Last Updated:
ಚೊಚ್ಚಲ ಪ್ರಯತ್ನದಲ್ಲೇ ಪದಕ ಗೆದ್ದ ಹೊರತಾಗಿಯೂ ಸುಚಿಕಾ ತರಿಯಾಲ್ ತೀವ್ರ ಬೇಸರಗೊಂಡು ಕಣ್ಣೀರಿಟ್ಟರು. ಡ್ರಾ ಆದರೂ ತೀರ್ಪುಗಾರರು ಟಿಯೊ ಪರವಾಗಿ ಅಂತಿಮ ನಿರ್ಧಾರ ಪ್ರಕಟವಾದ ತಕ್ಷಣ ಸುಚಿಕಾ ಮ್ಯಾಟ್ ಮೇಲೆಯೇ ಬಿದ್ದು ಬಿಕ್ಕಿ ಬಿಕ್ಕಿ ಅತ್ತರು.
ಭಾರತದ ಸುಚಿಕಾ ತರಿಯಾಲ್ ಏಷ್ಯನ್ ಗೇಮ್ಸ್ನ (Asian Games) ಮಹಿಳೆಯರ ಸಾಂಪ್ರದಾಯಿಕ 60 ಕೆಜಿ ಮಿಸ್ಕ್ಡ್ ಮಾರ್ಷಲ್ ಆರ್ಟ್ಸ್ (MMA) ಇವೆಂಟ್ನಲ್ಲಿ ಕಂಚಿನ ಪದಕ ಗೆದ್ದು ಇತಿಹಾಸ ನಿರ್ಮಿಸಿದ್ದಾರೆ. ಇಬ್ಬರು ಫೈಟರ್ಗಳ ನಡುವಿನ ಕಠಿಣ ಹಣಾಹಣಿ ಡ್ರಾ ಆದ ನಂತರ, ಕಡಿಮೆ ತೂಕದ ಆಧಾರದ ಮೇಲೆ ಸಿಂಗಾಪುರದ ಹುಯಿ ಹೂನ್ ಟಿಯೊ ಅವರನ್ನು ಸೆಮಿಫೈನಲ್ನಲ್ಲಿ ವಿಜೇತರೆಂದು ಘೋಷಿಸಲಾಯಿತು. ಆದರೂ ಏಷ್ಯನ್ ಕ್ರೀಡಾಕೂಟದ 20ನೇ ಆವೃತ್ತಿಯಲ್ಲಿ ಎಂಎಂಎ ವಿಭಾಗದಲ್ಲಿ ಚೊಚ್ಚಲ ಪ್ರವೇಶ ಪಡೆದಿದ್ದ ಭಾರತ ಮೊದಲ ಪ್ರಯತ್ನದಲ್ಲೇ ಪದಕ ತನ್ನದಾಗಿಸಿಕೊಂಡಿರುವುದು ಕೂಡ ಹೆಮ್ಮೆಯ ಸಾಧನೆಯಾಗಿದೆ. ಈ ಕಂಚಿನ ಪದಕದೊಂದಿಗೆ ಭಾರತದ ಒಟ್ಟು ಪದಕಗಳ ಸಂಖ್ಯೆ ಆರಕ್ಕೆ ಏರಿತು. ಶೂಟರ್ಗಳು ಇದುವರೆಗೆ ನಾಲ್ಕು ಬೆಳ್ಳಿ ಮತ್ತು ಒಂದು ಕಂಚಿನ ಪದಕವನ್ನು ಗೆದ್ದಿದ್ದಾರೆ.
ಚೊಚ್ಚಲ ಪ್ರಯತ್ನದಲ್ಲೇ ಪದಕ ಗೆದ್ದ ಹೊರತಾಗಿಯೂ ಸುಚಿಕಾ ತರಿಯಾಲ್ ತೀವ್ರ ಬೇಸರಗೊಂಡು ಕಣ್ಣೀರಿಟ್ಟರು. ತೀರ್ಪುಗಾರರು ಟಿಯೊ ಪರವಾಗಿ ಅಂತಿಮ ನಿರ್ಧಾರ ಪ್ರಕಟವಾದ ತಕ್ಷಣ ಸುಚಿಕಾ ಮ್ಯಾಟ್ ಮೇಲೆಯೇ ಬಿದ್ದು ಬಿಕ್ಕಿ ಬಿಕ್ಕಿ ಅತ್ತರು. ಹರಿಯಾಣದ ರೋಹ್ಟಕ್ ಜಿಲ್ಲೆಯ ಕಿಲೋಯ್ ಗ್ರಾಮದ ನಿವಾಸಿಯಾದ 36 ವರ್ಷದ ಸುಚಿಕಾ 2024ರ ಜಿಯು-ಜಿತ್ಸು ವಿಶ್ವ ಚಾಂಪಿಯನ್ ಆಗಿದ್ದಾರೆ. ಅವರು 2022ರ ಕಾಮನ್ವೆಲ್ತ್ ಗೇಮ್ಸ್ನಲ್ಲಿ ಜೂಡೋದಲ್ಲಿ ಮತ್ತು 2022ರ ಏಷ್ಯನ್ ಗೇಮ್ಸ್ನಲ್ಲಿ ಕುರಾಶ್ ಫೈಟರ್ ಆಗಿ ದೇಶವನ್ನು ಪ್ರತಿನಿಧಿಸಿದ್ದರು.
