ದುಬಾರಿ ಕ್ಯಾಬ್ ಬೇಡ, ಲಗೇಜ್ ಹೊರುವ ಕಿರಿಕಿರಿ ಇಲ್ಲ!

ದುಬಾರಿ ಕ್ಯಾಬ್ ಬೇಡ, ಲಗೇಜ್ ಹೊರುವ ಕಿರಿಕಿರಿ ಇಲ್ಲ! ಈವರೆಗೆ ಏರ್‌ಪೋರ್ಟ್‌ಗೆ ಬಂದಿಳಿಯುವ ಪ್ರವಾಸಿಗರು ಮೈಸೂರು ಅಥವಾ ಕೊಡಗಿಗೆ ಹೋಗಬೇಕಾದರೆ, ಸಾವಿರಾರು ರೂಪಾಯಿ ತೆತ್ತು ಕ್ಯಾಬ್ ಮೂಲಕ ಮೆಜೆಸ್ಟಿಕ್ ಅಥವಾ ಸ್ಯಾಟಲೈಟ್ ಬಸ್‌ ನಿಲ್ದಾಣಕ್ಕೆ ಬರಬೇಕಿತ್ತು. ಭಾರಿ ಲಗೇಜ್‌ಗಳನ್ನು ಹೊತ್ತುಕೊಂಡು ಬಸ್ ಬದಲಾಯಿಸುವಷ್ಟರಲ್ಲಿ ಸುಸ್ತಾಗುತ್ತಿತ್ತು. ಆದರೆ ಈಗ, ವಿಮಾನ ನಿಲ್ದಾಣದ ಟರ್ಮಿನಲ್‌ನಿಂದ ಹೊರಬರುತ್ತಿದ್ದಂತೆಯೇ ನೇರವಾಗಿ ಈ ಐಷಾರಾಮಿ ಫ್ಲೈಬಸ್ ಹತ್ತಿದರೆ, ಯಾವುದೇ ಟೆನ್ಷನ್ ಇಲ್ಲದೆ ಬೆಳಗಾಗುವಷ್ಟರಲ್ಲಿ ನಿಮ್ಮ ನೆಚ್ಚಿನ ಪ್ರವಾಸಿ ತಾಣದಲ್ಲಿರುತ್ತೀರಿ!

ಯಾವೆಲ್ಲಾ ಊರಿಗೆ ಹೋಗಲು ಅನುಕೂಲ?

ಪ್ರವಾಸಿಗರ ಸ್ವರ್ಗಗಳನ್ನೇ ಬೆಸೆಯುವ ‘ಟೂರಿಸ್ಟ್ ಸರ್ಕ್ಯೂಟ್’ ಮಾರ್ಗ ಈ ಬಸ್ ಕೇವಲ ಒಂದು ಊರಿಗೆ ಸೀಮಿತವಾಗಿಲ್ಲ; ದಕ್ಷಿಣ ಭಾರತದ ಪ್ರಮುಖ ಟೂರಿಸ್ಟ್ ಸರ್ಕ್ಯೂಟ್ ಅನ್ನೇ ಇದು ಸಂಪರ್ಕಿಸುತ್ತಿದೆ. ವಿಮಾನ ನಿಲ್ದಾಣದಿಂದ ಹೊರಡುವ ಬಸ್ ಯಲಹಂಕ, ನಾಯಂಡಹಳ್ಳಿ ಮಾರ್ಗವಾಗಿ ಸಾಂಸ್ಕೃತಿಕ ನಗರಿ ಮೈಸೂರು, ಹುಣಸೂರು, ಕೊಡಗಿನ ಪ್ರಮುಖ ಕೇಂದ್ರಗಳಾದ ಗೋಣಿಕೊಪ್ಪ, ಪೊನ್ನಂಪೇಟೆ, ಕುಟ್ಟ (ನಾಗರಹೊಳೆ ಸಫಾರಿಗೆ ಅತಿ ಸಮೀಪ), ಹಾಗೂ ಕೇರಳದ ಪ್ರಸಿದ್ಧ ಗಿರಿಧಾಮ ವಯನಾಡ್‌ನ ಮಾನಂತವಾಡಿ, ಕಲ್ಪೆಟ್ಟ ಮಾರ್ಗವಾಗಿ ಕಡಲತೀರದ ಕೋಝಿಕ್ಕೋಡ್ ತಲುಪಲಿದೆ.

ವಿಮಾನದಂತಹುದೇ ಸೌಕರ್ಯ, ದರವೂ ಪಾಕೆಟ್ ಫ್ರೆಂಡ್ಲಿ!

ವಿಮಾನದಂತಹುದೇ ಸೌಕರ್ಯ, ದರವೂ ಪಾಕೆಟ್ ಫ್ರೆಂಡ್ಲಿ! ಪ್ರವಾಸಿಗರ ಆಯಾಸ ತಗ್ಗಿಸಲು ವೋಲ್ವೋ ಮಲ್ಟಿ-ಆಕ್ಸಲ್ ಬಸ್‌ನಲ್ಲಿ ವಿಮಾನದ ಮಾದರಿಯಲ್ಲೇ ಆರಾಮದಾಯಕ ರಿಕ್ಲೈನಿಂಗ್ ಸೀಟ್‌ಗಳು, ಎಸಿ, ಹಾಗೂ ಒಳಭಾಗದಲ್ಲೇ ಶೌಚಾಲಯ (ರೆಸ್ಟ್‌ರೂಮ್) ವ್ಯವಸ್ಥೆ ಇರಲಿದೆ. ಇದರೊಂದಿಗೆ ಉಚಿತವಾಗಿ ಕುಡಿಯುವ ನೀರು ಹಾಗೂ ಸ್ನ್ಯಾಕ್ ಕಿಟ್ ಒದಗಿಸಲಾಗುತ್ತದೆ. ಏರ್‌ಪೋರ್ಟ್‌ನಿಂದ ಮೆಜೆಸ್ಟಿಕ್‌ಗೆ ಬರುವ ಕ್ಯಾಬ್ ದರದಲ್ಲೇ, ನೀವು ಮೈಸೂರು ಅಥವಾ ಕೊಡಗು ತಲುಪಬಹುದು!

• ಮೈಸೂರಿಗೆ: ₹960
• ಗೋಣಿಕೊಪ್ಪ (ಕೊಡಗು): ₹1,200
• ಮಾನಂತವಾಡಿ (ವಯನಾಡ್): ₹1,350
• ಕಲ್ಪೆಟ್ಟ: ₹1,400
• ಕೋಝಿಕ್ಕೋಡ್: ₹1,500

ಏರ್‌ಪೋರ್ಟ್‌ನಿಂದ: ಪ್ರತಿದಿನ ರಾತ್ರಿ 10.45ಕ್ಕೆ ಬೆಂಗಳೂರು ಏರ್‌ಪೋರ್ಟ್‌ನಿಂದ ಹೊರಡುವ ಬಸ್, ಮರುದಿನ ಮುಂಜಾನೆ 7.15ಕ್ಕೆ ಕೋಝಿಕ್ಕೋಡ್ ತಲುಪಲಿದೆ (ಮಧ್ಯರಾತ್ರಿ 12.30ರ ಸುಮಾರಿಗೆ ಮೈಸೂರು ತಲುಪಲಿದೆ). ನೀವು ನಿದ್ದೆ ಮಾಡಿ ಏಳುವಷ್ಟರಲ್ಲಿ ನಿಮ್ಮ ಡೆಸ್ಟಿನೇಷನ್ ಬಂದಿರುತ್ತದೆ.