Last Updated:
ವಾಷಿಂಗ್ಟನ್ ಡಿಸಿಯಲ್ಲಿ ಹೊಸ ಎಐ-ಚಾಲಿತ (AI-powered) ಫೆಡರಲ್ ಪ್ಲಾಟ್ಫಾರ್ಮ್ ಅನ್ನು ಅನಾವರಣಗೊಳಿಸಿ ಮಾತನಾಡಿದ ಟ್ರಂಪ್, “ಮುಂಬರುವ ವರ್ಷಗಳಲ್ಲಿ ನಮ್ಮ ದೇಶದ ಇತಿಹಾಸವನ್ನು ಬರೆಯುವಾಗ, ಇರಾನ್ ಯುದ್ಧವು ನಾವು ಮಾಡಿದ ಅತ್ಯಂತ ಪ್ರಮುಖ ಕೆಲಸಗಳಲ್ಲಿ ಒಂದಾಗಿದೆ ಎಂದು ಅವರು ಹೇಳಲಿದ್ದಾರೆ” ಎಂದು ಹೇಳಿದರು.
ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ (US President Donald Trump) ಮಂಗಳವಾರ ಮಹತ್ವದ ಹೇಳಿಕೆಯೊಂದನ್ನು ನೀಡಿದ್ದು, ಇದು ಪ್ರಪಂಚದಾದ್ಯಂತ ಹಲವು ದೇಶಗಳಿಗೆ ಸಮಾಧಾನ ತಂದಿದೆ. ಪ್ರಸ್ತುತ ಇರಾನ್ (US-Iran War) ಜೊತೆಗೆ ನಡೆಯುತ್ತಿರುವ ಸಂಘರ್ಷವು ‘ಅತಿ ಶೀಘ್ರದಲ್ಲೇ’ ಕೊನೆಗೊಳ್ಳಲಿದೆ ಎಂದು ತಿಳಿಸಿದ್ದಾರೆ. ಅಲ್ಲದೆ, ಈ ಯುದ್ಧವು ತಮ್ಮ ಆಡಳಿತಾವಧಿಯಲ್ಲಿ ಕೈಗೊಂಡ ಅತ್ಯಂತ ಪ್ರಮುಖ ಕ್ರಮಗಳಲ್ಲಿ ಒಂದಾಗಿ ಇತಿಹಾಸದಲ್ಲಿ ನೆನಪಿನಲ್ಲಿ ಉಳಿಯಲಿದೆ ಎಂದು ಅವರು ಪ್ರತಿಪಾದಿಸಿದ್ದಾರೆ.
ವಾಷಿಂಗ್ಟನ್ ಡಿಸಿಯಲ್ಲಿ ಹೊಸ ಎಐ-ಚಾಲಿತ (AI-powered) ಫೆಡರಲ್ ಪ್ಲಾಟ್ಫಾರ್ಮ್ ಅನ್ನು ಅನಾವರಣಗೊಳಿಸಿ ಮಾತನಾಡಿದ ಟ್ರಂಪ್, “ಮುಂಬರುವ ವರ್ಷಗಳಲ್ಲಿ ನಮ್ಮ ದೇಶದ ಇತಿಹಾಸವನ್ನು ಬರೆಯುವಾಗ, ಇರಾನ್ ಯುದ್ಧವು ನಾವು ಮಾಡಿದ ಅತ್ಯಂತ ಪ್ರಮುಖ ಕೆಲಸಗಳಲ್ಲಿ ಒಂದಾಗಿದೆ ಎಂದು ಅವರು ಹೇಳಲಿದ್ದಾರೆ” ಎಂದು ಹೇಳಿದರು.