ಸುಚಿಕಾ ತಮ್ಮ ಪಂದ್ಯದ ನಂತರ ಪಿಟಿಐ ಜೊತೆಗಿನ ವಿಶೇಷ ಸಂಭಾಷಣೆಯಲ್ಲಿ, “ಇಂದಿನ ಪಂದ್ಯದ ಫಲಿತಾಂಶದಿಂದ ನನಗೆ ಸ್ವಲ್ಪ ನಿರಾಶೆಯಾಗಿದೆ, ಏಕೆಂದರೆ ನಾನೇ ಈ ಫೈಟ್ನಲ್ಲಿ ಗೆದ್ದಿದ್ದೇನೆ ಎಂದು ನನಗೆ ಅನಿಸಿತ್ತು. ಈ ಫಲಿತಾಂಶವನ್ನು ಒಪ್ಪಿಕೊಳ್ಳಲು ನನಗೆ ಸಾಧ್ಯವಾಗುತ್ತಿಲ್ಲ. ಇದು ಅನ್ಯಾಯ ಎಂದು ನಾನು ಹೇಳುತ್ತಿದ್ದೆ, ಏಕೆಂದರೆ ಒಬ್ಬ ಕ್ರೀಡಾಪಟುವನ್ನು ನೀವು ನೋಡಿದರೆ, ಅವರು ಎಲ್ಲೆಡೆ ವಿಭಾಗದಲ್ಲೂ 100 ಪ್ರತಿಶತವನ್ನು ನೀಡುತ್ತಾರೆ. ಹಾಗಾಗಿ ಈ ನಿರ್ಧಾರವು ಅನ್ಯಾಯವಾಗಿದೆ ಎಂದು ಅನಿಸಿದರೆ, ಧ್ವನಿ ಎತ್ತುವುದು ನನ್ನ ಹಕ್ಕಾಗಿದೆ,” ಎಂದು ಹೇಳಿದರು.
ಏಷ್ಯನ್ ಗೇಮ್ಸ್ನ ಮಿಸ್ಕ್ಡ್ ಮಾರ್ಷಲ್ ಆರ್ಟ್ಸ್ನಲ್ಲಿ ಪದಕ ಗೆದ್ದ ಮೊದಲ ಭಾರತೀಯ ಅಥ್ಲೀಟ್ ಎಂಬ ಹೆಮ್ಮೆ ಸುಚಿತಾ (ಸುಚಿಕಾ) ಅವರಿಗಿತ್ತು. “ನಾನು ನನ್ನ 100 ಪ್ರತಿಶತವನ್ನು ನೀಡಿದ್ದೇನೆ ಮತ್ತು ಇಲ್ಲಿಯವರೆಗೆ ತಲುಪಲು ಕಠಿಣ ಪರಿಶ್ರಮ ಪಟ್ಟಿದ್ದೇನೆ. ದೇಶಕ್ಕಾಗಿ ಕಂಚಿನ ಪದಕ ಗೆದ್ದಿರುವುದಕ್ಕೆ ನನಗೆ ಸಂತೋಷವಿದೆ” ಎಂದು ಅವರು ಹೇಳಿದರು.
ಕಠಿಣವಾಗಿದ್ದ ಈ ಪಂದ್ಯದ ತೀರ್ಪನ್ನು ಆರಂಭದಲ್ಲಿ ಟಿಯೊಗೆ ಗೆಲುವು ಎಂದು ನೀಡಲಾಗಿತ್ತು, ಆದರೆ ಭಾರತದ ಸವಾಲಿನ (Challenge) ನಂತರ, ಆರು ಜಡ್ಜ್ಗಳ ವಿಭಜಿತ ನಿರ್ಧಾರದೊಂದಿಗೆ ಫಲಿತಾಂಶವನ್ನು ಡ್ರಾ ಎಂದು ಘೋಷಿಸಲಾಯಿತು. ನಂತರ ಅಂತರರಾಷ್ಟ್ರೀಯ ಫೆಡರೇಶನ್ ನಿಯಮಗಳ ಅಡಿಯಲ್ಲಿ, ಬೆಳಗ್ಗಿನ ತೂಕದ ಸಮಯದಲ್ಲಿ ಫೈಟರ್ಗಳಾಗಿದ್ದ ತೂಕದ ಆಧಾರದ ಮೇಲೆ ವಿಜೇತರನ್ನು ನಿರ್ಧರಿಸಲಾಯಿತು. ಸಿಂಗಾಪುರದ ಆಟಗಾರ್ತಿಯ ತೂಕವು ಸುಚಿಕಾ ಅವರಿಗಿಂತ 700 ಗ್ರಾಂ ಕಡಿಮೆಯಿದ್ದ ಕಾರಣ, ಅವರನ್ನು ವಿಜೇತರೆಂದು ಘೋಷಿಸಿ ಫೈನಲ್ಗೆ ಕಳುಹಿಸಲಾಯಿತು. ಸುಚಿಕಾ ಕಂಚಿನ ಪದಕಕ್ಕೆ ತೃಪ್ತಿಪಡಬೇಕಾಯಿತು.
