ಪ್ರಸ್ತುತ ಪಾಯಿಂಟ್ ಟೇಬಲ್ ಪ್ರಕಾರ, ಸನ್‌ರೈಸರ್ಸ್ ಹೈದರಾಬಾದ್ 12 ಪಂದ್ಯಗಳಿಂದ 14 ಅಂಕಗಳೊಂದಿಗೆ ಮೂರನೇ ಸ್ಥಾನದಲ್ಲಿದೆ. ಹೈದರಾಬಾದ್ ಇಂದಿನ ಪಂದ್ಯವನ್ನು ಗೆದ್ದರೆ, ಅದು 16 ಅಂಕಗಳೊಂದಿಗೆ ನೇರವಾಗಿ ಪ್ಲೇಆಫ್ ಸ್ಥಾನವನ್ನು ಖಚಿತಪಡಿಸಿಕೊಳ್ಳುತ್ತದೆ. ಈ ಗೆಲುವಿನೊಂದಿಗೆ ಹೈದರಾಬಾದ್ ಮಾತ್ರವಲ್ಲದೆ, ಗುಜರಾತ್ ಟೈಟಾನ್ಸ್ ಕೂಡ ಅಧಿಕೃತವಾಗಿ ಪ್ಲೇಆಫ್‌ಗೆ ಅರ್ಹತೆ ಪಡೆಯಲಿದೆ.

ಗುಜರಾತ್ ಈಗಾಗಲೇ 13 ಪಂದ್ಯಗಳಿಂದ 16 ಅಂಕಗಳೊಂದಿಗೆ ಎರಡನೇ ಸ್ಥಾನದಲ್ಲಿದೆ. ಸಿಎಸ್‌ಕೆ ಆರೆಂಜ್ ಆರ್ಮಿ ವಿರುದ್ಧ ಸೋತರೆ, ಗುಜರಾತ್ ಪ್ಲೇಆಫ್ ಓಟದಲ್ಲಿ ಸುರಕ್ಷಿತ ಸ್ಥಾನವನ್ನು ತಲುಪುತ್ತದೆ. ಹೀಗಾಗಿ ಚೆನ್ನೈ ತಂಡವನ್ನು ಸೋಲಿಸಲು ಆರೆಂಜ್ ಆರ್ಮಿ ಪಣ ತೊಟ್ಟಿದೆ.

ಮತ್ತೊಂದೆಡೆ, ಚೆನ್ನೈ ಸೂಪರ್ ಕಿಂಗ್ಸ್ ತಂಡವು 12 ಪಂದ್ಯಗಳಿಂದ 6 ಜಯಗಳೊಂದಿಗೆ 12 ಅಂಕಗಳೊಂದಿಗೆ ಪ್ರಸ್ತುತ ಆರನೇ ಸ್ಥಾನದಲ್ಲಿದೆ. ಈ ಪಂದ್ಯವು ಹಾಲಿ ಚಾಂಪಿಯನ್‌ ಆರ್​​ಸಿಬಿಗೆ ಬಹಳ ನಿರ್ಣಾಯಕವಾಗಿದೆ. ಈ ಪಂದ್ಯದಲ್ಲಿ ರುತುರಾಜ್ ಪಡೆ ಅದ್ಭುತ ಪ್ರದರ್ಶನ ನೀಡಿ ಗೆದ್ದರೆ, ಚೆನ್ನೈನ ಪ್ಲೇಆಫ್ ಭರವಸೆ ಜೀವಂತವಾಗಿರುತ್ತದೆ. ಇದಲ್ಲದೆ, ಚೆನ್ನೈ ಗೆದ್ದರೆ, ಈಗಾಗಲೇ ಅರ್ಹತೆ ಪಡೆದಿರುವ ಆರ್​​ಸಿಬಿ ತಂಡವು ಕ್ವಾಲಿಫೈಯರ್ -1 ರಲ್ಲಿ ಆಡುವ ಸುಲಭ ಅವಕಾಶವನ್ನು ಪಡೆಯಲಿದೆ. ಚೆನ್ನೈ ಇಲ್ಲಿ ಸೋತರೆ, ಅವರ ಪ್ಲೇಆಫ್ ಪ್ರಯಾಣ ಬಹುತೇಕ ಮುಗಿಯಲಿದೆ ಎಂದು ಕ್ರಿಕೆಟ್ ಪಂಡಿತರು ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ.

ಈ ಪಂದ್ಯ ಚೆನ್ನೈ ಸೂಪರ್ ಕಿಂಗ್ಸ್‌ಗೆ ಮಾಡು ಇಲ್ಲವೇ ಮಡಿ ಇದ್ದಂತೆ. ತವರಿನಲ್ಲಿ ತಮ್ಮ ಅಭಿಮಾನಿಗಳ ಮುಂದೆ ನಡೆಯುತ್ತಿರುವ ಈ ಪಂದ್ಯವನ್ನು ಚೆನ್ನೈ ಸೋತರೆ, ಸಿಎಸ್‌ಕೆ ರೇಸ್‌ನಿಂದ ಹೊರಗುಳಿಯುತ್ತದೆ. ಹೀಗಾಗಿ, ಉಳಿದಿರುವ ಏಕೈಕ ಸ್ಥಾನಕ್ಕಾಗಿ ಪಂಜಾಬ್ ಮತ್ತು ರಾಜಸ್ಥಾನ ನಡುವೆ ತೀವ್ರ ಪೈಪೋಟಿ ನಡೆಯಲಿದೆ.