ಘಾಲಿಬಾಫ್ ಅವರನ್ನು ಕೇವಲ ಒಬ್ಬ ಸಾಂಪ್ರದಾಯಿಕ ರಾಜಕಾರಣಿ ಎಂದು ನೋಡಲು ಸಾಧ್ಯವಿಲ್ಲ. ಇಸ್ಲಾಮಿಕ್ ರೆವಲ್ಯೂಷನರಿ ಗಾರ್ಡ್ ಕಾರ್ಪ್ಸ್ (IRGC) ನ ಮಾಜಿ ಏರೋಸ್ಪೇಸ್ ಕಮಾಂಡರ್ ಆಗಿದ್ದ ಇವರು ಯುದ್ಧದ ಮೈದಾನವನ್ನು ಹತ್ತಿರದಿಂದ ನೋಡಿದವರು. ಅಂತರರಾಷ್ಟ್ರೀಯ ವಲಯದಲ್ಲಿ ಇವರನ್ನು “ವ್ಯಾವಹಾರಿಕ ಕಠಿಣ ನಿಲುವುಳ್ಳವರು” (Pragmatic Hardliner) ಎಂದು ಕರೆಯಲಾಗುತ್ತದೆ. ಅಂದರೆ, ಇವರು ದೇಶದ ಸೈನ್ಯ ಮತ್ತು ಸ್ವಾಭಿಮಾನದ ವಿಷಯದಲ್ಲಿ ಕಡು ಹಠಮಾರಿ, ಆದರೆ ದೇಶದ ಆರ್ಥಿಕ ಪರಿಸ್ಥಿತಿಯನ್ನು ಸುಧಾರಿಸಲು ಶತ್ರುಗಳ ಜೊತೆ ಮಾತುಕತೆಯ ಮೇಜಿನ ಬಳಿ ಕೂರಲು ಸಿದ್ಧರಿರುವ ಚಾಣಕ್ಯ.

ಘಾಲಿಬಾಫ್ ಅವರ ಎಂಟ್ರಿಯಿಂದಾಗಿ ಯುದ್ಧದ ಕಾರ್ಮೋಡ ಸರಿದು ಶಾಂತಿ ಸ್ಥಾಪನೆಯಾಗಬಹುದು ಎಂಬ ಪಾಸಿಟಿವ್ ಟಾಕ್ ಒಂದು ಕಡೆ ಕೇಳಿಬರುತ್ತಿದೆ. ಸದ್ಯ ಪಾಕಿಸ್ತಾನದ ಮಧ್ಯಸ್ಥಿಕೆಯಲ್ಲಿ ಇರಾನ್ ಮತ್ತು ಅಮೆರಿಕ ನಡುವೆ ನಡೆಯುತ್ತಿರುವ ನೇರ ಶಾಂತಿ ಮಾತುಕತೆಗಳ ಮುಖ್ಯ ಸಂಧಾನಕಾರರಾಗಿ ಇವರೇ ಕಾರ್ಯನಿರ್ವಹಿಸುತ್ತಿದ್ದಾರೆ. ಇರಾನ್ ಮೇಲಿರುವ ಜಾಗತಿಕ ಆರ್ಥಿಕ ನಿರ್ಬಂಧಗಳು ತೆರವಾಗದಿದ್ದರೆ ದೇಶದ ಆರ್ಥಿಕತೆ ಉದ್ಧಾರವಾಗಲ್ಲ ಎಂಬ ವಾಸ್ತವ ಇವರಿಗೆ ಗೊತ್ತು. ಹಾಗಾಗಿ, ಬಲಪ್ರದರ್ಶನದ ಮೂಲಕವೇ ಅಮೆರಿಕವನ್ನು ಮಣಿಸಿ, ಇರಾನ್‌ನ ಗೌರವಕ್ಕೆ ಧಕ್ಕೆ ಬಾರದಂತೆ ಯುದ್ಧವನ್ನು ಕೊನೆಗೊಳಿಸಲು ಇವರು ಬಿಗ್ ಪ್ಲಾನ್ ಮಾಡುತ್ತಿದ್ದಾರೆ. ಇವರ ಭರ್ಜರಿ ಗೆಲುವು ಈ ಶಾಂತಿ ಮಾತುಕತೆಗಳಿಗೆ ಹೆಚ್ಚಿನ ರಾಜತಾಂತ್ರಿಕ ಶಕ್ತಿ ನೀಡಿದೆ.

ಇನ್ನೊಂದೆಡೆ, ಪರಿಸ್ಥಿತಿ ಇನ್ನೂ ವರ್ಸ್ಟ್ ಆಗಬಹುದು ಎಂಬ ಆತಂಕವೂ ಇದೆ. ಏಕೆಂದರೆ ಖಾಲಿಬಾಫ್ ಮೂಲತಃ ಮಿಲಿಟರಿ ಹಿನ್ನೆಲೆಯುಳ್ಳವರು. “ನಾವು ಶಾಂತಿ ಮಾತುಕತೆ ನಡೆಸುತ್ತಿದ್ದೇವೆ ಎಂದರೆ ನಮ್ಮ ಸೈನ್ಯ ಸುಮ್ಮನೆ ಕೂತಿದೆ ಎಂದಲ್ಲ” ಎಂದು ಅವರು ಈಗಾಗಲೇ ಅಮೆರಿಕಕ್ಕೆ ಖಡಕ್ ವಾರ್ನಿಂಗ್ ಕೊಟ್ಟಿದ್ದಾರೆ.

ಸದ್ಯದ ಪರಿಸ್ಥಿತಿಯಲ್ಲಿ ಖಾಲಿಬಾಫ್ ಅವರ ನಡೆ ಇಡೀ ಮಿಡಲ್ ಈಸ್ಟ್‌ನ ಫ್ಯೂಚರ್ ಅನ್ನು ನಿರ್ಧರಿಸಲಿದೆ. ಇವರು ತಮ್ಮ ವ್ಯಾವಹಾರಿಕ ಬುದ್ಧಿವಂತಿಕೆಯಿಂದ ಯುದ್ಧದ ವೈಬ್ಸ್ ಬಿಟ್ಟು ಶಾಂತಿ ತರುತ್ತಾರೋ ಅಥವಾ ಅಮೆರಿಕದ ಹಠದ ಮುಂದೆ ಕಠಿಣ ಮಿಲಿಟರಿ ನಿಲುವು ತಳೆದು ಬಿಕ್ಕಟ್ಟನ್ನು ಇನ್ನಷ್ಟು ಉಲ್ಬಣಗೊಳಿಸುತ್ತಾರೋ ಎಂಬುದನ್ನು ಕಾದು ನೋಡಬೇಕಿದೆ. ಒಟ್ಟಿನಲ್ಲಿ, ಇರಾನ್ ಸಂಸತ್ತಿಗೆ ಘಾಲಿಬಾಫ್ ಎಂಟ್ರಿಯಾಗಿರುವುದು ಜಾಗತಿಕ ರಾಜಕೀಯದಲ್ಲಿ ಒಂದು ದೊಡ್ಡ ಗೇಮ್ ಚೇಂಜರ್ ಅಂತೂ ಹೌದು.