ತನ್ನ ಬಾಲ್ಯದಲ್ಲಿ ಎದುರಾದ ತೀವ್ರ ಬಡತನವನ್ನು ಸಮರ್ಥವಾಗಿ ಎದುರಿಸಿ, ಅದನ್ನು ಮೆಟ್ಟಿ ನಿಂತು ಅವಿಶ್ರಾಂತವಾಗಿ ಶ್ರಮಿಸಿ, ಕಷ್ಟಪಟ್ಟು ಅಧ್ಯಯನ ಮಾಡಿ ತನ್ನ ವೈದ್ಯೆಯಾಗುವ ಕನಸನ್ನು ನನಸು ಮಾಡಿಕೊಂಡಂತಹ ಹಿಮಾಚಲ ಪ್ರದೇಶದ ಯುವತಿ ಪಿಂಕಿ ಹರಿಯಾಣ ಅವರ ನಿಜವಾದ ಪ್ರೇರಕ ಮತ್ತು ಹೃದಯಸ್ಪರ್ಶಿ ಕಥೆ ಇದು.
ಒಂದು ಕಾಲದಲ್ಲಿ ಮೆಕ್ಲಿಯೋಡ್ಗಂಜ್ನ ಬೀದಿಗಳಲ್ಲಿ ಭಿಕ್ಷೆ ಬೇಡುತ್ತಾ, ಕಸದ ತೊಟ್ಟಿಗಳನ್ನು ಆಹಾರಕ್ಕಾಗಿ ಹುಡುಕುತ್ತಾ, ವೈದ್ಯೆಯಾಗಲು ದುಸ್ತರವಾದ ಅವಕಾಶಗಳನ್ನು ಮೀರಿ, ಈಗ ಭಾರತದಲ್ಲಿ ತನ್ನ ಅಭ್ಯಾಸವನ್ನು ಪ್ರಾರಂಭಿಸಲು ಪರವಾನಗಿ ಪಡೆಯಲು ವಿದೇಶಿ ವೈದ್ಯಕೀಯ ಪದವಿ ಪರೀಕ್ಷೆ (ಎಫ್ಎಂಜಿಇ) ಯನ್ನು ಪಾಸ್ ಮಾಡಲು ತಯಾರಿ ನಡೆಸುತ್ತಿರುವ ಪಿಂಕಿ ಹರಿಯಾಣ ಅವರ ಗಮನಾರ್ಹ ಜೀವನ ಪ್ರಯಾಣದ ಬಗ್ಗೆ ಇನ್ನಷ್ಟು ತಿಳಿದುಕೊಳ್ಳೋಣ.
ಹಿಮಾಚಲ ಪ್ರದೇಶದ ಕಂಗ್ರಾ ಜಿಲ್ಲೆಯ ಮೆಕ್ಲಿಯೋಡ್ಗಂಜ್ನಲ್ಲಿ ಬಡ ಕುಟುಂಬದಲ್ಲಿ ಜನಿಸಿದ ಪಿಂಕಿ ಹರಿಯಾಣ ಅವರ ಬಾಲ್ಯವು ತುಂಬಾನೇ ಕಠಿಣವಾಗಿತ್ತು.
ಚರಣ್ ಖುಡ್ನ ಸ್ಲಂ ಪ್ರದೇಶದಲ್ಲಿ ವಾಸಿಸುತ್ತಿದ್ದ ಅವರ ಕುಟುಂಬವು ರಸ್ತೆಯಲ್ಲಿ ಭಿಕ್ಷೆ ಬೇಡುತ್ತಾ ಮತ್ತು ಬದುಕಲು ಕಸದ ತೊಟ್ಟಿಗಳಿಂದ ಆಹಾರವನ್ನು ಸಂಗ್ರಹಿಸುತ್ತಿತ್ತು.
ಪಿಂಕಿಯ ಬಾಲ್ಯವು ದುಃಖ ಮತ್ತು ಕಷ್ಟಗಳಿಂದ ತುಂಬಿತ್ತು, ಆದರೆ ಧೈರ್ಯಶಾಲಿ ಹುಡುಗಿ ಎಂದಿಗೂ ಇನ್ನೊಬ್ಬರ ಕರುಣೆಗಾಗಿ ಹಂಬಲಿಸಲಿಲ್ಲ, ಬದಲಿಗೆ ಸಂಪೂರ್ಣ ನಿರ್ಣಯ, ಧೈರ್ಯ ಮತ್ತು ಕಠಿಣ ಪರಿಶ್ರಮದ ಮೂಲಕ ತನ್ನ ಹಣೆಬರಹವನ್ನು ಬದಲಾಯಿಸಿಕೊಂಡರು.
2004 ರಲ್ಲಿ, ಮೆಕ್ಲಿಯೋಡ್ಗಂಜ್ನಲ್ಲಿ ವಾಸಿಸುವ ಟಿಬೆಟಿಯನ್ ನಿರಾಶ್ರಿತ ಲೋಬ್ಸಾಂಗ್ ಜಮ್ಯಾಂಗ್ ಅವರೊಂದಿಗಿನ ಆಕಸ್ಮಿಕ ಭೇಟಿಯು ಪಿಂಕಿಯ ಜೀವನ ಮತ್ತು ಅವಳ ಹಣೆಬರಹವನ್ನು ಸಂಪೂರ್ಣವಾಗಿ ಬದಲಾಯಿಸಿತು.
