ಈಗ, ಜಂಟಿ ಅವಾಮಿ ಕ್ರಿಯಾ ಸಮಿತಿ (ಜೆಎಎಸಿ) ಪಾಕಿಸ್ತಾನ ಆಡಳಿತಕ್ಕೆ 24 ಗಂಟೆಗಳ ಗಡುವು ನೀಡಿ ಎಚ್ಚರಿಕೆ ನೀಡಿದೆ. ತಮ್ಮ ಬೇಡಿಕೆಗಳನ್ನು ಈಡೇರಿಸದಿದ್ದರೆ ಪರಿಸ್ಥಿತಿ ಉಲ್ಬಣಗೊಳ್ಳಬಹುದು, ಮತ್ತಷ್ಟು ಹೋರಾಟ ಹೆಚ್ಚಾಗುತ್ತೆ ಎಂದು ಎಚ್ಚರಿಕೆ ನೀಡಿದೆ.

ರಾವಲಕೋಟ್‌ನಲ್ಲಿ ನಡೆದ ದೊಡ್ಡ ಸಾರ್ವಜನಿಕ ಸಭೆಯಲ್ಲಿ JAAC ನಾಯಕ ಸರ್ದಾರ್ ಅಮನ್ ಕಾಶ್ಮೀರಿ ಮಾತನಾಡುತ್ತಾ, ’ನಾವು ಶಾಂತಿಪ್ರಿಯ ಜನರು. ಹಿಂಸಾಚಾರಕ್ಕೆ ತಳ್ಳಬೇಡಿ. ನಮ್ಮ ಬೇಡಿಕೆಗಳನ್ನು ಈಡೇರಿಸಿ’ ಎಂದು ಹೇಳಿದರು. ಪಾಕಿಸ್ತಾನಿ ರೇಂಜರ್‌ಗಳು ಮತ್ತು ಭದ್ರತಾ ಪಡೆಗಳ ಹೆಚ್ಚಳವನ್ನು ಪ್ರಶ್ನಿಸಿದ ಅವರು, ಕಾಶ್ಮೀರ ಕಣಿವೆಯಲ್ಲಿ ಮಿಲಿಟರಿ ಬಲ ಹೆಚ್ಚಿಸಲು ಇಸ್ಲಾಮಾಬಾದ್‌ಗೆ ಯಾವುದೇ ಹಕ್ಕಿಲ್ಲ ಎಂದು ಆರೋಪಿಸಿದರು. ವಿಶ್ವಸಂಸ್ಥೆಯ ನಿರ್ಣಯಗಳನ್ನು ಉಲ್ಲೇಖಿಸಿ ಅವರು ಭದ್ರತಾ ಪಡೆಗಳನ್ನು ಹಿಂತೆಗೆದುಕೊಳ್ಳುವಂತೆ ಒತ್ತಾಯಿಸಿದರು. ಪ್ರತಿಭಟನಾಕಾರರು ‘ಈ ದೇಶ ನಮ್ಮದು’ ಎಂದು ಘೋಷಣೆ ಕೂಗಿದರು. ಒತ್ತಡದ ಹೊರತಾಗಿಯೂ ಪ್ರತಿಭಟನೆ ನಿಲ್ಲಿಸುವುದಿಲ್ಲ ಎಂದು ಪ್ರತಿಜ್ಞೆ ಮಾಡಿದ್ದಾರೆ.

JAAC ನಾಯಕ ಶೌಕತ್ ನವಾಜ್ ಮಿರ್ ಅವರು ಆಡಿಯೋ ಸಂದೇಶದ ಮೂಲಕ ಮುಜಫರಾಬಾದ್ ವಿಭಾಗದ ಜನರಿಗೆ ಜೂನ್ 23ರಂದು ಸಂಪೂರ್ಣ ಬಂದ್ ಆಚರಿಸುವಂತೆ ಮನವಿ ಮಾಡಿದ್ದಾರೆ. ಕಳೆದ ಕೆಲವು ವಾರಗಳಲ್ಲಿ PoKಯ ವಿವಿಧ ಭಾಗಗಳಲ್ಲಿ ದೊಡ್ಡ ರ್ಯಾಲಿಗಳು ನಡೆದಿವೆ. ಮಹಿಳೆಯರು ಸಹ ಭಾಗವಹಿಸುತ್ತಿದ್ದಾರೆ.

ಪ್ರತಿಭಟನಾಕಾರರು ಮುಖ್ಯವಾಗಿ ಮೂರು ವಿಷಯಗಳ ಬಗ್ಗೆ ಆಕ್ರೋಶ ವ್ಯಕ್ತಪಡಿಸುತ್ತಿದ್ದಾರೆ. ಭದ್ರತಾ ಪಡೆಗಳ ಭಾರೀ ನಿಯೋಜನೆ, ಕಾರ್ಯಕರ್ತರ ಮೇಲಿನ ದಮನ ಮತ್ತು ಬಂಧನ, ಹಣದುಬ್ಬರ, ವಿದ್ಯುತ್ ಮತ್ತು ನೀರಿನ ಕೊರತೆ ಎಂದು ತಿಳಿದುಬಂದಿದೆ.

24 ಗಂಟೆಗಳ ಅಂತಿಮ ಗಡುವು ಮುಗಿದ ನಂತರ ಪರಿಸ್ಥಿತಿ ಹೇಗೆ ಬದಲಾಗುತ್ತದೆ ಎಂಬುದನ್ನು ಎಲ್ಲರೂ ಕುತೂಹಲದಿಂದ ನೋಡುತ್ತಿದ್ದಾರೆ. JAAC ನಾಯಕರು ತಮ್ಮ ಹೋರಾಟವನ್ನು ಮುಂದುವರಿಸುವುದಾಗಿ ಸ್ಪಷ್ಟಪಡಿಸಿದ್ದಾರೆ. ಪಾಕಿಸ್ತಾನ ಸರ್ಕಾರ ಬೇಡಿಕೆಗಳನ್ನು ನಿರ್ಲಕ್ಷಿಸಿದರೆ PoKಯಲ್ಲಿ ವ್ಯಾಪಕ ಅಶಾಂತಿ ಉಂಟಾಗುವ ಸಾಧ್ಯತೆ ಇದೆ.