ಇತ್ತೀಚೆಗೆ ತಮ್ಮ ಮುಂಬರುವ ಚಿತ್ರ ‘ಪರಿಮಳ ಆಂಡ್ ಕೋ’ ಪ್ರಚಾರ ಕಾರ್ಯಕ್ರಮದಲ್ಲಿ ಭಾಗವಹಿಸಿದ್ದ ನಟ ಜಯರಾಂ, ಅಭಿಮಾನಿಗಳ ಪ್ರಶ್ನೆಗಳಿಗೆ ಉತ್ತರಿಸುತ್ತಿದ್ದರು. ಈ ವೇಳೆ ಒಬ್ಬ ಅಭಿಮಾನಿ, ತಮ್ಮ ಜೀವನದಲ್ಲಿ ಅತ್ಯಂತ ವಿಶೇಷವಾದ ಅಭಿಮಾನಿ ಭೇಟಿಯ ಅನುಭವ ಯಾವುದು ಎಂದು ಪ್ರಶ್ನಿಸಿದರು.
ಇದಕ್ಕೆ ಉತ್ತರಿಸಿದ ಜಯರಾಂ, ಕೆಲವೇ ದಿನಗಳ ಹಿಂದೆ ಚೆನ್ನೈನಲ್ಲಿ ನಡೆದ ಐಪಿಎಲ್ ಪಂದ್ಯದಲ್ಲಿ ಧೋನಿ ಪತ್ನಿ ಸಾಕ್ಷಿ ಧೋನಿ ಅವರನ್ನು ಭೇಟಿಯಾದ ಸಂದರ್ಭವನ್ನು ನೆನಪಿಸಿಕೊಂಡರು. ಪಂದ್ಯ ವೀಕ್ಷಣೆಗೆ ತೆರಳಿದ್ದ ವೇಳೆ ಸಾಕ್ಷಿ ಧೋನಿ ಹಠಾತ್ತನೆ ತಮ್ಮ ಬಳಿ ಬಂದು ಕಾಲಿಗೆ ನಮಸ್ಕರಿಸಿದ ಕ್ಷಣವನ್ನು ಅವರು ವಿವರಿಸಿದರು.
ಈ ವಿಶೇಷ ಘಟನೆಯ ಹಿಂದಿನ ಕಾರಣ ಇನ್ನೂ ಹೆಚ್ಚು ಭಾವನಾತ್ಮಕವಾಗಿದೆ. ಜಯರಾಂ ಅವರ ಪ್ರಕಾರ, ಧೋನಿ ಮತ್ತು ಸಾಕ್ಷಿ ಅವರ ಪುತ್ರಿ ಜೀವಾ ಧೋನಿಗೆ ಬಾಲ್ಯದಲ್ಲಿ ಮಲಯಾಳಿ ಕೇರ್ಟೇಕರ್ ಒಬ್ಬರು ನಿದ್ದೆ ಬರಿಸಲು ಜಯರಾಂ ಅಭಿನಯದ ಚಿತ್ರದ ಪ್ರಸಿದ್ಧ ‘ಅಂಬಲಪ್ಪುಳ ಉಣ್ಣಿಕಣ್ಣನೋಡು’ ಹಾಡನ್ನು ಹಾಡುತ್ತಿದ್ದರು.
ಆ ಹಾಡನ್ನು ಕೇಳುತ್ತಲೇ ಜೀವಾ ಮಲಗುವ ಅಭ್ಯಾಸ ಬೆಳೆಸಿಕೊಂಡಿದ್ದಳು. ವರ್ಷಗಳ ಕಾಲ ಆ ಹಾಡು ಮತ್ತು ಜಯರಾಂ ಅವರ ಹೆಸರು ಧೋನಿ ಕುಟುಂಬದ ನೆನಪುಗಳಲ್ಲಿ ಉಳಿದುಕೊಂಡಿತ್ತು. ಇದೇ ಕಾರಣದಿಂದ ಸಾಕ್ಷಿ ಧೋನಿ ಅವರಿಗೆ ನಟ ಜಯರಾಂ ಅವರ ಮೇಲೆ ವಿಶೇಷ ಗೌರವ ಮತ್ತು ಅಭಿಮಾನ ಬೆಳೆದಿತ್ತು ಎಂದು ತಿಳಿದುಬಂದಿದೆ.
ಈ ಘಟನೆಯನ್ನು ನೆನಪಿಸಿಕೊಂಡ ಜಯರಾಂ, ಒಂದು ಕ್ಷಣ ನಾನು ಸಂಪೂರ್ಣವಾಗಿ ಬೆರಗಾಗಿದ್ದೆ. ಸಾಕ್ಷಿ ನನ್ನನ್ನು ತಪ್ಪಾಗಿ ಗುರುತಿಸಿದ್ದಾರೆಯೇ ಎಂದುಕೊಂಡೆ. ಆದರೆ ಅವರು ನನ್ನ ಬಗ್ಗೆ ಎಲ್ಲವನ್ನೂ ತಿಳಿದಿದ್ದರು. ಅವರ ಮಗಳ ಬಾಲ್ಯದೊಂದಿಗೆ ನನ್ನ ಹಾಡು ಬೆಸೆದುಕೊಂಡಿದೆ ಎಂಬ ವಿಚಾರ ಕೇಳಿ ನನಗೆ ತುಂಬಾ ಸಂತೋಷ ಮತ್ತು ಭಾವನಾತ್ಮಕ ಅನುಭವವಾಯಿತು ಎಂದು ಹೇಳಿದ್ದಾರೆ.
