ಮಿಡ್ ವೀಕ್ ಎಲಿಮಿನೇಷನ್‌ನಿಂದ ತಮ್ಮನ್ನು ರಕ್ಷಿಸಿಕೊಳ್ಳಲು ಮನೆಯಲ್ಲಿರುವ ಒಬ್ಬ ಸ್ಪರ್ಧಿಯನ್ನು ಹೊರಗಿಡಬೇಕಾಗಿದೆ. ಈ ಚಟುವಟಿಕೆಯಲ್ಲಿ ಯಾರು ಯಾರ ಹೆಸರನ್ನು ತೆಗೆದುಕೊಳ್ಳುತ್ತಾರೆ ಎಂಬುದೇ ಕುತೂಹಲಕ್ಕೆ ಕಾರಣವಾಗಿದೆ.

ಈ ನಡುವೆ ಫೇಕ್ ಎಲಿಮಿನೇಷನ್ ಮೂಲಕ ಮನೆಯಿಂದ ಹೊರಹೋಗಿದ್ದ ಮಂಜು ಮತ್ತು ಕಿರಣ್ ಮತ್ತೆ ದೊಡ್ಮನೆಗೆ ವಾಪಸ್ ಆಗಿದ್ದಾರೆ. ಕಿರಣ್ ಮತ್ತೆ ಮನೆಗೆ ಬಂದಿದ್ದನ್ನು ಕೆಲವರು ಖುಷಿಯಿಂದ ಸ್ವಾಗತಿಸಿದರೆ, ಮಂಜು ವಾಪಸ್ ಬಂದಿರುವುದಕ್ಕೆ ಕೆಲವರಿಂದ ಅಸಮಾಧಾನದ ಪ್ರತಿಕ್ರಿಯೆ ವ್ಯಕ್ತವಾಗಿದೆ.

ಮಂಜು ವಾಪಸಾತಿ ಕೆಲ ಸಹ ಸ್ಪರ್ಧಿಗಳಿಗೆ ಇಷ್ಟವಾಗಿಲ್ಲ ಎಂಬುದು ಚಟುವಟಿಕೆಯ ವೇಳೆ ಬಹಿರಂಗವಾಗಿದೆ. ಮಿಡ್ ವೀಕ್ ಎಲಿಮಿನೇಷನ್‌ನಿಂದ ಪಾರಾಗಲು ನಡೆಯುತ್ತಿದ್ದ ಪ್ರಕ್ರಿಯೆಯಲ್ಲಿ ಹೆಚ್ಚಿನವರು ಮಂಜು ಹೆಸರನ್ನೇ ಸೂಚಿಸಿರುವುದು ಗಮನ ಸೆಳೆದಿದೆ.

ಮಂಜು ಹೆಸರನ್ನು ಸೂಚಿಸಿದ ಕಾವ್ಯ, ಅವರಿಗೆ ಕ್ಯಾರೆಕ್ಟರ್ ಹಾಳು ಮಾಡುವುದಷ್ಟೇ ಗೊತ್ತಿದೆ ಎಂದು ಆರೋಪಿಸಿದ್ದಾರೆ. ಬಳಿಕ ಮಂಜು ಫೋಟೋ ಇರುವ ಬಾಟಲಿಯನ್ನು ಕಾಲಿನಿಂದ ತುಳಿದು ಕೆಳಗೆ ಬೀಳಿಸುವ ಮೂಲಕ ತಮ್ಮ ಆಕ್ರೋಶವನ್ನು ವ್ಯಕ್ತಪಡಿಸಿದ್ದಾರೆ.

ಇದಾದ ಬಳಿಕ ಧನುಷ್ ಕೂಡ ಮಂಜು ವಿರುದ್ಧ ತೀವ್ರವಾಗಿ ಮಾತನಾಡಿದ್ದಾರೆ. ಮಂಜುಗೆ ಗೇಮ್ ಆಡಲು ಇಲ್ಲಿ ಅರ್ಹತೆಯಿಲ್ಲ ಮತ್ತು ಈ ಮನೆಯಿಂದ ಹೋಗಬೇಕಿರುವ ಏಕೈಕ ವ್ಯಕ್ತಿ ಮಂಜು ಎಂದು ಹೇಳಿದ್ದಾರೆ. ಈ ಮಾತುಗಳು ದೊಡ್ಮನೆಯಲ್ಲಿ ಮತ್ತಷ್ಟು ಚರ್ಚೆಗೆ ಕಾರಣವಾಗಿವೆ.

ಭಾವುಕರಾದ ಮಂಜು ಬಳಿಕ ಸೌಂದರ್ಯ ಬಳಿ ತೆರಳಿ ತಮ್ಮಿಂದ ತಪ್ಪಾಗಿದೆ ಎಂದು ಒಪ್ಪಿಕೊಂಡಿದ್ದಾರೆ. ಇನ್ನು ಮುಂದೆ ಆ ರೀತಿಯಲ್ಲಿ ಮಾತನಾಡುವುದಿಲ್ಲ ಎಂದು ಭರವಸೆ ನೀಡಿದ ಅವರು, ಸೌಂದರ್ಯ ಅವರನ್ನು ಅಪ್ಪಿಕೊಂಡು ಕ್ಷಮೆ ಕೇಳಿದ್ದಾರೆ.