ಪೊಲೀಸ್ ತನಿಖೆಯಲ್ಲಿ ಇದು ಯೋಜಿತ ಕೊಲೆ ಎಂದು ತಿಳಿದುಬಂದಿದ್ದು, ಈತನ ಹೆಂಡತಿ ಮತ್ತು ಪ್ರಿಯಕರ ಸೇರಿ ಕೆಲಸ ಕಳೆದುಕೊಳ್ಳುವ ಭೀತಿಯಿಂದ ಕೊಲೆ ಮಾಡಿದ್ದಾರೆ ಎಂಬುದು ತನಿಖೆಯಲ್ಲಿ ಬಯಲಾಗಿದೆ.

ಅತುಲ್ ಕುಮಾರ್ ಹಸ್ತಿನಾಪುರ ಪ್ರದೇಶದಲ್ಲಿ ಖಾಸಗಿ ಶಾಲೆ ನಡೆಸುತ್ತಿದ್ದರು. ಅವರ ಪತ್ನಿ ದಾಮಿನಿ ಅದೇ ಶಾಲೆಯ ಪ್ರಾಂಶುಪಾಲರಾಗಿದ್ದರು. ಹತ್ತಿರದ ಹಳ್ಳಿಯ ನಿವಾಸಿ ತುಷಾರ್ ಎಂಬುವವರು ಅದೇ ಶಾಲೆಯ ಬಸ್ ಚಾಲಕರಾಗಿ ಕೆಲಸ ಮಾಡುತ್ತಿದ್ದರು. ಪೊಲೀಸ್ ತನಿಖೆ ಪ್ರಕಾರ, ದಾಮಿನಿ ಮತ್ತು ತುಷಾರ್ ನಡುವೆ ಅಕ್ರಮ ಸಂಬಂಧವಿತ್ತು. ಇದು ಅತುಲ್ ಕುಮಾರ್ ಮುಂದೆ ಬಯಲಾಗಿತ್ತು. ಅತುಲ್ ತುಷಾರ್‌ಗೆ ಶಾಲೆ ಕೆಲಸದಿಂದ ತೆಗೆದುಹಾಕುವುದಾಗಿ ಬೆದರಿಕೆ ಹಾಕಿದ್ದರು ಎನ್ನಲಾಗಿದೆ. ಹೀಗಾಗಿ ಕೆಲಸ ಕಳೆದುಕೊಳ್ಳುವ ಭಯ ಮತ್ತು ಸಂಬಂಧ ಬಹಿರಂಗವಾಗುವ ಭೀತಿಯಿಂದ ದಾಮಿನಿ ಮತ್ತು ತುಷಾರ್ ಇಬ್ಬರೂ ಅತುಲ್ ಅವರನ್ನು ಕೊಲ್ಲಲು ಸಂಚು ರೂಪಿಸಿದ್ದರು ಎಂದು ಪೊಲೀಸರು ತಿಳಿಸಿದ್ದಾರೆ.

ಆರೋಪಿಗಳು ಮೊದಲು ಅತುಲ್ ಅವರನ್ನು ರಸ್ತೆ ಅಪಘಾತದಲ್ಲಿ ಕೊಲ್ಲಲು ಪ್ರಯತ್ನಿಸಿದ್ದರಂತೆ. ಆದರೆ ಅದು ವಿಫಲವಾಯಿತು. ನಂತರ ಹತ್ತಿರದ ಹಳ್ಳಿಯಲ್ಲಿ ನಡೆದ ಒಂದು ಹಾವು ಕಡಿತ ಪ್ರಕರಣದ ಬಗ್ಗೆ ತುಷಾರ್‌ಗೆ ತಿಳಿಯಿತು. ಇದನ್ನು ಬಳಸಿಕೊಂಡು ಅವರು ಕೊಲೆಯನ್ನು ನೈಸರ್ಗಿಕ ಅಪಘಾತವಂತೆ ತೋರಿಸುವ ಪ್ಲಾನ್​ ಮಾಡಿದರು. ಪೊಲೀಸ್ ತನಿಖೆ ಪ್ರಕಾರ, ದಾಮಿನಿ ಅತುಲ್ ಕುಡಿಯುವ ಹಾಲಿಗೆ ನಿದ್ರೆ ಮಾತ್ರೆ ಬೆರೆಸಿ ಕೊಟ್ಟು ಗಾಢ ನಿದ್ರೆಗೆ ಜಾರುವಂತೆ ಮಾಡಿದಳು. ಅತುಲ್ ಪ್ರಜ್ಞೆ ತಪ್ಪಿದ ನಂತರ ಅವಳು ಮಕ್ಕಳನ್ನು ಬೇರೆ ಕೋಣೆಗೆ ಸ್ಥಳಾಂತರಿಸಿ, ನಂತರ ತುಷಾರ್ ತಂದಿದ್ದ ವಿಷಪೂರಿತ ಹಾವನ್ನು ಅತುಲ್ ಹಾಸಿಗೆಯಲ್ಲಿ ಬಿಟ್ಟಿದ್ದರು. ಹಾವು ಕಡಿತದಿಂದ ಅತುಲ್ ಸಾವನ್ನಪ್ಪಿದರು. ಇಬ್ಬರೂ ಇದನ್ನು ಸಾಮಾನ್ಯ ಹಾವು ಕಡಿತ ಅಪಘಾತ ಎಂದು ಬಿಂಬಿಸಲು ಪ್ರಯತ್ನಿಸಿದ್ದರು.

ಪ್ರಕರಣದ ತನಿಖೆಯಲ್ಲಿ ಪೊಲೀಸರು ಆರೋಪಿಗಳು ಗೂಗಲ್‌ನಲ್ಲಿ ಕೊಲೆ ವಿಧಾನಗಳನ್ನು ಹುಡುಕಿದ್ದು, ಹಲವು ಯೋಜನೆಗಳನ್ನು ರೂಪಿಸಿದ್ದು ಎಂದು ಕಂಡುಹಿಡಿದಿದ್ದಾರೆ. ಆರೋಪಿಗಳಾದ ದಾಮಿನಿ ಮತ್ತು ತುಷಾರ್ ಅವರನ್ನು ಬಂಧಿಸಿ ವಿಚಾರಣೆ ನಡೆಸಲಾಗುತ್ತಿದೆ. ಪ್ರಕರಣದಲ್ಲಿ ಹೊಸ ಹೊಸ ಸುಳಿವುಗಳು ಹೊರಬರುತ್ತಿವೆ.