ತಯಾರಕರ ಪ್ರಕಾರ, ಈ ಚಿತ್ರವು ಪ್ರಪಂಚದಾದ್ಯಂತದ 10,000 ಕ್ಕೂ ಹೆಚ್ಚು ಸಿಬ್ಬಂದಿಯನ್ನು ಒಟ್ಟುಗೂಡಿಸಿದೆ. ಇದು ಭಾರತೀಯ ಸಿನಿಮಾಗಾಗಿ ಇದುವರೆಗೆ ಒಟ್ಟುಗೂಡಿದ ಅತಿದೊಡ್ಡ ಸಿನಿಮಾ ತಂಡ ಎನ್ನುವುದು ವಿಶೇಷ. ಇದು ದಾಖಲೆಯೂ ಹೌದು.

ಬೃಹತ್ ಚಿತ್ರತಂಡ ಸಿನಿಮಾದ ನಿರ್ಮಾಣ ವಿನ್ಯಾಸ, ವಿಶುವಲ್ ಎಫೆಕ್ಟ್ಸ್, ಆಕ್ಷನ್ ನೃತ್ಯ ಸಂಯೋಜನೆ, ಕಾಸ್ಟ್ಯೂಮ್ ಮತ್ತು ರಾಮಾಯಣದ ಸುಂದರವಾದ, ಬೃಹತ್ ಸೆಟ್ ನಿರ್ಮಿಸುವಲ್ಲಿ ಒಳಗೊಂಡಿರುವ ಹಲವಾರು ತಾಂತ್ರಿಕ ವಿಭಾಗಗಳ ತಜ್ಞರನ್ನು ಒಳಗೊಂಡಿದೆ.

ಸಿನಿಮಾ ಜಾಗತಿಕ ಸಿನಿಮೀಯ ಮಾನದಂಡಗಳಿಗೆ ಹೊಂದಿಕೆಯಾಗುವಂತೆಯೇ ನಿರ್ಮಿಸಲಾಗುತ್ತಿದೆ. ಅದೇ ಕಾರಣದಿಂದ ಈ ಸಿನಿಮಾಗಾಗಿ ಉನ್ನತ ಅಂತರರಾಷ್ಟ್ರೀಯ ತಂತ್ರಜ್ಞರು ಮತ್ತು ತಜ್ಞರನ್ನು ಸಹ ನೇಮಿಸಲಾಗಿದೆ. ದೊಡ್ಡ ಪ್ರಮಾಣದ ಸೆಟ್ ನಿರ್ಮಾಣದಿಂದ ತೊಡಗಿ ಅತ್ಯಾಧುನಿಕ ವಿಶುವಲ್ ಎಫೆಕ್ಟ್ಸ್ ಮತ್ತು ದೊಡ್ಡಮಟ್ಟದ ಮೇಕಿಂಗ್ ಇರಲಿದೆ. ಇನ್ನು ರಾಮಾಯಣ ಸಿನಿಮಾವನ್ನು ಯಾವುದೇ ಇತರ ಸಿನಿಮಾಗಳಿಗಿಂತ ತುಂಬಾ ಭಿನ್ನವಾಗಿ ವರ್ಲ್ಡ್ ಆಡಿಯನ್ಸ್​ಗೂ ಸರಿಯಾಗುವ ರೀತಿಯಲ್ಲಿ ನಿರ್ಮಿಸಲಾಗುತ್ತಿದೆ.

ಈಗಾಗಲೇ ಭಾರತದಲ್ಲಿ ಪುರಾಣ ಕಥೆಗಳನ್ನು ಆಧರಿಸಿ, ಮಹಾಕಾವ್ಯಗಳನ್ನು ಆಧರಿಸಿ ಹಲವಾರು ಸಿನಿಮಾಗಳು ಬಂದಿವೆ. ಆದರೆ ರಾಮಾಯಣವನ್ನು ಆಧುನಿಕ ಪ್ರೇಕ್ಷಕರಿಗೆ ಹೊಂದಿಕೆಯಾಗುವಂತೆ ವಿಶೇಷವಾದ ಸ್ಟೋರಿ ಟೆಲ್ಲಿಂಗ್ ಹಾಗೂ ಆಧುನಿಕ ಶೈಲಿಯ ಮೇಕಿಂಗ್ ಮೂಲಕ ನಿರ್ಮಿಸಲಾಗುತ್ತಿದೆ.