ಇರಾನ್ ದೇಶವು ಅತ್ಯಂತ ಕೆಟ್ಟದಾಗಿ ವಿಫಲಗೊಳ್ಳುತ್ತಿದೆ ಎಂದು ಲೇವಡಿ ಮಾಡಿದ ಟ್ರಂಪ್, ಟೆಹ್ರಾನ್ (ಇರಾನ್ ರಾಜಧಾನಿ) ಯಾವುದೇ ಕಾರಣಕ್ಕೂ ಪರಮಾಣು ಆಯುಧವನ್ನು ಹೊಂದಲು ಬಿಡುವುದಿಲ್ಲ ಎಂಬ ತಮ್ಮ ನಿಲುವನ್ನು ಪುನರುಚ್ಚರಿಸಿದ್ದಾರೆ. “ನಾನು ಇರಾನ್ ಇಸ್ಲಾಮಿಕ್ ಗಣರಾಜ್ಯಕ್ಕೆ ಸಣ್ಣ ಪ್ರವಾಸ ಕೈಗೊಳ್ಳುವ ಮುನ್ನ ತೈಲ ಬೆಲೆಗಳು ಹೇಗಿದ್ದವೋ, ಅದೇ ರೀತಿ ಈಗ ಮತ್ತೆ ತೈಲ ಬೆಲೆಗಳು ತೀವ್ರವಾಗಿ ಕುಸಿಯಲಿವೆ” ಎಂದು ಟ್ರಂಪ್ ಭವಿಷ್ಯ ನುಡಿದಿದ್ದಾರೆ. ಹಾರ್ಮುಜ್ ಜಲಸಂಧಿಯ (Strait of Hormuz) ಮೂಲಕ ತೈಲ ಸಾಗಣೆ ಹೆಚ್ಚಾಗಿ, ಜಾಗತಿಕ ಮಾರುಕಟ್ಟೆಯಲ್ಲಿ ತೈಲ ಬೆಲೆಗಳು ಕುಸಿಯುತ್ತಿರುವ ಬೆನ್ನಲ್ಲೇ ಟ್ರಂಪ್ ಅವರ ಈ ಹೇಳಿಕೆ ಹೊರಬಿದ್ದಿದೆ.
ಜಲಸಂಧಿಯನ್ನು ಹಾದುಹೋಗುವ ಹಡಗುಗಳ ಮೇಲೆ ದಾಳಿಯನ್ನು ತೀವ್ರಗೊಳಿಸಿರುವುದಾಗಿ ಇರಾನ್ ಹೇಳಿಕೊಂಡಿದ್ದರೂ, ಹಾರ್ಮುಜ್ ಜಲಸಂಧಿಯ ಮೂಲಕ ತೈಲ ಸಾಗಣೆ ಚೇತರಿಸಿಕೊಳ್ಳುತ್ತಿದೆ. ‘ಕೆಪ್ಲರ್’ (Kpler) ಸಂಸ್ಥೆಯ ದತ್ತಾಂಶದ ಪ್ರಕಾರ, ಕಳೆದ ವಾರದಲ್ಲಿ ಈ ಮಾರ್ಗದಲ್ಲಿ ಪ್ರತಿದಿನ ಸರಾಸರಿ 13.2 ಮಿಲಿಯನ್ ಬ್ಯಾರೆಲ್ ತೈಲ ಸಾಗಣೆಯಾಗಿದೆ. ಇದು ಯುದ್ಧಪೂರ್ವದಲ್ಲಿದ್ದ ಪ್ರಮಾಣದ ಶೇ. 77 ರಷ್ಟಾಗಿದೆ. ಮುಂದಿನ 7 ದಿನಗಳಲ್ಲಿ ಹಾರ್ಮುಜ್ ಜಲಸಂಧಿಯನ್ನು ಸಂಪೂರ್ಣವಾಗಿ ಪುನಃ ತೆರೆಯಲು ಮಾತುಕತೆಗಳು ನಡೆಯುತ್ತಿದ್ದು, ಇರಾನ್ ಈ ಪ್ರಸ್ತಾಪವನ್ನು ಮುಂದಿಟ್ಟಿದೆ.