ಎಮ್ಎಮ್ಎ (MMA) ಸ್ಪೋರ್ಟ್ಸ್ ಫೆಡರೇಶನ್ ಅಧ್ಯಕ್ಷ ನಿಖಿಲ್ ಕುಂದರ್ ಪಿಟಿಐಗೆ ಮಾಹಿತಿ ನೀಡಿ, “ನಾವು 1000 ಯುಎಸ್ ಡಾಲರ್ ಮಧ್ಯಸ್ಥಿಕೆ ಶುಲ್ಕವನ್ನು (Arbitration Fee) ಪಾವತಿಸಿ ಜಡ್ಜ್ಗಳ ನಿರ್ಧಾರಕ್ಕೆ ಸವಾಲು ಹಾಕಿದೆವು. ಮಧ್ಯಸ್ಥಿಕೆ ವಹಿಸಲು ಮತ್ತು ಪಂದ್ಯವನ್ನು ಮರು-ಸ್ಕೋರ್ ಮಾಡಲು ಮೂವರು ಹೊಸ ಜಡ್ಜ್ಗಳನ್ನು ಹಿಂದಿನ ಮೂವರನ್ನು ಹೊರತುಪಡಿಸಿ ಸೇರಿಸಲಾಯಿತು. ಆ ಮೂವರು ಹೊಸ ಜಡ್ಜ್ಗಳು ಪಂದ್ಯವನ್ನ ಡ್ರಾ ಎಂದು ಘೋಷಿಸಿದರು. ಸಿಂಗಾಪುರ ತಂಡದ ಬಳಿ ಮತ್ತೊಂದು ಕೌಂಟರ್-ಆರ್ಬಿಟ್ರೇಷನ್ ಆಯ್ಕೆ ಇತ್ತು, ಅಲ್ಲಿ ಇನ್ನೂ ಮೂವರು ಜಡ್ಜ್ಗಳು ಬಂದು ಪಂದ್ಯವನ್ನು ಮತ್ತೆ ಸ್ಕೋರ್ ಮಾಡಬಹುದಿತ್ತು, ಅಥವಾ ಬೆಳಗ್ಗಿನ ತೂಕದ ಅವಧಿಯಲ್ಲಿ ದಾಖಲಾದ ತೂಕಕ್ಕೆ ಹೋಗಬಹುದಿತ್ತು. ಇದು ಐಎಮ್ಎಮ್ಎಎಫ್ (IMMAFF – ಇಂಟರ್ನ್ಯಾಷನಲ್ ಮಿಸ್ಕ್ಡ್ ಮಾರ್ಷಲ್ ಆರ್ಟ್ಸ್ ಫೆಡರೇಶನ್) ನಿಯಮವಾಗಿದೆ,” ಎಂದರು.
ಪಂದ್ಯ ಡ್ರಾ ಆದರೂ ಟಿಯೋ ಕಡಿಮೆ ತೂಕ ಹೊಂದಿರುವುದರಿಂದ ಫೈನಲ್ ಪ್ರವೇಶಿಸಿದರು. ಈ ತೀರ್ಪು ಕೇಳಿ ಸುಚಿಕಾ ಕಣ್ಣೀರಿಟ್ಟರು. ಆದರೂ ಅವರು ತಮ್ಮನ್ನು ತ್ರಿವರ್ಣ ಧ್ವಜದಲ್ಲಿ ಸುತ್ತಿಕೊಂಡು ಮೈದಾನಕ್ಕೆ ಒಂದು ಸಣ್ಣ ಗೌರವ ಪ್ರದಕ್ಷಿಣೆ ಹಾಕಿದರು. ನಿರಾಶೆಯ ಹೊರತಾಗಿಯೂ, ಈ ಕಂಚಿನ ಪದಕವು ಏಷ್ಯನ್ ಗೇಮ್ಸ್ನ ಮಿಸ್ಕ್ಡ್ ಮಾರ್ಷಲ್ ಆರ್ಟ್ಸ್ನಲ್ಲಿ ಭಾರತದ ಮೊದಲ ಪದಕವಾಗಿದೆ.
