ಇಂಗ್ಲೆಂಡ್ ಆಲ್‌ರೌಂಡರ್ ಸ್ಯಾಮ್ ಕರನ್ ಐಪಿಎಲ್‌ನಿಂದ ಕೊನೆಯ ಕ್ಷಣದಲ್ಲಿ ಹಿಂದೆ ಸರಿದಿದ್ದಕ್ಕೆ ಕುಮಾರ್ ಸಂಗಕ್ಕಾರ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ. ವಿದೇಶಿ ಆಟಗಾರರು ತಮ್ಮ ಒಪ್ಪಂದಗಳನ್ನು ಸಂಪೂರ್ಣವಾಗಿ ಪಾಲಿಸುವಂತೆ ಭಾರತೀಯ ಕ್ರಿಕೆಟ್ ನಿಯಂತ್ರಣ ಮಂಡಳಿ (ಬಿಸಿಸಿಐ) ತನ್ನ ಕಟ್ಟುನಿಟ್ಟಿನ ನೀತಿಯನ್ನು ಮುಂದುವರಿಸಬೇಕು ಎಂದು ಹೇಳಿದ್ದಾರೆ.

ಎರಡನೇ ಕ್ವಾಲಿಫೈಯರ್ ಪಂದ್ಯದಲ್ಲಿ ಗುಜರಾತ್ ಟೈಟಾನ್ಸ್ ವಿರುದ್ಧದ ಸೋಲಿನ ನಂತರದ ಪತ್ರಿಕಾಗೋಷ್ಠಿಯಲ್ಲಿ ಮಾತನಾಡಿದ ಸಂಗಕ್ಕಾರ, ಈ ಆವೃತ್ತಿಯಲ್ಲಿ ಸ್ಯಾಮ್ ಕರನ್ ಗಾಯಗೊಂಡಿದ್ದು, ಅವರು ಆಟದಿಂದ ಹೊರಗುಳಿಯುವ ಸಾಧ್ಯತೆ ಇದೆ ಎಂದು ನಮಗೆ ತಿಳಿಸಲಾಗಿತ್ತು.

ತೊಡೆಸಂದು ಗಾಯದ ಕಾರಣ ಸ್ಯಾಮ್ ಕರನ್ ಐಪಿಎಲ್‌ 2026 ರ ಆವೃತ್ತಿಯಿಂದ ಹಿಂದೆ ಸರಿದರು. ಆದಾಗ್ಯೂ, ಇಂಗ್ಲೆಂಡ್‌ಗೆ ಹಿಂದಿರುಗಿದ ನಂತರ ಅವರು ತಮ್ಮ ಕೌಂಟಿ ತಂಡವಾದ ಸರ್ರೆ ಪರ ಟಿ 20 ಬ್ಲಾಸ್ಟ್‌ನಲ್ಲಿ ಮೂರು ಪಂದ್ಯಗಳನ್ನು ಆಡಿದರು. ರಾಜಸ್ಥಾನ ಸ್ಟಾರ್ ವಿದೇಶಿ ಆಟಗಾರರನ್ನು ಕಳೆದುಕೊಂಡು ಸಂಕಷ್ಟದ ಪರಿಸ್ಥಿತಿಯನ್ನು ಎದುರಿಸಬೇಕಾಯಿತು. ಈಗ ಕರನ್ ನಡೆ ಬಗ್ಗೆ ಸೋಶಿಯಲ್ ಮೀಡಿಯಾದಲ್ಲಿ ಚರ್ಚೆ ಆಗುತ್ತಿದೆ.

ತಮ್ಮ ತಂಡವು ಗಾಯಗಳಿಂದ ಕೂಡ ಬಳಲುತ್ತಿದೆ ಎಂದು ಸಂಗಕ್ಕಾರ ಹೇಳಿದರು. ಆಡಮ್ ಮಿಲ್ನೆ ಮತ್ತು ಶಿಮ್ರಾನ್ ಹೆಟ್ಮೈಯರ್ ಅವರಂತಹ ಆಟಗಾರರು ತಂಡದಲ್ಲಿದ್ದಾರೆ. ಇಲ್ಲಿಗೆ ಬಂದಿರುವ ಅನೇಕ ಆಟಗಾರರಿದ್ದಾರೆ. ಆದರೆ ಹೆಚ್ಚು ಆಟವಾಡಲು ಸಮಯ ಸಿಕ್ಕಿಲ್ಲ. ಲುವಾನ್-ಡ್ರೆ ಪ್ರಿಟೋರಿಯಸ್ ಅವರಲ್ಲಿ ಒಬ್ಬರು. ಕ್ವೆನಾ ಎಂಫಕಾ ಅಂತಹ ಮತ್ತೊಬ್ಬ ಆಟಗಾರ. ಅವರು ಇಲ್ಲಿದ್ದಾರೆ, ಅವರು ಕಷ್ಟಪಟ್ಟು ಕೆಲಸ ಮಾಡಿದ್ದಾರೆ. ಅವರು ಅಭ್ಯಾಸ ಮಾಡಿದ್ದಾರೆ ಮತ್ತು ಈ ಪ್ರಯಾಣದಲ್ಲಿ ತಂಡವನ್ನು ಬೆಂಬಲಿಸಲು ಅವರು ನಿಜವಾಗಿಯೂ ಬೇರೆಯವರಂತೆ ಶ್ರಮಿಸಿದ್ದಾರೆ. ಈಗ ಅವರು ಬರಬೇಕೆ ಅಥವಾ ಬೇಡವೇ ಎಂಬುದು ಸಂಪೂರ್ಣವಾಗಿ ಆಟಗಾರನಿಗೆ ಬಿಟ್ಟದ್ದು ಎಂದು ತಿಳಿಸಿದ್ದಾರೆ.

ಐಪಿಎಲ್‌ನಲ್ಲಿ ವಿದೇಶಿ ಆಟಗಾರರ ಲಭ್ಯತೆಯು ಬಹಳ ಹಿಂದಿನಿಂದಲೂ ಚರ್ಚೆಯ ವಿಷಯವಾಗಿದೆ. ಇದಕ್ಕಾಗಿ ಹರಾಜಿನಲ್ಲಿ ಖರೀದಿಸಿದ ನಂತರ ಐಪಿಎಲ್‌ನಿಂದ ಹಿಂದೆ ಸರಿಯುವ ವಿದೇಶಿ ಆಟಗಾರರ ಮೇಲೆ ಎರಡು ವರ್ಷಗಳ ನಿಷೇಧ ಹೇರುವ ನಿಯಮವನ್ನು ಬಿಸಿಸಿಐ ಈಗಾಗಲೇ ಹೊಂದಿದೆ. ಈ ಆವೃತ್ತಿಯಲ್ಲಿಯೂ ಸಹ, ಆಸ್ಟ್ರೇಲಿಯಾದ ಮಿಚೆಲ್ ಸ್ಟಾರ್ಕ್ ಮತ್ತು ಪ್ಯಾಟ್ ಕಮ್ಮಿನ್ಸ್ ಸಣ್ಣ ಫಿಟ್‌ನೆಸ್ ಸಮಸ್ಯೆಗಳಿಂದಾಗಿ ಎರಡನೇ ಹಂತದ ಸ್ಪರ್ಧೆಯಲ್ಲಿ ತಮ್ಮ ತಂಡಗಳನ್ನು ಸೇರಿಕೊಂಡರು. ಈ ಕುರಿತು ಸಂಗಕ್ಕಾರ ಮಾತನಾಡಿದ್ದಾರೆ.