ಪ್ರೊ ಕಬಡ್ಡಿ ಲೀಗ್‌ ಸೀಸನ್ 11ರಲ್ಲಿ ಬೆಂಗಳೂರು ಬುಲ್ಸ್ ತಂಡವು ಕಳಪೆ ಪ್ರದರ್ಶನ ಮುಂದುವರೆಸಿದೆ. ಟೂರ್ನಿಯಲ್ಲಿ 11 ಸೋಲಿಗೆ ಶರಣಾಗಿದೆ. ಇದರೊಂದಿಗೆ ಅಂಕಪಟ್ಟಿಯಲ್ಲಿ ಕೊನೆಯ ಸ್ಥಾನಕ್ಕಿಳಿದಿದೆ. ಪಿಕೆಎಲ್ 11ರ 68ನೇ ಪಂದ್ಯದಲ್ಲಿಯೂ ಗೆಲುವು ಕಾಣಲು ವಿಫಲವಾದ ಗೂಳಿಗಳ ಬಳಗವು, ಹರಿಯಾಣ ಸ್ಟೀಲರ್ಸ್ ತಂಡಕ್ಕೆ ಗೆಲುವು ಬಿಟ್ಟುಕೊಟ್ಟಿದೆ. ಸ್ಟೀಲರ್ಸ್ ಪರ ಮಿಂಚಿದ ರೈಡರ್‌ ವಿನಯ್, ಸೂಪರ್ 10 ಪೂರ್ಣಗೊಳಿಸಿದರು. ಪಂದ್ಯವನ್ನು 26-32 ಅಂಕಗಳಿಂದ ವಶಪಡಿಸಿಕೊಂಡ ತಂಡ, ಅಂಕಪಟ್ಟಿಯಲ್ಲಿ ಅಗ್ರಸ್ಥಾನಕ್ಕೇರಿತು. ಅತ್ತ ಬೆಂಗಳೂರು ಬುಲ್ಸ್ ತಂಡವು ಸತತ ಐದನೇ ಸೋಲು ಕಂಡಿತು.