ಡಿಯಾಜಿಯೊ ಇಂಡಿಯಾದ ಯುನೈಟೆಡ್ ಸ್ಪಿರೀಟ್ಸ್, ಇನ್‌ಬ್ರೂ ಬೆವರೇಜಸ್ ಮತ್ತು ಮೋಹನ್ ರಾಕಿ ಸ್ಪ್ರಿಂಗ್‌ವಾಟರ್‌ ತಯಾರಿಸಿದ ಉತ್ಪನ್ನಗಳಲ್ಲಿ ರುಚಿ ಹಾಗೂ ಪರಿಮಳಕ್ಕಾಗಿ ಕೃತಕ ಸುವಾಸನೆಯನ್ನು ಬಳಸುತ್ತಿರುವುದು ಕಂಡುಬಂದಿದೆ ಎಂದು ಭಾರತೀಯ ಆಹಾರ ಸುರಕ್ಷತೆ ಮತ್ತು ಪ್ರಮಾಣಿತ ಪ್ರಾಧಿಕಾರ (FSSAI) ತಿಳಿಸಿದೆ.

• ಯುನೈಟೆಡ್ ಸ್ಪಿರೀಟ್ಸ್ (ಡಿಯಾಜಿಯೊ ಇಂಡಿಯಾ) ಕಂಪನಿಯ ಆಂಟಿಕ್ವಿಟಿ ಬ್ಲೂ ವಿಸ್ಕಿ ಹಾಗೂ ರಾಯಲ್ ಚಾಲೆಂಜ್ ವಿಸ್ಕಿ.
• ಇನ್‌ಬ್ರೂ ಬೆವರೇಜಸ್ ಕಂಪನಿಯ ಬ್ಯಾಗ್‌ಪೈಪರ್ ಡಿಲಕ್ಸ್ ವಿಸ್ಕಿ ಹಾಗೂ ಓಲ್ಡ್ ಕಾಸ್ಕ್ ಡಿಲಕ್ಸ್ XXX ರಮ್.
• ಮೋಹನ್ ರಾಕಿ ಸ್ಪ್ರಿಂಗ್‌ವಾಟರ್‌ ಕಂಪನಿಯ ಭಾರತದ ಅತ್ಯಂತ ಹಳೆಯ ಹಾಗೂ ಜನಪ್ರಿಯ ಓಲ್ಡ್ ಮಾಂಕ್ ರಮ್ (Old Monk Rum) ನ ಮೂರು ವಿಧದ ರೂಪಾಂತರಗಳು ನಿಷೇಧಕ್ಕೊಳಗಾಗಿದೆ.

FSSAIಯ ಈ ನಿರ್ಧಾರವು ಭಾರತದ ಮದ್ಯದ ಮಾರುಕಟ್ಟೆಯ ಮೇಲೆ ಪರಿಣಾಮ ಬೀರಲಿದೆ. ಆಮದು ಮಾಡಿಕೊಂಡ ವಿಸ್ಕಿ, ರಮ್ ಮತ್ತು ಸ್ಕಾಚ್‌ಗಿಂತ ಸಾಮಾನ್ಯವಾಗಿ ಕಡಿಮೆ ಬೆಲೆಯಿರುವ ದೇಶೀಯವಾಗಿ ತಯಾರಿಸಿದ ಸ್ಪಿರಿಟ್‌ಗಳನ್ನು ಖರೀದಿಸುವ ಗ್ರಾಹಕರಿಗೆ ಇದು ಪ್ರಮುಖವಾಗಿದೆ. ಸುಮಾರು 40 ಬಿಲಿಯನ್ ಡಾಲರ್ ಅಂದಾಜು ವಾರ್ಷಿಕ ಆದಾಯದೊಂದಿಗೆ ಭಾರತವು ವಿಶ್ವದ ಅತಿ ದೊಡ್ಡ ಮದ್ಯ ಮಾರುಕಟ್ಟೆಗಳಲ್ಲಿ ಒಂದಾಗಿದೆ.

