ಎರಡೇ ಎರಡು ಬಲ್ಬ್ ಇರುವ ತಗಡಿನ ಶೆಡ್‌ ನಲ್ಲಿರುವ 90ರ ವೃದ್ಧೆ ಮನೆಗೆ ಲಕ್ಷಗಟ್ಟಲೇ ವಿದ್ಯುತ್ ಬಿಲ್: ಕಣ್ಣೀರಿಟ್ಟ ಅಜ್ಜಿ | gescom Electricity Bill Of Rs 1 Lakh Leaves Koppal House Owner Shocked

Karnataka

oi-Reshma P

ಕೊಪ್ಪಳ, ಜೂನ್‌ 22: ರಾಜ್ಯ ವಿಧಾನಸಭಾ ಚುನಾವಣೆಯ ಸಂದರ್ಭದಲ್ಲಿ ಗ್ಯಾರಂಟಿ ಘೋಷಣೆಗಳನ್ನ ಜಾರಿಗೊಳಿಸುವ ಮೂಲಕ ರಾಜ್ಯದಲ್ಲಿ ಕಾಂಗ್ರೆಸ್‌ ಸರ್ಕಾರ ಅಧಿಕಾರಕ್ಕೆ ಬಂದಿದ್ದು, ಗೃಹ ಜ್ಯೋತಿ ಯೋಜನೆ ಅಡಿಯಲ್ಲಿ 200 ಯುನಿಟ್​ ವಿದ್ಯುತ್ ಫ್ರೀ ಘೋಷಣೆ ಮಾಡಿದ ಬೆನ್ನಲ್ಲೇ ರಾಜ್ಯದ ಹಲವೆಡೆ ಮನೆ ವಿದ್ಯುತ್​ ಬಿಲ್ ಲಕ್ಷ ಲಕ್ಷ ಬರುತ್ತಿರುವುದು ವರದಿಯಾಗುತ್ತಿವೆ.

ಇತ್ತೀಚೆಗಷ್ಟೇ ವಿದ್ಯುತ್ ಬಿಲ್ ಹೆಚ್ಚಳ ಕುರಿತು ಸಾರ್ವಜನಿಕ ವಲಯದಲ್ಲಿ ಸಾಕಷ್ಟು ವಿರೋಧಗಳು ಕೇಳಿ ಬಂದಿದ್ದು, ಸಾರ್ವಜನಿಕರು ಸರ್ಕಾರ ವಿರುದ್ದ ಆಕ್ರೋಶ ಹೊರಹಾಕಿದ್ದು. ಇದೀಗ ಕೊಪ್ಪಳದ 90 ರ ವೃದ್ದೆಯ ಮನೆಗೆ ಬರೋಬ್ಬರಿ ಒಂದು ಲಕ್ಷ ಬಿಲ್ ಬಂದಿದೆ. ಒಂದು ತಗಡಿನ ಶೆಡ್ ನಲ್ಲಿ ವಾಸಿಸುತ್ತಿರುವ ಗೀರಿಜಮ್ಮ ಎನ್ನುವ ವೃದ್ಧೆ ಮನೆಯಲ್ಲಿ ಎರಡೇ ಎರಡು ಲೈಟ್ ಹೊಂದಿರುವ ಮನೆಗೆ ಜೆಸ್ಕಾಂ, ಲಕ್ಷಗಟ್ಟಲೆ ವಿದ್ಯುತ್​ ಬಿಲ್ ನೀಡಿದೆ.

ಕೊಪ್ಪಳ ತಾಲೂಕಿನ ಭಾಗ್ಯ ನಗರದಲ್ಲಿರುವ ಕೇವಲ‌ ಎರಡು ಬಲ್ಪ್ ಇರುವ ವೃದ್ದೆಯೊಬ್ಬರ ಮನೆಗೆ ಬರೊಬ್ಬರಿ 1 ಲಕ್ಷದ ಮೇಲೆ ವಿದ್ಯುತ್ ಬಿಲ್ ಬಂದಿದೆ. ಇವರ ಮನೆಗೆ ಬಂದಿರುವ ಕರೆಂಟ್ ಬಿಲ್ ಮೊತ್ತ ಕೇಳಿ ಶಾಖ್ ಗೆ‌ ವೃದ್ದೆ ಒಳಗಾಗಿದ್ದು, ಕಣ್ಣೀರಿಟ್ಟಿದ್ದಾರೆ.

ಈ ಅಜ್ಜಿ ಇರೋದು ಒಂದು ತಗಡಿನ ಶೆಡ್ ನಲ್ಲಿ ಈ ಶೆಡ್‌ ಮನೆಯಲ್ಲಿ ಇರುವುದು ಎರಡೇ ಎರಡು ಬಲ್ಬ್. ಆದರೆ, ಈ ಅಜ್ಜಿಯ ಮನೆಗೆ ಬಂದಿರೋ ಬಿಲ್ ಮಾತ್ರ ಬರೋಬ್ಬರಿ ಒಂದು ಲಕ್ಷದ ಮೂರು ಸಾವಿರದ ಮೂರು ನೂರಾ ಹದಿನೈದು ರೂಪಾಯಿ. ತಿಂಗಳಿಗೆ 70 ರಿಂದ 80 ರೂ. ಬರುವ ವಿದ್ಯುತ್ ಬಿಲ್ ಏಕಾಏಕಿ ಲಕ್ಷ ದಾಟಿದರೇ ಯಾರಿಗೆ ಶಾಕ್ ಹೊಡೆಯಲ್ಲ‌ ಹೇಳಿ, ಹೀಗಾಗಿ ಈ ಅಜ್ಜಿಗೆ ಬಿಲ್ ಕೇಳಿ ದಿಗ್ಬ್ರಾಂತ ಳಾಗಿದ್ದಾಳೆ.

