ಇಂಗ್ಲೆಂಡ್ ವಿರುದ್ಧ ನಡೆದ ಎರಡನೇ ಟಿ20 ಪಂದ್ಯದಲ್ಲಿ ಟೀಂ ಇಂಡಿಯಾ ಯಾರು ಊಹೆ ಮಾಡದ ರೀತಿಯಲ್ಲಿ ಸೋಲುಂಡಿತ್ತು. ಗೆಲುವು ಸನಿಹ ಇದ್ದ ಟೀಂ ಇಂಡಿಯಾ ಏಕಾಏಕಿ ಸೋಲಿನ ದವಡೆ ಸಿಲುಕಿತ್ತು. ಇದರೊಂದಿಗೆ ಸರಣಿಯಲ್ಲಿ ಹಿನ್ನಡೆ ಅನುಭವಿಸಿತು. ಪಂದ್ಯದ ಬಳಿಕ ಮಾತನಾಡಿದ ಭಾರತ ನಾಯಕ ಶ್ರೇಯಸ್ ಅಯ್ಯರ್, ಭಾವುಕರಾಗಿ ಪ್ರತಿಕ್ರಿಯೆ ನೀಡಿದ್ದರು. ಅಸಲಿಗೆ ಮ್ಯಾಚ್ ಎಲ್ಲಿ ಕೈತಪ್ಪಿತು, ಯಾರ ಕಾರಣದಿಂದ ಸೋಲು ಎದುರಾಯ್ತು ಎಂದು ಕ್ಯಾಪ್ಟನ್ ನೀಡಿದ ಪ್ರತಿಕ್ರಿಯೆ, ಈಗ ಕ್ರಿಕೆಟ್ ಅಭಿಮಾನಿಗಳ ನಡುವೆ ಭಾರೀ ಚರ್ಚೆಗೆ ಕಾರಣವಾಗಿದೆ.

ಕೊನೆಯ 24 ಎಸೆತಗಳಲ್ಲಿ ಇಂಗ್ಲೆಂಡ್ ತಂಡಕ್ಕೆ 49 ರನ್‌ಗಳು ಬೇಕಾಗಿತ್ತು. ಕ್ರಿಸ್‌ನಲ್ಲಿ ಜಾಕಬ್ ಬೆಥಲ್ ಬಿರುಸಿನ ಬ್ಯಾಟಿಂಗ್ ಮಾಡುತ್ತಿದ್ದರು. ಇಂತಹ ರೋಚಕ ಕ್ಷಣಗಳಲ್ಲಿ ಶ್ರೇಯಸ್ ಅಯ್ಯರ್ 17ನೇ ಓವರ್ ಅನ್ನು ಬೌಲ್ ಮಾಡಲು ರವಿ ಬಿಷ್ಣೋಯ್ ಅವರಿಗೆ ಚೆಂಡು ನೀಡಿದ್ದರು. ಆದರೆ ಈ ಒಂದು ಓವರ್ ಟೀಂ ಇಂಡಿಯಾ ಅಭಿಮಾನಿಗಳ ಹೃದಯ ಬ್ರೇಕ್ ಆಗುವಂತೆ ಮಾಡಿತ್ತು.

ಪಂದ್ಯದ ಬಳಿಕ ಮಾತನಾಡಿದ ಕ್ಯಾಪ್ಟನ್ ಶ್ರೇಯಸ್, ಸೋಲಿನ ಬಗ್ಗೆ ಬೇಸರ ಹೊರ ಹಾಕಿದರು. ಈ ಪಂದ್ಯದಲ್ಲಿ ಎಲ್ಲಿ ತಪ್ಪು ಆಯ್ತು ಅಂತ ನಮಗೆ ಸ್ಪಷ್ಟವಾಗಿ ತಿಳಿದಿದೆ. 15ನೇ ಓವರ್ ವರೆಗೂ ನಾವು ಅತ್ಯುತ್ತಮ ಸ್ಥಾನದಲ್ಲಿದ್ದೇವು. ಆದರೆ 17ನೇ ಓವರ್ ನಮ್ಮಿಂದ ಗೆಲುವನ್ನು ದೂರ ಮಾಡಿತ್ತು. ರವಿ ಹಾಕಿದ ನೋ ಬಾಲ್ಸ್, ಅನಗತ್ಯ ಸಿಕ್ಸರ್ ಗಳೊಂದಿಗೆ ಗೇಮ್ ಇಂಗ್ಲೆಂಡ್ ಕಡೆ ಆಯ್ತು. ಏನೇ ಆದರೂ ಈ ತಪ್ಪುಗಳಿಂದ ಖಂಡಿತ ಪಾಠ ಕಲಿತುಕೊಳ್ಳಬೇಕು ಎಂದು ಹೇಳಿದರು.

ಇದೇ ಸಮಯದಲ್ಲಿ ಇಂಗ್ಲೆಂಡ್ ಬ್ಯಾಟರ್ ಜಾಕಬ್ ಬೆಥಲ್ ಇನ್ನಿಂಗ್ಸ್ ಅನ್ನು ಶ್ರೇಯಸ್ ಅಯ್ಯರ್ ಪ್ರಶಂಸೆ ವ್ಯಕ್ತಪಡಿಸಿದ್ದಾರೆ. 46 ಎಸೆತಗಳಲ್ಲಿ 76 ರನ್ ಗಳಿಸಿ ಇಂಗ್ಲೆಂಡ್ ಗೆದ್ದ ರೀತಿ ಅದ್ಭುತ ಎಂದು ಬಣ್ಣಿಸಿದ್ದಾರೆ. ಇನ್ನು ಬೌಲಿಂಗ್‌ನಲ್ಲಿ ಸ್ಯಾಮ್ ಕರನ್, ಸತತವಾಗಿ ವಿಕೆಟ್ ಪಡೆದುಕೊಂಡು ಟೀಂ ಇಂಡಿಯಾ ಸ್ಕೋರ್ 200ರ ಗಡಿದಾಟದಂತೆ ಮಾಡಿದ್ದರು. ಯುವ ಆಟಗಾರ ವೈಭವ್ ಸೂರ್ಯವಂಶಿ ಬಗ್ಗೆ ಮಾತನಾಡಿ, ಆತನಿಗೆ ಯಾವುದೇ ಭಯ ಇಲ್ಲ, ಮುಂಬರುವ ಪಂದ್ಯಗಳಲ್ಲಿ ಖಂಡಿತ ಉತ್ತಮ ಪ್ರದರ್ಶನ ನೀಡುತ್ತಾರೆ ಎಂದು ವಿಶ್ವಾಸ ವ್ಯಕ್ತಪಡಿಸಿದರು.