ಅಕ್ರಮ ಒಳನುಸಳುವಿಕೆ ಸೇರಿದಂತೆ ಇನ್ನಿತರ ವಿಷಯಗಳ ಕುರಿತು ಚರ್ಚೆ ನಡೆಯಲಿದೆ ಎಂದು ಹೇಳಲಾಗುತ್ತಿದೆ.

ಫೆಬ್ರವರಿಯಿಂದ ಜೂನ್ 2021ರವರೆಗೆ ಪಾಕಿಸ್ತಾನ ಯಾವುದೇ ಕದನ ವಿರಾಮ ಉಲ್ಲಂಘಿಸಿರಲಿಲ್ಲ. ಆದ್ರೆ ಕಳೆದ 15 ದಿನಗಳಿಂದ ದೇಶದೊಳಗೆ ನುಸಳಲು ಪಾಕ್ ಪ್ರಯತ್ನಿಸುತ್ತಿದೆ. ಕಳೆದ 10 ದಿನಗಳಲ್ಲಿ ಎರಡು ಬಾರಿ ಪಾಕಿಸ್ತಾನ ಕದನ ವಿರಾಮ ಉಲ್ಲಂಘಿಸಿದೆ.

ಗುಪ್ತಚರ ಮಾಹಿತಿ ಪ್ರಕಾರ, ಚೀನಾ ಪೂರ್ವ ಲಡಾಕ್ ಬಳಿಯಲ್ಲಿಯ ವಾಸ್ತವಿಕ ನಿಯಂತ್ರಣ ರೇಖೆ (ಎಲ್‍ಎಸಿ)ಯ ಎಂಟು ಲೊಕೇಶನ್ ಗಳಲ್ಲಿ ಹೊಸ 84 ಮ್ಯಾಡ್ಯೂಲರ್ ಕಂಟೇನರ್ (ತಾತ್ಕಾಲಿಕ ಟೆಂಟ್) ನಿರ್ಮಿಸುವ ಕಾರ್ಯದಲ್ಲಿ ನಿರತವಾಗಿದೆ ಎಂದು ವರದಿಯಾಗಿದೆ.

ಮಾಧ್ಯಮಗಳ ವರದಿ ಪ್ರಕಾರ, ಪೀಪುಲ್ಸ್ ಲಿಬರೇಶನ್ ಆರ್ಮಿ ಉತ್ತರ ಕಾರಾಕೋರಮ್ ಸಮೀಪ ವಹಾಬ್ ಜಿಲ್ಗಾದಿಂದ ಪಿಯು, ಹಾಟ್ ಸ್ಪ್ರಿಂಗ್ಸ್, ಚಂಗ್ ಲಾ, ನಾಶಿಗಾಂಗ್, ಮಾನ್ಜಾ ಮತ್ತು ಚುರೂಪ್ ವರೆಗೆ ಸೈನಿಕರ ಶೆಲ್ಟರ್ ನಿರ್ಮಿಸುತ್ತಿದೆ. ಈಗಾಗಲೇ ಅಲ್ಲಿ ಹಳೆಯ ಟೆಂಟ್ ಗಳಿದ್ರೂ ಮತ್ತೆ ಹೊಸ ಶೆಲ್ಟರ್ ಗಳ ನಿರ್ಮಾಣಕ್ಕೆ ಮುಂದಾಗಿದೆ. ಚೀನಾದ ಈ ಬೆಳವಣಿಗೆಯಿಂದ ಅದು ತನ್ನ ಸೇನೆಯನ್ನು ಹಿಂಪಡೆಯುವುದು ಅನುಮಾನ ಎಂದು ಹೇಳಲಾಗುತ್ತಿದೆ. ದೀರ್ಘ ಸಮಯದವರೆಗೆ ಚೀನಾ ತನ್ನ ಸೈನಿಕರನ್ನು ನಿಯೋಜಿಸಲು ಮುಂದಾಗಿದೆ ಎಂದು ವರದಿಯಾಗಿದೆ.