ಈ ಯೋಜನೆಗೆ ಆಯ್ಕೆಯಾಗಲು ಕನಿಷ್ಠ 18 ವರ್ಷ ವಯಸ್ಸು ಆಗಿರಬೇಕು. ಬುಕ್ಕಿಂಗ್ ಕೌಂಟರ್ ಆರಂಭ ಮಾಡಬೇಕು ಎಂದುಕೊಂಡರೆ, 12ನೇ ತರಗತಿ, ಪಾರ್ಸೆಲ್ ಸೇವೆ ಆರಂಭಿಸಲು 10ನೇ ತರಗತಿ, ಪಾಸ್ ಆಗಿರಬೇಕು. ಸ್ಮಾರ್ಟ್ ಫೋನ್ ಅಥವಾ ಕಂಪ್ಯೂಟರ್ ಬಳಕೆಯ ಜ್ಞಾನ ಇರಬೇಕು. ಒಂದೊಮ್ಮೆ ಡೆಲಿವರಿ ಸೇವೆಗಳನ್ನು ಆಯ್ಕೆ ಮಾಡಿಕೊಂಡರೆ ನಿಮಗೆ ಒಂದು ಸ್ವತಃ ದ್ವಿಚಕ್ರ ವಾಹನ, ಡ್ರೈವಿಂಗ್ ಲೈಸೆನ್ಸ್ ಇರುವುದು ಕಡ್ಡಾಯ. ಆದರೆ ಈಗಾಗಲೇ ಅಂಚೆ ಇಲಾಖೆಯಲ್ಲಿ ಕೆಲಸ ಮಾಡುತ್ತಿರುವ ಉದ್ಯೋಗಿಗಳ ಕುಟುಂಬ ಸದಸ್ಯರಿಗೆ ಈ ಫ್ರಾಂಚೈಸಿಗಳನ್ನು ನೀಡುವುದಿಲ್ಲ.

ಬುಕ್ಕಿಂಗ್ ಕೇಂದ್ರವನ್ನು ಆರಂಭಿಸಲು ಅಗತ್ಯವಿರುವ ಕೊಠಡಿ, ಕಂಪ್ಯೂಟರ್ ಅಥವಾ ಸ್ಮಾರ್ಟ್ ಫೋನ್, ಇಂಟರ್​​ನೆಟ್ ಸಂಪರ್ಕ, ಪ್ರಿಂಟರ್ ಹೊಂದಿರಬೇಕು. ಈ ಬ್ಯುಸಿನೆಸ್ ಮಾಡೆಲ್ ಅನ್ವಯ ನೀವು ರಿಫಂಡಬಲ್ ಸೆಕ್ಯೂರಿಟಿ ಡಿಪಾಸಿಟ್ ಮಾಡಬೇಕು. ಕೇವಲ ಪಿಕ್ ಅಪ್ ಅಥವಾ ಡೆಲಿವರಿ ಸೇವೆಗಳನ್ನ ಆಯ್ಕೆ ಮಾಡಿಕೊಂಡರೆ ನೀವು 5 ಸಾವಿರ, ಬುಕ್ಕಿಂಗ್ ಕೇಂದ್ರಕ್ಕೆ 10 ಸಾವಿರ ರೂಪಾಯಿ, ಎಲ್ಲಾ ರೀತಿಯ ಸೇವೆಗಳನ್ನು ನೀಡುವ ‘ಫುಲ್ ಫ್ರಾಂಚೈಸಿ’ ಆರಂಭಿಸಲು 15 ಸಾವಿರ ರೂಪಾಯಿ ಡಿಪಾಸಿಟ್ ಮಾಡಬೇಕು.

ಈ ಹೊಸ ವಿಧಾನದಲ್ಲಿ ಹೆಚ್ಚು ವಹಿವಾಟು ನಡೆಸಲು ‘ಎಪಿಟಿ 2.0’ ಮೊಬೈಲ್ ಆ್ಯಪ್, ಸೆಲ್ಫ್​ ಸರ್ವೀಸ್​ ಪೋರ್ಟಲ್ ಮೂಲಕ ಸಂಪೂರ್ಣವಾಗಿ ಡಿಜಿಟಲ್ ಪದ್ಧತಿಯಲ್ಲೇ ನಡೆಯಲಿದೆ. ಪ್ರತಿಯೊಂದು ಬುಕ್ಕಿಂಗ್, ಡೆಲಿವರಿ ಮೇಲೆ ಆಕರ್ಷಕ ಕಮಿಷನ್ ನೇರವಾಗಿ ಸಿಗುತ್ತದೆ. ವಹಿವಾಟು, ವ್ಯಾಪಾರ ಬೆಳೆದಂತೆ ಕಮಿಷನ್ ಮೊತ್ತ ಕೂಡ ಹೆಚ್ಚಾಗುತ್ತದೆ. ಪ್ರಮುಖವಾಗಿ ಕ್ಯಾಶ್ ಆನ್ ಡೆಲಿವರಿ (ಸಿಒಡಿ) ಪಾರ್ಸೆಲ್ ಮೇಲೆ ಹೆಚ್ಚುವರಿ ಲಾಭಗಳು ಸಿಗಲಿದೆ.

ಇಂಡಿಯಾ ಪೋಸ್ಟ್ ಈ ಫ್ರಾಂಚೈಸಿಗಳ ಆರಂಭಕ್ಕೆ ಪ್ರತಿ ವರ್ಷ ನಾಲ್ಕು ಬಾರಿ ಅರ್ಜಿಗಳನ್ನು ಆಹ್ವಾನಿಸುತ್ತದೆ. (ಜನವರಿ, ಏಪ್ರಿಲ್, ಜುಲೈ, ಅಕ್ಟೋಬರ್) ತಿಂಗಳಿನಲ್ಲಿ ಹಂತ ಹಂತವಾಗಿ ಅರ್ಜಿಗಳನ್ನು ಬಿಡುಗಡೆ ಮಾಡುತ್ತದೆ. ಈ ಬಗ್ಗೆ ಆಸಕ್ತಿ ಹೊಂದಿರುವ ಅಭ್ಯರ್ಥಿಗಳು ಆನ್ ಲೈನ್ ಮೂಲಕ ಅರ್ಜಿ ಸಲ್ಲಿಕೆ ಮಾಡಬಹುದು. ನಿಮ್ಮ ಅರ್ಹತೆಗಳನ್ನು ಪರಿಶೀಲನೆ ನಡೆಸಿ ಆಯ್ಕೆಯಾದ ವ್ಯಕ್ತಿಗಳಿಗೆ ಅಂಚೆ ಇಲಾಖೆ ಸಂಪೂರ್ಣ ತರಬೇತಿಯನ್ನು ನೀಡುತ್ತದೆ. ಅಧಿಕೃತ ಒಪ್ಪಂದ ಆದ 30 ದಿನಗಳ ಒಳಗೆ ನೀವು ನಿಮ್ಮ ಸ್ವತಃ ವ್ಯಾಪಾರವನ್ನು ಶುರು ಮಾಡಬಹುದು.