ಹಿಂದೂಸ್ತಾನ್​ ಟೈಮ್ಸ್​ ವರದಿಯ ಪ್ರಕಾರ, ಎಫ್‌ಎಸ್‌ಎಸ್‌ಎಐ ಭಾನುವಾರ ಬಿಡುಗಡೆ ಮಾಡಿದ ಹೇಳಿಕೆಯಲ್ಲಿ, “ರಮ್‌ಗೆ ರಮ್ ಫ್ಲೇವರ್ ಅಥವಾ ವಿಸ್ಕಿಗೆ ವಿಸ್ಕಿ ಫ್ಲೇವರ್ ಅನ್ನು ಸೇರಿಸುವ ಯಾವುದೇ ಅಂತರರಾಷ್ಟ್ರೀಯ ಮಟ್ಟದಲ್ಲಿ ಮಾನ್ಯತೆ ಪಡೆದ ಉತ್ಪಾದನಾ ಪದ್ಧತಿ ಇಲ್ಲ” ಎಂದು ತಿಳಿಸಿದೆ. ಅಂತಹ ಅಭ್ಯಾಸಗಳು ಸರಿಯಾದ ಮಾಗಿಸುವಿಕೆಯ (maturation) ಅಗತ್ಯವನ್ನು ಇಲ್ಲವಾಗಿಸಬಹುದು ಅಥವಾ ಕಾಕಂಬಿ (molasses), ಮಾಲ್ಟ್ ಮತ್ತು ದ್ರಾಕ್ಷಿಯಂತಹ ಸ್ಪಿರಿಟ್ ತಯಾರಿಕೆಯಲ್ಲಿ ಸಾಂಪ್ರದಾಯಿಕವಾಗಿ ಬಳಸುವ ಪದಾರ್ಥಗಳ ಮೇಲಿನ ಅವಲಂಬನೆಯನ್ನು ಕಡಿಮೆ ಮಾಡಬಹುದು ಎಂದು ಎಫ್‌ಎಸ್‌ಎಸ್‌ಎಐ ತಿಳಿಸಿದೆ. ಲ್ಯಾಬ್​​​ ಪರೀಕ್ಷೆಗಳಲ್ಲಿ ಬಾಧಿತ ಉತ್ಪನ್ನಗಳು “ಉತ್ಪನ್ನದಲ್ಲಿ ಬಾಹ್ಯ ಕೃತಕ ಅಥವಾ ಪ್ರಕೃತಿಯನ್ನು ಹೋಲುವ (nature identical) ಸುವಾಸನೆಗಳ ಉಪಸ್ಥಿತಿಯಿಂದಾಗಿ ಕಳಪೆಯಾಗಿವೆ” ಎಂದು FSSAI ತಿಳಿಸಿದೆ.

ಸ್ಪಷ್ಟನೆಗಾಗಿ ಕಾಯುತ್ತಿರುವ ಕಂಪನಿಗಳು

ಇನ್ನು, FSSAI ನಿರ್ಧಾರದಿಂದ ಮದ್ಯ ತಯಾರಕ ಕಂಪನಿಗಳು ಕಳವಳ ವ್ಯಕ್ತಪಡಿಸಿದ್ದಾರೆ. ಸುವಾಸನೆಯ ಬಳಕೆ FSSAI ನಿಯಮಗಳಿಗೆ ಅನುಗುಣವಾಗಿದೆ ಎಂದು ಹೇಳಿದ್ದಾರೆ. ನಿಯಂತ್ರಕರು ತಪಾಸಣೆ ನಡೆಸಿದ ನಿರ್ದಿಷ್ಟ ಘಟಕಗಳಲ್ಲಿ ತಯಾರಿಸಿದ ಉತ್ಪನ್ನಗಳಿಗೆ ಮಾತ್ರ ಈ ನಿರ್ಬಂಧ ಅನ್ವಯಿಸುತ್ತದೆಯೇ ಅಥವಾ ಬೇರೆಡೆ ಉತ್ಪಾದಿಸಲಾದ ಅದೇ ಬ್ರ್ಯಾಂಡ್‌ಗಳಿಗೂ ವಿಸ್ತರಿಸುತ್ತದೆಯೇ ಎಂಬುದು ಸ್ಪಷ್ಟವಾಗಿಲ್ಲ. ಆದೇಶದ ವ್ಯಾಪ್ತಿಯ ಬಗ್ಗೆ ಸ್ಪಷ್ಟನೆ ಕೋರಿ ಕಳುಹಿಸಲಾದ ಪ್ರಶ್ನೆಗಳಿಗೆ FSSAI ಪ್ರತಿಕ್ರಿಯಿಸಿಲ್ಲ ಎಂದು ಹಿಂದೂಸ್ತಾನ್​ ಟೈಮ್ಸ್​ ವರದಿ ಮಾಡಿದೆ.