Last Updated:
Falta Assembly Election Result: ಬಂಗಾಳದ ರಾಜಕಾರಣದಲ್ಲಿ ಯಾವತ್ತೂ ಡೈಮಂಡ್ ಹಾರ್ಬರ್ ಮಾದರಿಯದ್ದೇ ಅಬ್ಬರ. ಆದರೆ ಈ ಬಾರಿ ಫಾಲ್ಟಾ ವಿಧಾನಸಭಾ ಕ್ಷೇತ್ರದ ಫಲಿತಾಂಶ ತೃಣಮೂಲ ಕಾಂಗ್ರೆಸ್ (ಟಿಎಂಸಿ) ಪಾಲಿಗೆ ಎಂದೂ ಮರೆಯಲಾಗದ ಕರಾಳ ಅಧ್ಯಾಯವಾಗಿ ಮಾರ್ಪಟ್ಟಿದೆ. ಈ ಕುರಿತು ಸಂಪೂರ್ಣ ವಿವರ ಇಲ್ಲಿದೆ.
ಬಂಗಾಳದ ರಾಜಕಾರಣದಲ್ಲಿ(West Bengal) ಯಾವತ್ತೂ ಡೈಮಂಡ್ ಹಾರ್ಬರ್ ಮಾದರಿಯದ್ದೇ ಅಬ್ಬರ. ಆದರೆ ಈ ಬಾರಿ ಫಾಲ್ಟಾ ವಿಧಾನಸಭಾ (Falta Assembly) ಕ್ಷೇತ್ರದ ಫಲಿತಾಂಶ ತೃಣಮೂಲ ಕಾಂಗ್ರೆಸ್ (ಟಿಎಂಸಿ) ಪಾಲಿಗೆ ಎಂದೂ ಮರೆಯಲಾಗದ ಕರಾಳ ಅಧ್ಯಾಯವಾಗಿ ಮಾರ್ಪಟ್ಟಿದೆ. ಮತದಾನದ ದಿನದವರೆಗೂ ಅಬ್ಬರಿಸುತ್ತಿದ್ದ ಟಿಎಂಸಿ, ಮತಪೆಟ್ಟಿಗೆಗಳು ತೆರೆದಾಗ ಕನಿಷ್ಠ ಪಕ್ಷ ಠೇವಣಿಯನ್ನೂ ಉಳಿಸಿಕೊಳ್ಳಲಾಗದೆ ಹೀನಾಯವಾಗಿ ಮಣ್ಣು ಮುಕ್ಕಿದೆ. ಮತದಾನದ ಪ್ರಕ್ರಿಯೆ (Voting Process) ಆರಂಭವಾಗುವ ಮುನ್ನವೇ ಪಕ್ಷ ಈ ಕ್ಷೇತ್ರವನ್ನು ಬಹುತೇಕ ಕೈಬಿಟ್ಟಿತ್ತು ಎನ್ನುವುದಕ್ಕೆ ಚುನಾವಣಾ ದಿನದ ವಿದ್ಯಮಾನಗಳೇ ಸಾಕ್ಷಿಯಾಗಿದ್ದವು.
ಚುನಾವಣೆಯ ಪ್ರಚಾರದ ಉಸ್ತುವಾರಿ ಹೊತ್ತಿದ್ದ ಪ್ರದೇಶದ ಪ್ರಭಾವಿ ಸಂಸದ ಅಭಿಷೇಕ್ ಬ್ಯಾನರ್ಜಿ ಅವರು ಫಲಿತಾಂಶದ ದಿನದ ಆಸುಪಾಸಿನಲ್ಲಿ ಎಲ್ಲೂ ಕಾಣಿಸಿಕೊಳ್ಳಲೇ ಇಲ್ಲ. ಇದು ಪಕ್ಷದ ಒಳಗಿನ ನೈತಿಕ ಸೋಲನ್ನು ಮುಂಚಿತವಾಗಿಯೇ ಸಾಬೀತುಪಡಿಸಿತ್ತು. ಎಲ್ಲಕ್ಕಿಂತ ದೊಡ್ಡ ಆಘಾತಕಾರಿ ದೃಶ್ಯ ಕಂಡುಬಂದಿದ್ದು ಮತದಾನದ ದಿನವೇ ಆಗಿತ್ತು.
