ಸಾವಿರಾರು ಹಾಡುಗಳನ್ನು ಹಾಡಿದ್ದರೂ ನಟನೆಯಿಂದ ದೂರವೇ ಉಳಿದಿದ್ದ ಎಸ್. ಜಾನಕಿ ಅವರು ನಿರ್ದೇಶಕ ಸಿ. ಪ್ರೇಮ್ ಕುಮಾರ್ ಅವರ 96 ಚಿತ್ರದ ಮೂಲಕ ಮೊದಲ ಬಾರಿಗೆ ವಿಶೇಷ ಪಾತ್ರದಲ್ಲಿ ಕಾಣಿಸಿಕೊಂಡರು.

ಹೀಗಿರುವಾಗ ಒಂದು ದಿನ (ರಾಮ್) ವಿಜಯ್ ಸೇತುಪತಿ ಹಾಗೂ ಜಾನು(ತ್ರಿಶಾ) ಎಸ್. ಜಾನಕಿ ಅವರ ಮನೆ ಮುಂದೆ ಹೋಗಿ ಫೋಟೋ ತೆಗೆದುಕೊಳ್ಳುತ್ತಿರುತ್ತಾರೆ. ಈ ವೇಳೆ ಎಸ್. ಜಾನಕಿ ಅವರು ಕಾರಿನಲ್ಲಿ ಅಲ್ಲಿಗೆ ಬರುತ್ತಾರೆ. ಆ ವೇಳೆ ಜಾನು ನಿಮ್ಮ ದೊಡ್ಡ ಅಭಿಮಾನಿ ಎಂದು ಹೇಳಿಕೊಳ್ಳುತ್ತಾರೆ. ಆಗ ಎಸ್. ಜಾನಕಿ ಅವರು ಇಬ್ಬರನ್ನೂ ತಮ್ಮ ಮನೆಗೆ ಕರೆಯುತ್ತಾರೆ. ಜೊತೆಗೆ ಮನೆಯಲ್ಲಿ ಒಟ್ಟಾಗಿ ಕೂತು ಕೆಲ ಹೊತ್ತು ಸಮಯ ಕಳೆಯುವ ಸೀನ್ ಆಗಿರುತ್ತದೆ.

ಚಿತ್ರದ ಪ್ರಮುಖ ಆಕರ್ಷಣೆಯಾಗಬಹುದಾದ ಈ ದೃಶ್ಯವನ್ನು ಅಂತಿಮವಾಗಿ ಥಿಯೇಟರ್‌ನಲ್ಲಿ ಬಿಡುಗಡೆಯಾದ ಆವೃತ್ತಿಯಿಂದ ತೆಗೆದುಹಾಕಲಾಗಿತ್ತು.

ನಂತರ ಈ ಡಿಲೀಟೆಡ್ ದೃಶ್ಯವನ್ನು ಯೂಟ್ಯೂಬ್‌ನಲ್ಲಿ ಬಿಡುಗಡೆ ಮಾಡಲಾಯಿತು. ಬಿಡುಗಡೆಯಾದ ಕೆಲವೇ ದಿನಗಳಲ್ಲಿ ಲಕ್ಷಾಂತರ ಮಂದಿ ಈ ದೃಶ್ಯವನ್ನು ವೀಕ್ಷಿಸಿ ಮೆಚ್ಚುಗೆ ವ್ಯಕ್ತಪಡಿಸಿದ್ದರು. ವಿಶೇಷವಾಗಿ ಎಸ್. ಜಾನಕಿ ಅವರ ಅಭಿಮಾನಿಗಳಿಗೆ ಇದು ಅಮೂಲ್ಯ ನೆನಪಾಗಿ ಉಳಿಯಿತು.

ಎಸ್. ಜಾನಕಿ ಅವರು 2016ರಲ್ಲಿ ಹಿನ್ನೆಲೆ ಗಾಯನಕ್ಕೆ ಅಧಿಕೃತವಾಗಿ ವಿದಾಯ ಹೇಳಿದ್ದರು. ದಶಕಗಳ ಕಾಲ ಭಾರತೀಯ ಸಂಗೀತ ಲೋಕಕ್ಕೆ ಅಮೂಲ್ಯ ಕೊಡುಗೆ ನೀಡಿದ ಅವರು, ತಮ್ಮ ಹಾಡುಗಳ ಮೂಲಕ ಇಂದಿಗೂ ಕೋಟ್ಯಂತರ ಅಭಿಮಾನಿಗಳ ಮನದಲ್ಲಿ ಜೀವಂತವಾಗಿದ್ದಾರೆ.

ಇಂದು ಜಾನಕಿಯಮ್ಮ ನಮ್ಮೊಂದಿಗಿಲ್ಲದಿದ್ದರೂ, ಅವರ ಮಧುರ ಧ್ವನಿ, ಅಮರ ಗೀತೆಗಳು ಸಂಗೀತ ಹಾಗೂ ಚಿತ್ರರಂಗದ ಇತಿಹಾಸದಲ್ಲಿ ಸದಾ ವಿಶೇಷ ಸ್ಥಾನವನ್ನು ಪಡೆದುಕೊಂಡಿರಲಿದೆ.