ಈ ವೃದ್ಧೆಗೆ ಓದು ಬರಲ್ಲ, ಬರಿಯೋಕು ಬರಲ್ಲ, ಬಿಲ್ ಬಂದಿದ್ದು ಗೊತ್ತಾಗಿಲ್ಲ. ಕಳೆದ ಆರು ತಿಂಗಳಿಂದ ಜೆಸ್ಕಾಂ ಸಿಬ್ಬಂದಿ ಬಿಲ್ ನೀಡಿ ಹೋಗುತ್ತಿದ್ದಾರೆ. ಇದನ್ನೆಲ್ಲ ಹೆಂಗಪ್ಪ ಕಟ್ಟುವುದು ಅಂತ ಈ ವೃದ್ದೆ ಗಿರಿಜಮ್ಮ ತಲೆ ಮೇಲೆ ಕೈ ಹೊತ್ತು ಕುಳಿತಿದ್ದಾರೆ. ಅಲ್ಲದೆ, ಈ ವೃದ್ದೆಯ ಮನೆಗೆ ಸರಕಾರ ಭಾಗ್ಯಜ್ಯೋತಿ ಯೋಜನೆಯಲ್ಲಿ ವಿದ್ಯುತ್ ಸಂಪರ್ಕ ನೀಡಿತ್ತು. ಪ್ರತಿ ತಿಂಗಳು 70 ರಿಂದ 80 ರೂ ಬಿಲ್ ಬರ್ತಾಯಿತ್ತು. ಈ ಮನೆಯಲ್ಲಿ ಇರೋದು ಈ ಅಜ್ಜಿ ಮತ್ತು ಆಕೆಯ ಮಗ ಇಬ್ಬರೆ. ಇವರು ಮನೆಯಲ್ಲಿ ಬಳಸೋದು ಕೂಡಾ ಕೇವಲ ಎರಡು ಬಲ್ಬ್ ಮಾತ್ರ.

ಕಳೆದ ಆರು ತಿಂಗಳ ಹಿಂದೆ ಈ ಮನೆಗೆ ಜೆಸ್ಕಾಂ ಸಿಬ್ಬಂದಿ ಮೀಟರ್ ಅಳವಡಿಕೆ ಮಾಡಿದ್ದಾರೆ. ಮೀಟರ್ ಹಾಕಿದಾಗಿಂದ ಈ ಮನೆಗೆ ಬರುತ್ತಿರುವ ಬಿಲ್ ಹತ್ತರಿಂದ ಇಪ್ಪತ್ತು ಸಾವಿರ ದಾಟಿ ಲಕ್ಷದವರೆಗೆ ಬಂದು ನಿಂತಿದೆ. ಈ ಮನೆಗೆ ಬಿಲ್ ಕೊಟ್ಟು ಹೋಗುವ ಜೆಸ್ಕಾಂ ಸಿಬ್ಬಂದಿ ಹಣ ಕೇಳೊಕೆ ವಾಪಸ್ ಬರುತ್ತಿಲ್ಲ. ಸದ್ಯ ಈ ಬಡ ಕುಟುಂಬಕ್ಕೆ 1 ಲಕ್ಷಕ್ಕೂ ಹೆಚ್ಚು ಬಿಲ್ ನೀಡಲಾಗಿದೆ.

ಇನ್ನೂ ಒಂದು ತಗಡಿನ ಶೆಡ್ ಮನೆಯಲ್ಲಿ ಎರಡೇ ಎರಡು ಬಲ್ಬ್​ಗೆ ಲಕ್ಷಗಟ್ಟಲೇ ವಿದ್ಯುತ್​ ಬಿಲ್​ ಬರುತ್ತಾ ಎನ್ನುವುದು ಚರ್ಚೆಗೆ ಗ್ರಾಸವಾಗಿದೆ. ಮೀಟರ್ ರೀಡರ್ ಎಡವಟ್ಟಿನಿಂದ ರೀತಿ ಆಗಿದ್ಯಾ ಎನ್ನುವ ಪ್ರಶ್ನೆಗಳು ಉದ್ಭವಿಸಿವೆ. ಈ ಬಗ್ಗೆ ಜೆಸ್ಕಾಂ ಅಧಿಕಾರಿಗಳು ಗಮನಹರಿಸಿ ಏಕೆ ಇಷ್ಟೊಂದು ಬಿಲ್ ಬಂದಿದೆ ಎಂದು ಪರಿಶೀಲಿಸಬೇಕಿದೆ.