ಸ್ವತಃ ತೃಣಮೂಲ ಕಾಂಗ್ರೆಸ್ನ ಹೆಮ್ಮೆಯ ಅಭ್ಯರ್ಥಿ, ‘ಪುಷ್ಪ’ ಖ್ಯಾತಿಯ ಜಹಾಂಗೀರ್ ಖಾನ್ ಅವರ ಮನೆಗೆ ಆ ದಿನ ಬೀಗ ಹಾಕಲಾಗಿತ್ತು! ನಾಯಕನೇ ಮನೆಯೊಳಗೆ ಇಲ್ಲದ, ಬೀಗ ಜಡಿಯಲ್ಪಟ್ಟ ಆ ಮನೆಯ ಚಿತ್ರವೇ ಈ ಚುನಾವಣೆಯ ಅಂತಿಮ ಫಲಿತಾಂಶ ಏನಾಗಲಿದೆ ಎಂಬುದಕ್ಕೆ ದಿಕ್ಸೂಚಿಯಾಗಿತ್ತು. ಕಾರ್ಯಕರ್ತರು ನಾಯಕನಿಲ್ಲದೆ ದಾರಿ ಕಾಣದೆ ಕಣ್ಣೀರಿಡುತ್ತಿದ್ದರೆ, ಮತದಾರರು ಮಾತ್ರ ಸದ್ದಿಲ್ಲದೆ ತಮ್ಮ ತೀರ್ಪನ್ನು ಬರೆದಿದ್ದರು.
ಮತ ಎಣಿಕೆ ಆರಂಭವಾದ ಮೊದಲ ಸುತ್ತಿನಿಂದಲೇ ತೃಣಮೂಲ ಕಾಂಗ್ರೆಸ್ಗೆ ಆಘಾತದ ಮೇಲೆ ಆಘಾತ ಕಾದಿತ್ತು. ಅಭಿಷೇಕ್ ಬ್ಯಾನರ್ಜಿ ಅವರ ಭದ್ರಕೋಟೆ ಎನಿಸಿಕೊಂಡಿದ್ದ ಈ ವಲಯದಲ್ಲಿ, ಟಿಎಂಸಿಯ ಸರಾಸರಿ ಓಟ ಕೇವಲ ನಾಲ್ಕನೇ ಸ್ಥಾನಕ್ಕೆ ಸೀಮಿತವಾಗಿತ್ತು. ಹದಿನೆಂಟು ಸುತ್ತುಗಳ ಸುದೀರ್ಘ ಮತ ಎಣಿಕೆ ಮುಕ್ತಾಯವಾಗುವ ಹೊತ್ತಿಗೆ ಬಿಜೆಪಿ ಅಭ್ಯರ್ಥಿ ಮತ್ತು ಟಿಎಂಸಿ ನಡುವಿನ ಅಂತರ ಬರೋಬ್ಬರಿ ತೊಂಬತ್ತೊಂದು ಸಾವಿರದ ಎಂಟುನೂರ ಎಂಬತ್ತೊಂಬತ್ತು (೯೧,೮೮೯) ಮತಗಳಿಗೆ ಏರಿಕೆಯಾಗಿತ್ತು. ಬಂಗಾಳದ ಇತಿಹಾಸದಲ್ಲೇ ಆಡಳಿತ ಪಕ್ಷವೊಂದು ಇಷ್ಟೊಂದು ಕನಿಷ್ಠ ಸ್ಥಾನಕ್ಕೆ ಕುಸಿಯುತ್ತದೆ ಎಂದು ಯಾರೂ ಊಹಿಸಿರಲಿಲ್ಲ.
