ಸಾಮಾನ್ಯವಾಗಿ ಮೃಗಾಲಯಗಳಲ್ಲಿ ಆಹಾರ ಅಥವಾ ದೈಹಿಕ ವ್ಯಾಯಾಮಕ್ಕಾಗಿ ವಿವಿಧ ವಸ್ತುಗಳನ್ನು ಬಳಸುವುದು ಸಹಜ. ಆದರೆ, ಇದೇ ಮೊದಲ ಬಾರಿಗೆ ಭಾರತದ ಮೃಗಾಲಯವೊಂದರಲ್ಲಿ ವಾಸನೆ ಆಧಾರಿತ ಹೊಸ ಪ್ರಯೋಗಕ್ಕೆ ಚಾಲನೆ ನೀಡಲಾಗಿದೆ. ಪ್ರಸಿದ್ಧ ಕಂಪನಿಯಾದ ‘ಕ್ಯಾಲ್ವಿನ್ ಕ್ಲೈನ್’ನ ‘ಅಬ್ಸೆಶನ್ ಫಾರ್ ಮೆನ್’ ಪಫ್ರ್ಯೂಮ್ ಅನ್ನು ಬಟ್ಟೆಯ ತುಂಡುಗಳ ಮೇಲೆ ಸಿಂಪಡಿಸಿ ಪ್ರಾಣಿಗಳ ಆವರಣದಲ್ಲಿ ಇಡಲಾಗಿತ್ತು. ಇದನ್ನು ಕಂಡು ಪ್ರಾಣಿಗಳು ತೋರಿದ ಪ್ರತಿಕ್ರಿಯೆ ಅಧಿಕಾರಿಗಳನ್ನೇ ದಂಗುಬಡಿಸಿದೆ ಎಂದು ಟೈಮ್ಸ್ ಆಫ್ ಇಂಡಿಯಾ ವೆಬ್‍ಸೈಟ್ ವರದಿ ಮಾಡಿದೆ.

ಈ ಪಫ್ರ್ಯೂಮ್‍ನಲ್ಲಿ ಸಿವೆಟೋನ್ ಎಂಬ ಸಂಯುಕ್ತವಿದ್ದು, ಇದು ಸಿವೆಟ್ ಬೆಕ್ಕುಗಳ ವಾಸನೆಯನ್ನು ಹೋಲುತ್ತದೆ. ಬಿಗ್ ಕ್ಯಾಟ್ಸ್ ಅಂದರೆ ಸಿಂಹ, ಹುಲಿಗಳಿಗೆ ಈ ವಾಸನೆಯು ಹೊಸದಾಗಿ ಕಾಣದೆ, ತಮ್ಮ ಪರಿಸರದಲ್ಲಿನ ನೈಸರ್ಗಿಕ ಸಂಕೇತದಂತೆ ಭಾಸವಾಗುತ್ತದೆ. ಇದರಿಂದಾಗಿ ಆ ಪ್ರಾಣಿಗಳು ಆ ವಸ್ತುವನ್ನು ಆಘ್ರಾಣಿಸಲು, ವಾಸನೆ ಗುರುತಿಸಲು ಮತ್ತು ದೀರ್ಘಕಾಲ ಅನ್ವೇಷಣೆಯಲ್ಲಿ ತೊಡಗಿಸಿಕೊಳ್ಳಲು ಪ್ರೇರೇಪಿತವಾಗುತ್ತವೆ ಎಂದು ಬಿಬಿಪಿ ಕಾರ್ಯನಿರ್ವಾಹಕ ನಿರ್ದೇಶಕ ಎವಿ ಸೂರ್ಯ ಸೇನ್ ತಿಳಿಸಿದ್ದಾರೆ.