ಸಾವಿರ ಏಕದಿನ ಪಂದ್ಯಗಳನ್ನು ಆಡಿದ ತಂಡಗಳ ಪಟ್ಟಿಯಲ್ಲಿ ಟೀಮ್ ಇಂಡಿಯಾ ಅಗ್ರಸ್ಥಾನದಲ್ಲಿದೆ. ಇಲ್ಲಿಯವರೆಗೆ ಭಾರತ 1075 ಏಕದಿನ ಪಂದ್ಯಗಳನ್ನು ಆಡಿದೆ. ಆಸ್ಟ್ರೇಲಿಯಾ 1020 ಪಂದ್ಯಗಳೊಂದಿಗೆ ಎರಡನೇ ಸ್ಥಾನದಲ್ಲಿ ಮುಂದುವರೆದಿದೆ. ಈಗ ಮೂರನೇ ಸ್ಥಾನಕ್ಕೆ ಪಾಕಿಸ್ತಾನ ಬಂದಿದೆ.

ಸಾವಿರ ಏಕದಿನ ಪಂದ್ಯವನ್ನು ಆಡುತ್ತಿರುವ ಸಂದರ್ಭದಲ್ಲಿ ಪಾಕಿಸ್ತಾನದ ನಾಯಕ ಶಾಹೀನ್ ಅಫ್ರಿದಿ ಆಸ್ಟ್ರೇಲಿಯಾದ ಹಂಗಾಮಿ ನಾಯಕ ಜೋಸ್ ಇಂಗ್ಲಿಸ್ ಅವರಿಂದ ವಿಶೇಷ ಸ್ಮರಣಿಕೆಯನ್ನು ಪಡೆದರು. ಪಾಕಿಸ್ತಾನ ಆಡುವ ಈ 1000ನೇ ಪಂದ್ಯದ ಮೂಲಕ ಅರಾಫತ್ ಮಿನ್ಹಾಸ್ ಅಂತಾರಾಷ್ಟ್ರೀಯ ಕ್ರಿಕೆಟ್‌ಗೆ ಪಾದಾರ್ಪಣೆ ಮಾಡಿದರು.

ಅಂತಾರಾಷ್ಟ್ರೀಯ ಕ್ರಿಕೆಟ್​​ನಲ್ಲಿ 1000 ಏಕದಿನ ಪಂದ್ಯಗಳನ್ನು ಆಡಿದ ಮೂರು ತಂಡಗಳ ಗೆಲುವಿನ ಶೇಕಡಾವಾರು ಪ್ರಮಾಣವನ್ನು ನೋಡಿದರೆ, ಆಸ್ಟ್ರೇಲಿಯಾ (1020 ಪಂದ್ಯಗಳಲ್ಲಿ 617 ಗೆಲುವುಗಳು, 52.7 ಪ್ರತಿಶತ) ಮೊದಲ ಸ್ಥಾನದಲ್ಲಿದೆ. ಬಳಿಕ ಭಾರತ (1075 ಪಂದ್ಯಗಳಲ್ಲಿ 571 ಗೆಲುವುಗಳು) ಮತ್ತು ಪಾಕಿಸ್ತಾನ (999 ಪಂದ್ಯಗಳಲ್ಲಿ 527 ಗೆಲುವುಗಳು) ಎರಡನೇ ಮತ್ತು ಮೂರನೇ ಸ್ಥಾನದಲ್ಲಿವೆ.

ಪಾಕಿಸ್ತಾನ ತಂಡವು ಫೆಬ್ರವರಿ 11, 1973 ರಂದು ನ್ಯೂಜಿಲೆಂಡ್ ವಿರುದ್ಧ ಮೊದಲ ಏಕದಿನ ಪಂದ್ಯವನ್ನು ಆಡಿತು. ಪಾಕಿಸ್ತಾನವು 1000 ಏಕದಿನ ಪಂದ್ಯಗಳನ್ನು ಪೂರ್ಣಗೊಳಿಸಲು 53 ವರ್ಷಗಳನ್ನು ತೆಗೆದುಕೊಂಡಿತು. ಈ 53 ವರ್ಷಗಳಲ್ಲಿ ಪಾಕಿಸ್ತಾನ 12 ವಿಶ್ವಕಪ್‌ಗಳನ್ನು ಆಡಿದೆ. ಪಾಕಿಸ್ತಾನವು ಮೊದಲ ಬಾರಿಗೆ 1975 ರ ವಿಶ್ವಕಪ್‌ನಲ್ಲಿ ಭಾಗವಹಿಸಿತು. ಪಾಕಿಸ್ತಾನವು 1992 ರಲ್ಲಿ ಮಾತ್ರ ವಿಶ್ವಕಪ್ ಪ್ರಶಸ್ತಿಯನ್ನು ಗೆದ್ದಿತು.