ಸೆಪ್ಟೆಂಬರ್ 24 ರಿಂದ 27 ರ ಅವಧಿಯಲ್ಲಿ ದೈನಂದಿನ ದೃಢೀಕೃತ ತೈಲ ಸಾಗಣೆಯ ಪ್ರಮಾಣವು ತೀವ್ರ ಏರುಪೇರು ಕಂಡಿದ್ದು, ದಿನಕ್ಕೆ ಸುಮಾರು 6.5 ಮಿಲಿಯನ್ ಬ್ಯಾರೆಲ್ನಿಂದ 12.6 ಮಿಲಿಯನ್ ಬ್ಯಾರೆಲ್ಗಳವರೆಗೆ ದಾಖಲಾಗಿದೆ. ಇತ್ತೀಚಿನ ದಿನಗಳ ಈ ಅಂಕಿ-ಅಂಶಗಳು ಪ್ರಾಥಮಿಕ ಮಾಹಿತಿಯಾಗಿದ್ದು, ಹೆಚ್ಚಿನ ಸಾಗಣೆಗಳು ದೃಢಪಟ್ಟಂತೆ ಈ ಪ್ರಮಾಣ ಇನ್ನೂ ಹೆಚ್ಚಾಗಬಹುದು ಎಂದು ‘ಕೆಪ್ಲರ್’ (Kpler) ಸಂಸ್ಥೆ ತಿಳಿಸಿದೆ.
ಮುಂದಿನ ಏಳು ದಿನಗಳ ಒಳಗಾಗಿ ಹಾರ್ಮುಜ್ ಜಲಸಂಧಿಯನ್ನು (Strait of Hormuz) ಸಂಪೂರ್ಣವಾಗಿ ಪುನಃ ತೆರೆಯಲು ನಡೆಯುತ್ತಿರುವ ಮಾತುಕತೆಗಳ ನಡುವೆಯೇ ಈ ತೈಲ ಸಾಗಣೆಯು ಚೇತರಿಕೆ ಕಂಡಿದೆ. ಈ ಜಲಸಂಧಿಯನ್ನು ಪುನಃ ತೆರೆಯುವ ಯೋಜನೆಯನ್ನು ಸ್ವತಃ ಇರಾನ್ ಪ್ರಸ್ತಾಪಿಸಿದೆ.
ಒಂದು ಕಡೆ ಸಂಘರ್ಷ ಶೀಘ್ರದಲ್ಲೇ ಮುಗಿಯಲಿದೆ ಎಂದು ಟ್ರಂಪ್ ಹೇಳುತ್ತಿದ್ದರೆ, ಇನ್ನೊಂದೆಡೆ ಇರಾನ್ ಸಂಸದ ಇಬ್ರಾಹಿಂ ಅಜೀಜಿ ಅವರು ಅಮೆರಿಕ ಮತ್ತು ಇಸ್ರೇಲ್ ಅನ್ನು ಈ ಪ್ರದೇಶದಿಂದ ಹೊರಹಾಕಲಾಗುವುದು ಎಂದು ಎಚ್ಚರಿಸಿದ್ದಾರೆ. ಇರಾನ್ ಸಂಸತ್ತಿನ ರಾಷ್ಟ್ರೀಯ ಭದ್ರತೆ ಮತ್ತು ವಿದೇಶಾಂಗ ನೀತಿ ಆಯೋಗದ ಮುಖ್ಯಸ್ಥರಾಗಿರುವ ಅಜೀಜಿ, “ಅಮೆರಿಕ ಅನಿವಾರ್ಯವಾಗಿ ಈ ಪ್ರದೇಶವನ್ನು ತೊರೆಯಬೇಕಾಗುತ್ತದೆ ಮತ್ತು ಜಿಯೋನಿಸ್ಟ್ (ಇಸ್ರೇಲ್) ಆಡಳಿತದ ದಿನಗಳು ಬೆರಳೆಣಿಕೆಯಷ್ಟಿವೆ. ಅಂತಿಮವಾಗಿ ನಾವೂ ಮತ್ತು ನಮ್ಮ ನೆರೆಹೊರೆಯವರೇ ಇಲ್ಲಿ ಮುಖಾಮುಖಿಯಾಗಿ ಉಳಿಯಲಿದ್ದೇವೆ. ಆ ದಿನ ಪಶ್ಚಾತ್ತಾಪದ ದಿನವಾಗಿರುತ್ತದೆ” ಎಂದು ಗುಡುಗಿದ್ದಾರೆ.