ಧರ್ಮಶಾಲಾದ ಟಾಂಗ್-ಲೆನ್ ಚಾರಿಟೇಬಲ್ ಟ್ರಸ್ಟ್ನ ನೇತೃತ್ವ ವಹಿಸಿದ್ದ ಬೌದ್ಧ ಸನ್ಯಾಸಿ ಧರ್ಮಶಾಲಾದ ದಯಾನಂದ ಪಬ್ಲಿಕ್ ಶಾಲೆಯಲ್ಲಿ ಅವಳ ಶಿಕ್ಷಣಕ್ಕೆ ಹಣಕಾಸು ನೆರವು ಒದಗಿಸಲು ಮುಂದಾದರು.
ಮೊದಲಿಗೆ, ಪಿಂಕಿಯ ತಂದೆ ಕಾಶ್ಮೀರಿ ಲಾಲ್, ಟ್ರಸ್ಟಿನ ಉದಾರ ಕೊಡುಗೆಯನ್ನು ಒಪ್ಪಲಿಲ್ಲ, ಆದರೆ ಅಂತಿಮವಾಗಿ ಜಮ್ಯಾಂಗ್ ಅವರು ಇವರ ಮನವೊಲಿಸಿ ಪಿಂಕಿಯನ್ನು ಶಾಲೆಗೆ ಸೇರಿಸಿದರು, ಅಲ್ಲಿ ಅವರು ಟ್ರಸ್ಟ್ನ ನಿರ್ಗತಿಕ ಮಕ್ಕಳಿಗಾಗಿರುವ ಹಾಸ್ಟೆಲ್ನಲ್ಲಿ ವಾಸಿಸುವ ವಿದ್ಯಾರ್ಥಿಗಳಲ್ಲಿ ಒಬ್ಬರಾದರು.
ಶೀಘ್ರದಲ್ಲಿಯೇ ಪಿಂಕಿ ತಮ್ಮ ಅಧ್ಯಯನದಲ್ಲಿ ಶ್ರೇಷ್ಠತೆ ಸಾಧಿಸಿದರು ಮತ್ತು ಅಸಾಧಾರಣ ಶೈಕ್ಷಣಿಕ ಪರಾಕ್ರಮವನ್ನು ಪ್ರದರ್ಶಿಸಿದರು, ಮತ್ತು 12ನೇ ತರಗತಿ ಪರೀಕ್ಷೆಗಳನ್ನು ಪೂರ್ಣಗೊಳಿಸಿದ ನಂತರ, ಅವರು ರಾಷ್ಟ್ರೀಯ ಅರ್ಹತಾ ಮತ್ತು ಪ್ರವೇಶ ಪರೀಕ್ಷೆ (ನೀಟ್) ವೈದ್ಯಕೀಯ ಪ್ರವೇಶ ಪರೀಕ್ಷೆಯಲ್ಲಿ ಉತ್ತೀರ್ಣರಾದರು. ಆದರೆ ಸರ್ಕಾರಿ ವೈದ್ಯಕೀಯ ಕಾಲೇಜಿನಲ್ಲಿ ಸೀಟು ಪಡೆಯಲು ಒಳ್ಳೆಯ ಅಂಕಗಳನ್ನು ಪಡೆಯಲು ಸಾಧ್ಯವಾಗಲಿಲ್ಲ.
ಪಿಂಕಿ
ಖಾಸಗಿ ವೈದ್ಯಕೀಯ ಕಾಲೇಜುಗಳು ಬೇಡಿಕೆಯಿಟ್ಟ ಅತಿಯಾದ ಶುಲ್ಕವನ್ನು ಪಾವತಿಸಲು ಸಾಧ್ಯವಾಗದೆ, ವಾಸ್ತವವು ಅಂತಿಮವಾಗಿ ಪಿಂಕಿಯ ಕನಸುಗಳನ್ನು ಪುಡಿ ಮಾಡಿದಂತೆ ತೋರುತ್ತಿತ್ತು.
ಈಗ, ಆರು ವರ್ಷಗಳ ನಂತರ, ಚೀನಾದ ಕಾಲೇಜಿನಿಂದ ಎಂಬಿಬಿಎಸ್ ಪದವಿ ಪಡೆದ ನಂತರ, ಪಿಂಕಿ ಹರಿಯಾಣ ಧರ್ಮಶಾಲಾಕ್ಕೆ ಮರಳಿದ್ದಾರೆ ಮತ್ತು ಭಾರತದಲ್ಲಿ ವೈದ್ಯಕೀಯ ವೃತ್ತಿ ಮಾಡಲು ಅಗತ್ಯವಿರುವ ವೈದ್ಯಕೀಯ ಪರವಾನಗಿಯನ್ನು ಪಡೆಯಲು ಎಫ್ಎಂಜಿಇ ಪರೀಕ್ಷೆಗೆ ತಯಾರಿ ನಡೆಸುತ್ತಿದ್ದಾರೆ.
ದೀನದಲಿತ ಕುಟುಂಬಗಳ ಮಕ್ಕಳಿಗೆ ಸಹಾಯ ಮಾಡಲು ಟಾಂಗ್-ಲೆನ್ ಟ್ರಸ್ಟ್ ಅನ್ನು ಸ್ಥಾಪಿಸಿದ ಜಮ್ಯಾಂಗ್, ಮಕ್ಕಳು ಕೇವಲ ಹಣ ಸಂಪಾದಿಸುವುದು ಹೇಗೆ ಎಂದು ಕಲಿಸದೆ, ಉತ್ತಮ ಮನುಷ್ಯರಾಗಲು ಪ್ರೋತ್ಸಾಹಿಸಬೇಕು ಅಂತ ಹೇಳುತ್ತಾರೆ.