ಫಲಿತಾಂಶದ ಅಧಿಕೃತ ಅಂಕಿ-ಅಂಶಗಳು ಪ್ರಕಟವಾದಾಗ ಇಡೀ ಬಂಗಾಳ ರಾಜಕೀಯವೇ ಬೆಚ್ಚಿಬಿದ್ದಿದೆ. ಈ ಚುನಾವಣೆಯಲ್ಲಿ ಬಿಜೆಪಿ ಅಭ್ಯರ್ಥಿ ದೇಬಾಂಗ್ಶು ಪಾಂಡಾ ಅವರು ಬರೋಬ್ಬರಿ ಒಂದು ಲಕ್ಷದ ಇಪ್ಪತ್ತೊಂಬತ್ತು ಸಾವಿರದ ಎಪ್ಪತ್ತೈದು (1,29,075) ಮತಗಳನ್ನು ಪಡೆಯುವ ಮೂಲಕ ಭರ್ಜರಿ ಜಯ ದಾಖಲಿಸಿದ್ದಾರೆ. ಇನ್ನು ದ್ವಿತೀಯ ಸ್ಥಾನಕ್ಕಾಗಿ ನಡೆದ ಪೈಪೋಟಿಯಲ್ಲಿ ಸಿಪಿಎಂ ಅಭ್ಯರ್ಥಿ ಮೂವತ್ತೇಳು ಸಾವಿರದ ಒಂದು ನೂರ ಎಂಬತ್ತಾರು (37,186) ಮತಗಳನ್ನು ಪಡೆದು ಎಲ್ಲರ ಗಮನ ಸೆಳೆದಿದ್ದಾರೆ. ಮೂರನೇ ಸ್ಥಾನ ಪಡೆದ ಕಾಂಗ್ರೆಸ್ ಒಂಬತ್ತು ಸಾವಿರದ ಐದು ನೂರ ಮೂವತ್ತೆರಡು (9,532) ಮತಗಳನ್ನು ಗಳಿಸಿದರೆ, ಆಡಳಿತ ಪಕ್ಷ ತೃಣಮೂಲ ಕಾಂಗ್ರೆಸ್ ಕೇವಲ ಐದು ಸಾವಿರದ ಏಳು ನೂರ ಎಂಟು (5,708) ಮತಗಳನ್ನು ಪಡೆದು ನಾಲ್ಕನೇ ಸ್ಥಾನಕ್ಕೆ ತಳ್ಳಲ್ಪಟ್ಟಿದೆ.
ಮತ ಎಣಿಕೆಯ ಪ್ರವೃತ್ತಿ ಸ್ಪಷ್ಟವಾಗುತ್ತಿದ್ದಂತೆ ಇಡೀ ಫಲ್ತಾ ಪ್ರದೇಶದಲ್ಲಿ ಹಬ್ಬದ ವಾತಾವರಣ ನಿರ್ಮಾಣವಾಯಿತು. ಇನ್ನು ಅಧಿಕೃತ ವಿಜಯದ ಪ್ರಮಾಣಪತ್ರ ಕೈ ಸೇರುವುದು ಬಾಕಿ ಇರುವಾಗಲೇ, ಗೆದ್ದ ಬಿಜೆಪಿ ಅಭ್ಯರ್ಥಿ ದೇಬಾಂಗ್ಶು ಪಾಂಡಾ ಅವರ ಬೆಂಬಲಿಗರು ಬೀದಿಗೆ ಇಳಿದು ಸಂಭ್ರಮಿಸಿದರು. ದೇವಸ್ಥಾನಗಳಲ್ಲಿ ವಿಶೇಷ ಪೂಜೆಗಳು ನಡೆದವು. ಸಾಂಪ್ರದಾಯಿಕ ಧಕ್ ಬ್ಯಾಂಡ್ನ ಮಧುರ ಧ್ವನಿ ಇಡೀ ವಾತಾವರಣವನ್ನು ತುಂಬಿಕೊಂಡಿತು.
Falta Assembly Election Result: ಫಾಲ್ಟಾದಲ್ಲಿ ಠೇವಣಿ ಕಳೆದುಕೊಂಡ ಟಿಎಂಸಿ; ಕಣ್ಣೀರಿಟ್ಟ ಕಾರ್ಯಕರ್ತರು, ಅಭ್ಯರ್ಥಿ ಪಡೆದ ಮತ ಕೇಳಿದ್ರೆ ನೀವೂ ಶಾಕ್ ಆಗ್ತೀರಾ?
