1970ರಲ್ಲಿ ಬಿಡುಗಡೆಯಾದ ತೆಲುಗಿನ ‘ಸಿಐಡಿ ರಾಜು’ ಸಿನಿಮಾದ ‘ನನ್ನು ಚೂಸಿ ಅಂತಗಾನ’ ಹಾಡು ಭಾರತೀಯ ಚಿತ್ರಸಂಗೀತದ ಇತಿಹಾಸದಲ್ಲೇ ವಿಶೇಷ ಸ್ಥಾನ ಪಡೆದಿದೆ. ಈ ಹಾಡಿನಲ್ಲಿ ಎಸ್. ಜಾನಕಿ ಸಂಪೂರ್ಣವಾಗಿ ಪುರುಷನ ಧ್ವನಿಯನ್ನು ಅನುಕರಿಸಿ ಹಾಡಿದ್ದರು. ಹಾಡನ್ನು ಕೇಳಿದವರು ಇದನ್ನು ಮಹಿಳಾ ಗಾಯಕಿ ಹಾಡಿದ್ದಾರೆ ಎಂದು ಊಹಿಸುವುದೇ ಕಷ್ಟವಾಗುವಷ್ಟು ನೈಜವಾಗಿ ಅವರು ಧ್ವನಿಯನ್ನು ಬದಲಿಸಿಕೊಂಡಿದ್ದರು.

ಗಂಡಿನ ಧ್ವನಿಯಷ್ಟೇ ಅಲ್ಲ, ಮಕ್ಕಳ ಧ್ವನಿಯಲ್ಲೂ ಹಾಡುವ ಅದ್ಭುತ ಸಾಮರ್ಥ್ಯ ಎಸ್. ಜಾನಕಿ ಅವರಲ್ಲಿತ್ತು. 1989ರಲ್ಲಿ ಬಿಡುಗಡೆಯಾದ ‘ಸಂಸಾರ ಸಂಗೀತಂ’ ಸಿನಿಮಾದಲ್ಲಿ ಟಿ. ರಾಜೇಂದರ್ ಸಂಗೀತ ನಿರ್ದೇಶನದಲ್ಲಿ ಮೂಡಿಬಂದ ‘ಐ ಆ್ಯಮ್ ಎ ಲಿಟಲ್ ಸ್ಟಾರ್’ ಹಾಡನ್ನು ಅವರು ಪುಟ್ಟ ಬಾಲಕನ ಧ್ವನಿಯಲ್ಲಿ ಹಾಡಿದ್ದರು.

ಈ ಹಾಡಿನಲ್ಲಿ ಬಾಲನಟ ಸಿಂಬು ತೆರೆಯ ಮೇಲೆ ಕಾಣಿಸಿಕೊಂಡಿದ್ದು, ಜಾನಕಿ ಅವರ ಧ್ವನಿ ಆ ಪಾತ್ರಕ್ಕೆ ಜೀವ ತುಂಬಿತ್ತು. ಹಾಡು ಬಿಡುಗಡೆಯಾದ ನಂತರ ಭಾರೀ ಜನಪ್ರಿಯತೆ ಪಡೆದು ಇಂದಿಗೂ ನೆನಪಿನಲ್ಲಿರುವ ಮಕ್ಕಳ ಹಾಡುಗಳಲ್ಲಿ ಒಂದಾಗಿದೆ.

ಗಾಯಕಿ ಎಸ್. ಜಾನಕಿ ಅವರು ದೈಹಿಕವಾಗಿ ನಮ್ಮೊಂದಿಗಿಲ್ಲದಿದ್ದರೂ, ಅವರ ಧ್ವನಿ ಎಂದೆಂದಿಗೂ ಸಂಗೀತ ಲೋಕದಲ್ಲಿ ಮೊಳಗುತ್ತಲೇ ಇರುತ್ತದೆ. ಗಂಡಿನ ಧ್ವನಿಯಲ್ಲಿ ಹಾಡಿ ದೇಶವನ್ನೇ ಅಚ್ಚರಿಗೊಳಿಸಿದ ಅವರ ಅಪರೂಪದ ಪ್ರತಿಭೆ, ಮಕ್ಕಳ ಧ್ವನಿಯಲ್ಲಿ ಹಾಡಿ ಮನ ಗೆದ್ದ ಅವರ ಕಲೆ ಹಾಗೂ ಸಾವಿರಾರು ಅಮರ ಗೀತೆಗಳು ಅವರನ್ನು ಭಾರತೀಯ ಸಂಗೀತ ಇತಿಹಾಸದ ಶಾಶ್ವತ ದಂತಕಥೆಯಾಗಿ ಉಳಿಸಿವೆ.